ރައްޔިތުންނަށް ފަސޭހައިން ޚިދުމަތް ލިބޭ ގޮތަށް އިންތިޒާމްތައް ހަމަޖައްސަންޖެހޭ: މިނިސްޓަރު ފައްޔާޒު
10 ޖުލައި 2023 | ހޯމަ 09:29އަމަލުކުރަމުންދަނީ މުއައްޒަފުންނަށް ފަސޭހަވާ ގޮތަށް ނަމަވެސް މި ވިސްނުން ބަދަލުކުރަންޖެހޭ
އިކޮނޮމިކް މިނިސްޓަރު ފައްޔާޒު އިސްމާއީލް
ސަރުކާރުގެ އިދާރާތަކުގެ ޚިދުމަތްތައް ރައްޔިތުންނަށް ފަސޭހައިން ލިބޭ ގޮތަށް އިންތިޒާމްތައް ހަމަޖައްސަންޖެހޭ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
އާދިއްތަ ދުވަހު ވަންގަވް ލޯންޗުކުރުމަށް ބޭއްވި ޚާއްސަ ރަސްމިއްޔާތުގައި މިނިސްޓަރު ފައްޔާޒު ވިދާޅުވީ މިހާރު ސަރުކާރުގެ އިދާރާތަކުން އުސޫލުތަކާއި ގަވާއިދުތައް އެކުލަވާލައި، އަމަލުކުރަމުންދަނީ މުއައްޒަފުންނަށް ފަސޭހަވާ ގޮތަށް ކަމަށެވެ. ނަމަވެސް މި ވިސްނުން ބަދަލުކުރަންޖެހޭ ކަމަށް މިނިސްޓަރު ފައްޔާޒު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ޚިދުމަތް ހޯދުމުގައި ރައްޔިތުން ރިސްކް ނަގަން ނުޖެހޭ ގޮތަށް މަސައްކަތްތައް ކުރަންޖެހޭ ކަމަށެވެ. މި ވިސްނުން ވަރަށް ބޮޑަށް ސަރުކާރުގެ ތެރެއަށް ގެންނަން ޖެހޭކަން މިނިސްޓަރު ފައްޔާޒު ފާހަގަކުރެއްވިއެވެ.
މިނިސްޓަރު ފައްޔާޒު ވިދާޅުވީ ސަރުކާރުގެ ޚިދުމަތްތައް އަވަސްކޮށް ރަނގަޅުކުރަންޖެހޭ ވާހަކައަކީ ޒަމާނުއްސުރެ ރައްޔިތުން ދައްކަމުން އައި ވާހަކައެއް ކަމަށެވެ. އަދި މިސަރުކާރު އައުމުގެ ކުރިން ވެސް ސަރުކާރުގެ ޚިދުމަތްތައް ލަސްކަމުގެ ވާހަކަ ދައްކަމުންދިޔަ ކަމަށް މިނިސްޓަރު ފައްޔާޒު ވިދާޅުވިއެވެ. އަދި ވިދާޅުވީ ސަރުކާރުގެ ޚިދުމަތްތައް ތަރައްގީވެ ކުރިއަރައިގެން ނުދިޔަ ނަމަވެސް ރާއްޖޭގެ ރައްޔިތުންނާއި، ވިޔަފާރިވެރިންނަށް ވަރަށް ބޮޑަށް ކުރިއަރައިގެން ގޮސްފައިވާ ކަމަށެވެ.
މިނިސްޓަރު ފައްޔާޒު ވިދާޅުވީ ޚިދުމަތްތައް އަވަސްކުރުމުގެ ގޮތުން މުއައްޒަފުން އިތުރު ކުރުމަށް މަސައްކަތް ކުރި ކަމަށެވެ. ނަމަވެސް ސިވިލް ސަރވިސްގެ އުސޫލުތަކާއި، ގަވާއިދުތައް އޮންނަ ގޮތުން ވަރަށް ދުވަސް ނަގާ ކަމަށް މިނިސްޓަރު ފައްޔާޒު ވިދާޅުވިއެވެ. އަދި ވިދަޅުވީ މާލިއްޔަތު ގާނޫނާއި، ސިވިލް ސަރވިސް ގާނޫނާއި މިހުރިހާ ކަމެއްގެ ސަބަބުން ރައްޔިތުން ބޭނުންވާ ސްޕީޑްގައި ރައްޔިތުން ބޭނުންވާ ވަގުތުގައި އެ ޚިދުމަތް ދެވޭނެ ގާނޫނީ ގޮތެއް ސަރުކާރަކަށް ނޯންނަ ކަމަށެވެ. އެހެންކަމުން މި މައްސަލަތައް ހައްލުކުރުމަށް ސަރުކާރު ޑިޖިޓަލައިޒް ކުރުމުގެ ތެރެއިން މަސައްކަތްތައް ފެށި ކަަމަށް މިނިސްޓަރު ފައްޔާޒު ވިދާޅުވިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ޓްރޭޑް ނެޓް ކޯޕަރޭޝަން މެދުވެރިކޮށް ކުރިއަށްގެންދާ "ވަންގަވް" ޚިދުމަތަކީ އެއް ވިއުގައެއްގެ ދަށުން ސަރުކާރުގެ ހުރިހާ ޚިދުމަތެއް އޮންލައިންކޮށް ލިބޭ ގޮތަށް ތައްޔާރުކޮށްފައިވާ ޕްލެޓްފޯމެކެވެ. މި ޚިދުމަތް ކުރިއަށް އޮތްތަނުގައި ވަރަށް ބޮޑަށް ފުޅާވެގެންދާނެ ކަމަށާއި، މިއީރާއްޖޭގެ ކުރިއަށް އޮތް ޖީލަށް ލިބޭނެ ވަރަށް ބޮޑު ފަސޭހައެއް ކަމަށް މިނިސްޓަރު ފައްޔާޒު ވިދާޅުވިއެވެ.
