ހެންވޭރު ޔޫތް ސެންޓަރުގެ ގޮތުގައި ކުރިން ބޭނުންކުރި މުނިއުފާ ހިންގި ބިން ތަރައްގީ ކުރެވޭނީ ކުޅިވަރު ކުރިއެވުމަށް ބޭނުންވާ ވަސީލަތްތަކާއެކު ހުރިހާ ކުޅިވަރެއްވެސް ހިންގުމަށްޓަކައި ބޭނުންވާނެ ފައިސާ ހޯދާނެ ތަނެއްގެ ގޮތުގައި ކަމަށް ސްޕޯޓްސް ކޯޕަރޭޝަންގެ މެނޭޖިން ޑިރެކްޓަރ އަބްދުއްރައްޒާގް އިބްރާހިމް ވިދާޅުވެއްޖެ އެވެ.
ރާއްޖޭގެ ކުޅިވަރުގެ ގާނޫނުގައި ބުނެފައި ވަނީ "ދިވެހި ދައުލަތުގެ މިލްކިއްޔާތުގައިވާ ކުޅިވަރާގުޅޭ މުދަލުގެ ތެރެއިން މޯލްޑިވްސް ސްޕޯޓްސް ކޯޕަރޭށަނަށް ބަދަލުކުރަން ކަނޑައެޅިފައިވާ މުދާ ކަނޑައަޅައި މޯލްޑިވްސް ސްޕޯޓްސް ކޯޕަރޭށަނަށް ކުޅިވަރާބެހޭ ވުޒާރާއިން ނަގުލުކޮށް ބަދަލު ކުރަންވާނެ" ކަމަށެވެ.
އެހެން ކަމުން ޔޫތް މިނިސްޓްރީގެ ބެލުމުގެ ދަށުގައި ކުރިން އޮތް މި ބިން ވަނީ މިދިޔަ ހަފްތާގެ ތެރޭގައި ސްޕޯޓްސް ކޯޕަރޭޝަނަށް ދިނުމަށް ނިންމައި އެއްބަސްވުމެއް ވެސް އެކުލަވާލާފަ އެވެ.
ރާއްޖެއެމްވީ އަށް މައުލޫމާތު ދެއްވަމުން އަބްދުއްރައްޒާގު ވިދާޅުވީ މުނިއުފާ ބިން ސްޕޯޓްސް ކޯޕަރޭޝަންގެ ބެލުމުގެ ދަށަށް ލިބިގެންދިޔަކަމީ އެތަށް ގޮތަކުން ކުޅިވަރަށް ލިބިގެންދިޔަ ކުރިއެރުމެއް ކަމަށާއި އެހެން ކަމުން އެންމެ ރަނގަޅު ގޮތުގައި ކުޅިވަރުތައް ކުރިއެރުވުމަށް އެ ބިން ބޭނުން ކުރެވިގެންދާނެ ކަމަށެވެ.
ގާތްގަނޑަކަށް 10،000 އަކަ ފުޓޫގެ އެ ބިމުގައި ކުޅިވަރު ކުޅޭނެ އިންޑޯ ކޯޓުތަކާއި އަދިވެސް އެހެނިހެން ކުޅިވަރު ކުޅޭނެ ވަސީލަތްތައް ހެދިގެންދާނެތޯ ސުވާލު ކުރުމުން ރައްޒާގު ވިދާޅުވީ އެތަނުގެ ބޭނުން އެންމެ ބޮޑަށް ކުރެވޭނީ ކުޅިވަރުތައް ކުރިއެރުވުމަށް ބޭނުންވާނެ ފައިސާ ހޯދުމަށް ތަންތަން ތައްޔާރު ކުރުމަށް ކަމަށެވެ.
"އަޅުގަނޑުމެންގެ ވިސްނުން ހުރީ އެ ބިމުގައި ބޮޑު އިމާރާތެއް ކޮށް ދިގު މުއްދަތަކަށް ގުދަން ނުވަތަ އޮފީސް ބޭނުމަށް އެކި ފަރާތްތަކަށް ތަންތަން ދޫކުރުން، އޭރުން ދާއިމީ ގޮތެއްގައި ކުޅިވަރުތައް ކުރިއެރުވުމަށް ފައިސާ ލިބިގެންދާނެ." ރައްޒާގު ވިދާޅުވި އެވެ.
