މި މަސައްކަތް ފަށައިގަތުމުން ލިބޭނެ ފައިދާތައް ވަރަށް ގިނަ
އިކޮނޮމިކް މިނިސްޓަރު ފައްޔާޒު އިސްމާއީލް ވާހަކަފުޅު ދައްކަވަނީ
އިހަވަންދިއްޕޮޅުގައި ބަންކަރިންގެ ޚިދުމަތް ފެށުމުން އިގްތިސާދީ ބޮޑެތި ބަދަލުތަކެއް އަންނާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
މިމަޝްރޫއު ފެށުމަށް އެއްބަސްވުމުގައި ސޮއިކުރެއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ފައްޔާޒު ވިދާޅުވީ ރާއްޖޭގެ ސަރަހައްދުން ފައިދާ ނަގާ ވާހަކަ އަބަދުވެސް ދައްކާ ކަމަށާއި، އެއްވެސް ސަރުކާރަކުން މިމަސައްކަތް ކޮށްފައިނުވާ ކަމަށެވެ. ނަމަވެސް މިސަރުކާރުގައި މިމަސައްކަތް ކުރުމަށް ނިންމާފައިވާކަން ފައްޔާޒު ފާހަގަކުރެއްވިއެވެ.
މިނިސްޓަރު ފައްޔާޒު ވިދާޅުވީ ރާއްޖޭގައި މި މަސައްކަތް ފަށައިގަތުމުން ލިބޭނެ ފައިދާތައް ވަރަށް ގިނަ ކަމަށެވެ. އެގޮތުން މި މަޝްރޫއާއެކު އިގްތިސާދީ ގޮތުން ބޮޑެތި ބަދަލުތަކެއް އަންނާނެ ކަމަށް މިނިސްޓަރު ފައްޔާޒު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ސްޓްރެޓިކް ލަނޑުދަނޑިތަކެއް ހާސިލްކުރުމަށް ކުރިއަށް ގެންދިޔަ މަސައްކަތްތަކުގެ ނަތީޖާ ފޮނި ކަމަށެވެ. އަދި މި ޕޯޓު ތަރައްގީގެ މަޝްރޫއު ފެށުމާއެކު ޒަމާންތަކަށް ވަންދެން އުތުރަށް ބޮޑެތި ބަދަލުތަކެއް އަންނާނެ ކަމަށް މިނިސްޓަރު ފައްޔާޒު ވިދާޅުވިއެވެ. އަމާޒަކީ މި ސިނާއަތަށް ފްރައިވެޓް ވިޔަފާރިތަކުގެ ބައިވެރިވުން ލިބުން ކަމަށް މިނިސްޓަރު ފައްޔާޒު ވިދާޅުވިއެވެ.
