ރޮނާލްޑޯގެ އައް ނަސްރު ފީފާއިން ސަސްޕެންޑްކޮށްފި
ނުދައްކައި އޮތީ ކަންބޮޑުވާންޖެހޭ ވަރަށްވުރެ މާކުޑަ އަދަދެއް
އައް ނަސްރުން ކުޅުނު މެޗުގެ ތެރެއިން
ކްރިސްޓިއާނޯ ރޮނާލްޑޯ ކުޅެމުން އަންނަ ސައޫދީ އަރަބިއްޔާގެ އައް ނަސްރަށް ކުޅުންތެރިން ރަޖިސްޓަރީ ނުކުރެވޭ ގޮތަށް ފީފާއިން ސަސްޕެންޑްކޮށްފި އެވެ.
ދުނިޔާގެ ފުޓްބޯޅަ ޖަމިއްޔާއިން މި ކުލަބު ސަސްޕެންޑްކުރީ 2018 ވަނަ އަހަރު ލެސްޓާ ސިޓީއިން ގަތް ނައިޖީރިއާ ކުޅުންތެރިޔާ އަހުމަދު މޫސާގެ ޓްރާންސްފަރ ފީގެ ބައެއް ނުދީ ހުރުމުންނެވެ. އެއީ 390000 ޕައުންޑާއި މި މުއާލަތާ ގުޅުންހުރި ފައިސާއެއްވާ ނަމަ އެފައިސާއަކާއި ފައިސާ ދެއްކުން ލަސްވުމުން ވެފައިވާ ޖޫރިމަނާއަށްވާ ފައިސާ އެވެ. މިއީ މުއްސަނދި ކުލަބުން ކަންބޮޑުވާންޖެހޭ ވަރަށްވުރެ މާކުޑަ އަދަދެކެވެ.
އައް ނަސްރު ކުލަބަށް ފީފާއިން އަންގާފައިވަނީ މި ފައިސާ ދެއްކުމުން ނޫނީ ކުރިއަށް އޮތް ތިން ޓްރާންސްފާ ޕީރިއަޑްގައި ވެސް ކުޅުންތެރިން ނުޖެހޭނެ ކަމަށެވެ. މިއާއެކު ކުލަބުން ބުނެފައިވަނީ އައު ސީޒަނަށް ބޭނުންވާ ކުޅުންތެރިން ރަޖިސްޓަރީ ކުރުމަށް މި ފައިސާ ދައްކައި ހަލާސް ކުރާނެ ކަމަށެވެ.
އައް ނަސްރުއިން ރޮނާލްޑޯ ގަތީ 175 މިލިއަން ޕައުންޑް އަހަރަކު ލިބޭ ކޮންޓްރެކްޓެއް ދީފަ އެވެ. އަދި އިންޓަމިލާނަށް ކުޅުނު ކްރޮއޭޝިޔާ މިޑްފީލްޑަރު މާސެލޯ ބްރޮޒޮވިޗް ވަނީ އައު ސީޒަނަށް އެކުލަބަށް ގެންގޮސްފަ އެވެ. މީގެ އިތުރުން ޗެލްސީގެ ހާކިމް ޒިޔާޝް ވެސް ފެނުން ގާތީ މި ކުލަބުންނެވެ.
