ފުރަތަމަ ޑިވިޝަންގެ ކޮންމެ ކްލަބަކަށް ތިން މިލިއަން ރުފިޔާ ދިނުމަށް ވެފައިވާ ވައުދުގެ ދަށުން، ފުރަތަމަ ކުއާޓާގައި ކްލަބުތަކަށް އަންނަ މަހު ފައިސާ ދުކުރުމުގެ އިންތިޒާމު ހަމަޖެހިގެންދާނެ ކަމަށް އެފްއޭއެމުން ބުނެފި އެވެ.
އެފްއޭއެމުން ބުނީ މި ހަފުތާ ތަރޭގައި އަށް ކުންފުންޏަކާ އެކު، ހުރިހާ އެއްބަސްވުންތަކެއް ހަދާ ނިމެނޭ ކަމަށެވެ. ފައިސާ ދޫކުރުމުގެ ޓާމްސްތައް ފައިނަލް ކުރުމުގެ މަސައްކަތް ކުރިއަށްދާއިރު، އެ މަސައްކަތް މިހަފުތާ ތެރޭގައި ނިންމާ ލެވޭނެ ކަމަށް ވެސް އެފްއޭއެމުން ބުނެ އެވެ.
އެފްއޭއެމުން ބުނީ ކްލަބުތަކަށް ފައިސާ ދޫކުރުމަށް ހަމަޖެހިފައި ވަނީ ހަތަރު ކުއާޓާ އަށް ބަހާލައިގެން ކަމަށެވެ.
އެފްއޭއެމް އިން ބުނީ ކޮންމެ ކުއާޓާއެއްގައި ވެސް ފައިސާ ދޫކުރުމަށްފަހު، އަނެއް ކުއާޓާގެ ކުރިން، އެ ކުއާޓާއެއްގައި ދޫކުރި ފައިސާ ހޭދަކުރި ގޮތުގެ ތަފުސީލް ރިޕޯޓް އެފްއޭއެމް އަށް ހުށަހަޅަން ޖެހޭނެ ކަމަށެވެ. އެ ފައިސާއިން އެފްއޭއެމުން ކަނޑައަޅާފައިވާ ބައެއް ކަންކަމަށް ވަކި އަދަދެއް ހޭދަ ކުރުމަށް ހަމަޖެހިފައިވާ ކަމަށް ވެސް އެފްއޭއެމުން ބުނެ އެވެ.
ކްލަބުތަކަށް ފައިސާ ދޫކުރުމަށް ހަމަޖެހިފައިވަނީ ކުންފުނިތަކާއެކު ވެވޭ އެއްބަސްވުމާއެކު ގުރުލައިގެންނެވެ.
ދެ ވަނަ ޑިވިޝަންގެ ކުލަބުތަކަށާއި ތިން ވަނަ ޑިވިޝަންގެ ގަދަ ފަސް ކުލަބަށްވެސް ފައިދާ ދިނުމަކީ އެފްއޭއެމްގެ ރައީސް ބައްސާމް އަދީލް ޖަލީލްގެ ވައުދެކެވެ. އެ ދެ ޑިވިޝަނަށް ފައިސާ ދޫކުރަނީ އެފްއޭއެމްގެ ބަޖެޓުން ނެވެ.
