ސާފް ޗެމްޕިއަންޝިޕް ގްރޫޕް ސްޓޭޖުން ކެޓި ނަމަވެސް ސެމީ ފައިނަލް ދެ މެޗުގައި ކުޅިބަލަން ތިބެފައި ގައުމީ ފުޓްބޯޅަ ޓީމު ހޯމަ ދުވަހު މާލެ އަންނަން ނިންމައިފި އެވެ.

ބުދަ ދުވަހު މުބާރާތުން ރާއްޖެ ކެޓިއިރު، ކުވޭތާއި ބަނގްލަދޭޝް އަދި މުބާރާތުގެ އެންމެ ކާމިޔާބު ޓީމު ކަމަށްވާ ދިފާއީ ޗެމްޕިއަން އިންޑިޔާ އާއި ލެބަނަން ބައްދަލުކުރާ ސެމީ ފައިނަލް މެޗުތައް އޮންނާނީ ހޮނިހިރު ދުވަހު އެވެ. މި ދެ މެޗަށްފަހު ފައިނަލް މެޗުގެ އެއް ދުވަސް ކުރިން ހޯމަ ދުވަހު ގައުމީ ޓީމު މާލެ އަންނާނެކަން މެނޭޖަރު އަބްދުﷲ ޝިބާއު ވަނީ ޔަގީންކޮށްދީފަ އެވެ.

މި މަހުގެ 21 އިން އަންނަ މަހުގެ 4 އަށް އިންޑިޔާގެ ބެންގަލޫރުގައި ކުޅޭ ސާފް ޗެމްޕިއަންޝިޕުން ރާއްޖެ ކެޓީ ގްރޫޕް ސްޓޭޖުންނެވެ. މިއީ މުބާރާތުގެ ސެމީ ފައިނަލަށް ނުގޮސް ރާއްޖެ ކެޓި ފުރަތަމަ ފަހަރެވެ. ރާއްޖޭގެ އެންމެ ބޮޑު ނާކާމިޔާބީއަކަށް މި މުބާރާތުގައިވީ 20 އަހަރު ތެރޭގައި ފުރަތަމަ ފަހަރަށް ބަނގްލަދޭޝް އަތުން ބަލިވުމެވެ.

ކުޅުނު ތިން މެޗުގެ ތެރެއިން ބަނގްލަދޭޝް އާއި ލެބަނަން އަތުން ރާއްޖެ ބަލިވިއިރު މޮޅުވީ ބޫޓާން އަތުން އެކަންޏެވެ. މައްސަލަތަކެއްގެ ތެރޭގައި އޮތް އެފްއޭއެމުގެ ހިންގުން ދޯދިޔާވުމުގެ ސަބަބުން ގައުމީ ޓީމު މި ފަހަރުގެ ސާފް ޗެމްޕިއަންޝިޕަށް ޖަޕާނުގައި ކޭމްޕް ކުރި ނަމަވެސް އެކަށީގެންވާ ގޮތެއްގައި ތައްޔާރެއްނުވެ އެވެ.

މުބާރާތުގެ ސެމީ ފައިނަލުގައި މެޗުތަކަށްފަހު ފައިނަލް މެޗު އޮންނާނީ އަންގާރަ ދުވަހު އެވެ.