"މި އަހަރަކީ އަޅުގަނޑުމެން ބޮޑުތަނުން ފަހަތަށް ސޮއްސާލައިގެން ދިޔަ އަހަރެއް"
ސަރުކާރުން އަމަލުކުރަމުންދާ ގޮތުން މުހިންމު ސިނާއަތުތައް ހަލާކުވާ ކަމަށް އެ މަނިކުފާނު ވިދާޅުވި
ގިލަންވެރިކަމުގެ އެއް އަހަރު ކަވަރޭޖްގެ ތެރެއިން
މި އަހަރަކީ އަޅުގަނޑުމެން ބޮޑުތަނުން ފަހަތަށް ސޮއްސާލައިގެން ދިޔަ އަހަރެއް ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެެއްޖެއެވެ.
ފައްޔާޒް އެފަދައިން ވިދާޅުވީ ރާއްޖެޓީވީގެ ގިލަންވެރިކަމުގެ 1 އަހަރު ކަވަރޭޖްގައި ވާހަކަދައްކަވަމުންނެވެ. ފައްޔާޒް ވަނީ މި ސަރުކާރުން ވެރިކަމަށް އައިސް އަމަލުކުރަމުންދާ ގޮތުން ކުރީ ސަރުކާރުތަކުން ހޯދާފައިވާ ކުރިއެރުންތައް ވެސް ފަހަތަށް ސޮއްސާލާ ކަމަށް ސިފަކުރައްވާފައެވެ. އެގެ ތެރޭގައި އެމްޑީޕީ ނޫން އެހެން ފިކުރުތަކުގެ ސަރުކާރުތަކުން ހޯދި ކާމިޔާބީތައް ވެސް ގެއްލިގެން ހިގައިދާނެކަމުގެ ބިރު އޮތް ކަމަށް ފައްޔާޒް ވިދާޅުވިއެވެ. ފައްޔާޒް ވަނީ މި ސަރުކާރުން ކަންކަން ނިންމާ އިރު މަޝްވަރާ ނުކުރާ ކަމަށާއި މިއީ ޚުދުމުހުތާރު ސަރުކާރެއް ކަމަށް ވިދާޅުވެފައެވެ. ސަރުކާރުގެ ހިންގުންތެެރިކަމެއް ނެތުމުގެ ސަބަބުން 10 ވަރަކަށް އަހަރު ގެއްލިގެންދާ ކަމަށް ފައްޔާޒް ވަނީ ވިދާޅުވެފައެވެ. ފައްޔާޒް ވަނީ ސަރުކާރުގެ އިގްތިސާދީ ސިޔާސަތުތަކަށް ވަރަށް ބޮޑަށް ފާޑު ވިދާޅުވެފައެވެ. ސަރުކާރުގެ ވިސްނުމަކީ ރައްޔިތުން ފެލާލުން ކަމަށް ފައްޔާޒް ވިދާޅުވިއެވެ.
ފައްޔާޒް ވަނީ މި ސަރުކާރުން އިގްތިޞާދީ ގޮތުން އިސްރާފުކުރަމުންދާ ކަމަށް ވެސް ވިދާޅުވެފައެވެ. އެގޮތުން ސަރުކާރަށް ކަންކަން ހިންގަން ނޭނގޭ ކަމަށާއި ރައްޔިތުންނަށް ނިކަމެތިވާ ގޮތަށް ސަރުކާރުން އަމަލުކުރަމުންދާ ކަމަށް ފައްޔާޒް ވިދާޅުވިއެވެ. އަދި މި ސަރުކާރުން ރައްޔިތުންނަށް ހެޔޮ ނޭދޭ ކަމަށް ފައްޔާޒް ވިދާޅުވިއެވެ. އަދި ކުދި ވިޔަފާރިތައް ވެސް މުޅިން ފުނޑިފައިވާ ކަމަށް ފައްޔާޒް ވަނީ ވިދާޅުވެފައެވެ. ސަރުކާރުން އަމަލުކުރަމުންދާ ގޮތުން މުހިންމު ސިނާއަތުތައް ހަލާކުވާ ކަމަށް އެ މަނިކުފާނު ވިދާޅުވިއެވެ.
