ވަލްކޭއަށް ދީފައިވާ 10 އަހަރުގެ ސަސްޕެންޝަން އިސްތިއުނާފްކޮށްފި

ފީފާގެ ކުރީގެ ސެކްރެޓަރީ ޖެނެރަލް ޖެރޯމް ވަލްކޭ އަށް ދީފައި ވަނީ ހައްގު ނޫން އަދަބެއް ކަމަށް ބުނެ އެ މައްސަލަ އޭނާ އިސްތިއުނާފް ކުރަން ހުށަހަޅައިފިއެވެ.

މިދިޔަ އަހަރު ފީފާގެ ސެކްރެޓަރީ ޖެނެރަލްގެ މަޤާމުން ވަކިކުރުމަށް ފަހު10 އަހަރަށް ސަސްޕެންޑްކުރި މައްސަލަ ވަލްކޭ މިހާރު ވަނީ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް)ގައި އިސްތިއުނާފް ކޮށްފައެވެ.

ދެހާސް ތިން ވަނަ އަހަރު ފީފާއާ ގުޅުނު ވަލްކޭ ޖެނެރަލް ސެކްރެޓަރީގެ މަގާމާއި ހަވާލުވީ 2007 ވަނަ އަހަރު އެވެ.

މިދިޔަ އަހަރު ވަލްކޭ މަޤާމުން ވަކިކޮށްފައިވަނީ އޭނާގެ މައްޗަށް ކުރެވުނު ކޮރަޕްޝަނުގެ ތުހުމަތުތަކެއް ތަހުގީގު ކުރުމަށް ފަހު އެކަންތައްތައް ސާބިތުވުމުންނެވެ.

އެގޮތުން ވޯލްޑް ކަޕްގެ ޓީވީ އެއްބަސްވުންތަކާއި ބްލެކް މާކެޓްގައި ވޯލްޑް ކަޕް ޓިކެޓް ވިއްކުން ފަދަ ކަންކަން އޭނާގެ މައްޗަށް ހިންގި ތަހުގީގަށް ވަނީ ސާބިތުވެފައެވެ.

މަގާމުގެ ނުފޫޒު ބޭނުންކޮށް ކޮރަޕްޝަން ހިންގާފައިވާކަން ވަލްކޭގެ މައްޗަށް ސާބިތުވުމުން ފީފާ އެތިކްސް ކޮމިޓީން ވަނީ އޭނާގެ މައްޗަށް ފިޔަވަޅު ވެސް އަޅާފައެވެ.

މައްސަލަތައް ބެލުމަށް ފަހު ވަލްކޭ 70،8000 ޕައުންޑުން ޖޫރިމަނާކުރުމާ އެކު 12 އަހަރު ދުވަހަށް ސަސްޕެންޑް ކުރުމަށް އެތިކްސް އެންމެ ފުރަތަމަ ނިންމި ނަމަވެސް ފަހުން ސަސްޕެންޝަނުގެ މުއްދަތު ކުޑަކޮށްދިނެވެ.

އެގޮތުން އެ މައްސަލަ އަލުން ބެލުމަށް ފަހު ވަލްކޭގެ 12 އަހަރު ދުވަހުގެ މުއްދަތު 10 އަހަރަށް ކުޑަކޮށްދިނެވެ.

ދެހާސް ހަތްވަނަ އަހަރު ފީފާގެ ޖެނެރަލް ސެކްރެޓަރީގެ މަގާމާ ވަލްކޭ ހަވާލުވުމުގެ ކުރިން ވަލްކޭ ހުރީ ފީފާގެ ޑިރެކްޓާ އޮފް މާކެޓިން އެންޑް ޓީވީގެ މަގާމުގައެވެ. އޭގެ ކުރިން ވަލްކޭއަކީ ފްރާންސްގެ ޓީވީ ސްޓޭޝަނެއް ކަމަށްވާ "ކެނަލް ޕްލަސް" ގެ ނޫސްވެރިއެކެވެ.

މި މައްސަލައިގައި ވަލްކޭ ބުނެފައިވަނީ އިންސާފު ހޯދަން ކުރެވެންހުރި ހުރިހާ މަސައްކަތެއް ކުރާނެ ކަމަށެވެ. އަދި އެ އަދަބަކީ އެއްގޮތަކަށް ވެސް އޭނާއަށް ޙައްޤު އަދަބެއް ނޫން ކަމަށް ވަލްކޭ ބުނެއެވެ.