އިންޑިޔާގެ ގައުމީ ފުޓްބޯޅަ ޓީމުގެ ކޯޗު އިއަގޯ ސްޓިމަކް ސާފް ޗެމްޕިއަންޝިޕުގެ ސެމީ ފައިނަލާއި ފައިނަލް މެޗަށް ސަސްޕެންޑްކޮށްފި އެވެ.

ސައުތު އޭޝިއަން ފުޓްބޯޅަ ފެޑަރޭޝަން (ސާފް) އިން މި ގޮތަށް ނިންމީ މުބާރާތުގައި ދެ ވަނަ ފަހަރަށް ރަތްކާޑު ދައްކަން ޖެހުމުންނެވެ. މިއާއެކު 500 ޑޮލަރުން ކޯޗު ވަނީ ޖޫރިމަނާ ވެސް ކޮށްފަ އެވެ.

އިންޑިޔާގައި މިދިޔަ މަހުގެ 21ން އަންނަ އަންގާޜަ ދުވަހުގެ ނިޔަލަށް ކުރިއަށްދާ މުބާރާތުގެ ފައިނަލަށް އިންޑިޔާ އަށް ދެވުނަސް މި އަދަބުގެ ސަބަބުން ކޯޗަށް ޓީމަށް އިރުޝާދުދޭން ޖެހޭނީ ހަމައެކަނި ޓްރޭނިންތަކުގަ އެވެ.

ކްރޮއޭޝިއާގެ ކުރީގެ ކުޅުންތެރިޔާ ސްޓިމަކް އަށް ފުރަތަމަ ރަތްކާޑު ދެއްކީ ޕާކިސްތާނާ ދެކޮޅަށް އިންޑިޔާ ކުޅުނު މުބާރާތުގެ ފުރަތަމަ މެޗުގަ އެވެ. އެ މެޗުގައި ދެއްކި ރަތްކާޑުގެ ސަބަބުން ޖެހިގެން އައި ނޭޕާލް މެޗަށް އޭނާ ސަސްޕެންޑްވި އެވެ. ދެ ވަނަ ފަހަރަށް ރަތްކާޑު ދެއްކީ މުބާރާތުގައި އިންޑިޔާ ކުޅުނު ތިން ވަނަ މެޗުކަމަށްވާ ކުވޭތު މެޗުގަ އެވެ. ސެމީ އާއި ފައިނަލަށް އޭނާ ސަސްޕެންޑްކުރީ ތަކުރާރުކޮށް ރަތްކާޑު ދައްކައި ބެންޗުން ފޮނުވާލަން ޖެހުމުންނެވެ.

ކޯޗު ސަސްޕެންޑްކުރިއިރު އިންޑިޔާ ފެޑަރޭޝަނުން ވެސް ވަނީ އޭނާ އަށް މިއަމަލުތަކާ ދުރުހެލިވުމަށް ނަސޭހަތްތެރި ވެފަ އެވެ. އިންޑިޔާ ފެޑަރޭޝަންގެ ޖެނެރަލް ސެކްރެޓަރީގެ ވާހަކަތައް ހުރި ގޮތަށް ބަލާއިރު ކޯޗު މިގޮތަށް ބެންޗުން ފޮނުވާލަން ޖެހޭނަމަ އޭނާ އަށް ވަޒީފާ ގެއްލުމުގެ ބިރު އޮތްކަން ދޭހަވެ އެވެ.

ކޯޗު ބެންޗުން ފޮނުވާލުމުން އިންޑިޔާގެ އެސިސްޓެންޓް ކޯޗު ވަނީ ކުވޭތު މެޗަށް ފަހު ރެފްރީންނަށް ފާޑުކިޔާފަ އެވެ.