ރައްޒާގު އިތުރަށް ވިދާޅުވީ ކޯޕަރޭޝަންގެ ވިސްނުން އަބަދުވެސް ހުންނަނީ ކުޅިވަރުތައް ތަރައްގީކޮށް ބައެއް ކުޅިވަރުތައް ކުޅޭނެ ރަނގަޅު ތަނެއް އެސޯސިއޭޝަންތަކާއި އަދިވެސް ކުޅިވަރުގައި ހަރަކާތްތެރިވާ ފަރާތްތަކަށް ފޮރުކޮށްދިނުން ކަމަށާއި އެހެން ކަމުން މުނިއުފާ ބިން ތަރައްގީ ކުރެވޭ އިރު، ކުޅިވަރުގެ ފެސިލިޓީތަކެއް އެތަނަށް އަންނާނެ ކަމަށެވެ.
މި މޭރުމުން ވާހަކަ ދައްކަވަމުން ރައްޒާގު ވިދާޅުވީ މިހާރުވެސް ސްޕޯޓްސް ކޯޕަރޭޝަނަށް ގާނޫނުން ލާޒިމުކުރާ ގޮތަށް ބައެއް ބިންތައް ނުލިބިވާ ކަމަށާއި އެހެން ނަމަވެސް އެއީ އެ ކޯޕަރޭޝަންގައި އެވަރުގެ ގާބިލިއްޔަތު ކަމެއް ނެތިގެން ނުލިބި ހުރި ބިންތަކެއް ކަމަށް ގަބޫލު ނުކުރައްވާ ކަމަށެވެ. އަދި ވީހާވެސް އަވަހަށް އެބިންތައް ލިބުމުން ކުޅިވަރު މިހާރު އޮތް ހަރުފަތަށް ވުރެ ދެގުނަ ބާރަށް އިތުރު ހަރުފަތަކަށް ގެންދިއުމަށް ބޮޑެތި މަސައްކަތްތަކެއް ކުރެވިގެންދާނެ ކަމަށް އެބޭފުޅާ ވިދާޅުވި އެވެ.
ސްޕޯޓްސް ކޯޕަރޭޝަނަށް ބޮޑު ބިމެއް ކުޅިވަރު ތަރައްގީ ކުރުމަށް ލިބިގެންދިޔައިރު ބައެއް ކުޅިވަރުތައް އެންމެ އެކަށީގެންވާ ގޮތަށް ކުރިއަށް ގެންދިއުމަށް ބިން ނުވަތަ ހޯލު ލިބިފައި ނުވާކަން ފާހަގަކޮށްލެވެ އެވެ. އެގޮތުން މިހާރު އެންމެ ބާރަށް ކުރިއަރަމުން އަންނަ އެއް ކުޅިވަރު ކަމުގައިވާ ހޭންޑްބޯޅަ ކުޅޭނެ ރަސްމީ ބިމެއް ހަމަޖެހިފައި ނުވާ އިރު، މުނިއުފާ ބިމުގައި މި ކުޅިވަރުގެ އިތުރުން އަދިވެސް ގިނަ ކުޅިވަރުތަކެއް ކުޅޭނެ އިންޑޯ ކޯޓެއް ތައްޔާރު ކުރުމަކީ ވެސް އެކަށީގެންވާ ކަމެކެވެ. ހަމަ އެއާއެކު ކެރަމް އާއި ޗެސް (ރާޒުވާ) ކުޅޭނެ ރަނގަޅު ފެންވަރުގެ ހޯލުތައް ނެތްއިރު، މި ކުޅިވަރުތަކަށް ވެސް ރަނގަޅު ފެންވަރުގެ ތަންތަން ހެދިގެންދާނެ ކަމަށް އުންމީދު ކުރެވެ އެވެ.
