އަޙުލާގު ރަނގަޅު ކުރުމަށް އިންޑިޔާ ކޯޗަށް އެ ގައުމުން ނަސޭހަތްތެރި ވެއްޖެ

ސާފް ޗެމްޕިއަންޝިޕް ފުޓްބޯޅަ މުބާރާތުގައި އިންޑިޔާ ކުޅުނު ތިން މެޗުގެ ތެރެއިން ދެ މެޗެއްގައި ކޯޗު އިއަގޯ ސްޓިމަކް އަށް ރެފްރީން ކާޑު ދައްކާފައިވާތީވެ، އޭނާގެ އަމަލުތައް އިމުން ބޭރުނުކުރުމަށް އިންޑިޔާ ފުޓްބޯޅަ ފެޑަރޭޝަނުން ނަސޭހަތްތެރިވެއްޖެ އެވެ.

ޕާކިސްތާނުގެ މެޗުގައި ދެއްކި ރަތްކާޑުގެ ސަބަބުން ކޯޗަށް ޖެހިގެން އައި ނޭޕާލް މެޗުގައި ބެންޗުގައި ނީނދެވުނެވެ. އަދި ގްރޫޕް ސްޓޭޖުގެ ފަހު މެޗުގައި ކުވޭތު މެޗުގައި ދެއްކި ރަތްކާޑުގެ ސަބަބުން މިއަދު ކުޅޭ ސެމީ ފައިނަލް މެޗާއި ފައިނަލް މެޗުގައި އޭނާ އަށް ބެންޗުގައި ނީނދެވޭނެ އެވެ. އެއީ ކުވޭތު މެޗަށް ފަހު ކުރިއަށް އޮތް ދެ މެޗަށް އޭނާ ސަސްޕެންޑްކޮށްފައިވާތީ އެވެ.

އިންޑިޔާގެ ފުޓްބޯޅަ ފެޑަރޭޝަނުގެ ސެކްރެޓަރީ ޖެނެރަލް ސާޖީ ޕްރަބާކަރަން ބުނީ އެ ގައުމުން އެންމެ މުހިންމުކަމެއްގެ ގޮތުގައި ބަލަނީ އަންނަ އަހަރު އޮންނަ އޭޝިއަން ކަޕް ކަމަށެވެ. އަދި އެ މުބާރާތުގައި ކޯޗުގެ ފަރާތުން މިފަދަ ކަމެއް ދިމާވެދާނެތީ ކަންބޮޑުވާ ކަމަށެވެ. އަދި އެ މުބާރާތުގެ މެޗެއްގައި ކޯޗު ބެންޗުން ފޮނުވާލައިފިނަމަ އެކަންވާނީ ފޫނުބެއްދޭ ފަދަ ގެއްލުމަކަށް ކަމަށެވެ. މިހެންވެ ކޯޗުގެ އަމަލުތައް ރަނގަޅު ކުރުމަށް އޭނާ އަށް ނަސޭހަތްދީފައިވާ ކަމަށެވެ.

އިންޑިޔާ ފެޑަރޭޝަނުން ބުނީ ސާފް ޗެމްޕިއަންޝިޕުގެ ކުރިން ކުޅުނު ބައެއް މެޗުތަކުގައި ވެސް އޭޝިއަން ކަޕަށް ތައްޔާރުވާން ކުރާ މަސައްކަތުގައި ޓީމުގައި ރަނގަޅުކުރަންވީ އެއް ކަމަކީ ކޯޗުގެ އަމަލުތައްކަން ފާހަގަ ކުރެވިފައިވާ ކަމަށެވެ.

އޭނާ އަދި ބުނީ 1998ގެ ވޯލްޑްކަޕުގެ ތިން ވަނަ ހޯދި ކްރޮއޭޝިޔާގެ ޓީމުގައި ކުޅުނު ސްޓިމަކް އަކީ މަތީ ފަންތީގައި ކުޅެފައިހުރި ކުޅުންތެރިއަކަށްވުމުން އިރުއިރުކޮޅާ ބެންޗުން ފޮނުވާލަން ޖެހުން ފަދަ ކަންކަން ނުކުރަން އެނގެންވާނެ ކަމަށެވެ.

އިންޑިޔާގެ އެހެން އޮފިޝަލަކު ނަން ހާމަނުކޮށް ބުނެފައިވަނީ ރަތްކާޑު ދެއްކުމުން ކޯޗު ޓުވިޓާގައި އޭނާގެ އަމަލުތައް ދިފާއުކޮށް ދެއްކި ވާހަކަތަކުން އިންޑިޔާ ފެޑަރޭޝަނުން ބަލައިނުގަންނަ ކަމަށެވެ. އަދި އޭޝިއަން ކަޕުގެ ކުރިން ކޯޗުގެ މިކަހަލަ ކަންކަން އެނގުމަކީ އެކަމަށް ފާރަވެރިވާން ލިބޭ ފުރުސަތެއް ކަމަށް ވެސް އިންޑިޔާ ފުޓްބޯޅަ ފެޑަރޭޝަނުން ބުނެ އެވެ.