ޗެތުރީ ދުނިޔޭގެ ހަތަރަކަށް، އޭޝިޔާގެ ދެ ވަނަ

ސާފް ޗެމްޕިއަންޝިޕް ފުޓްބޯޅަ މުބާރާތުގައި ޕާކިސްތާން ކޮޅަށް އިއްޔެ ހެދި ހެޓްރިކާއެކު އޭޝިޔާގެ ފުޓްބޯޅައިގައި އެންމެ ގިނަ ގޯލު ޖެހި ދެ ވަނަ ކުޅުންތެރިއަކަށް އިންޑިޔާގެ ކެޕްޓަން ސުނިލް ޗެތުރީ ވެއްޖެ އެވެ.

އަދި މި ތިން ގޯލާއެކު އޭނާ ވެފައިވަނީ ދުނިޔޭގެ ފުޓްބޯޅައިގައި ހަތަރުވަނަ އަށް އެންމެ ގިނަ ގޯލު ޖެހި ކުޅުންތެރިޔާ އަށެވެ.

ދުނިޔޭގެ ފުޓްބޯޅައިގައި އެންމެ ގިނަ ގޯލު ޖަހާފައިވަނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. އެއީ 200 މެޗުން 123 ގޯލެވެ. ދެ ވަނާގައިވަނީ އޭޝިޔާގެ އެއްވަނަ އިރާނުގެ އަލީ ދާއީ އެވެ. އޭނާ 109 ގޯލު ޖަހާފައިވަނީ 148 މެޗުންނެވެ. ތިން ވަނާގައިވަނީ އާޖެންޓީނާގެ ކެޕްޓަން ލަޔޮނަލް މެސީ އެވެ. 173 މެޗުން އޭނާ ޖަހާފައިވަނީ 103 ގޯލެވެ. ސުނިލް ޗެތުރީ ހަތަރު ވަނަ އަށް އަންނަނީ 138 މެޗުން 90 ގޯލު ޖަހައިގެންނެވެ.

ގައުމީ ޓީމަށް 18 އަހަރު ކުޅެފައިވާ ޗެތުރީ ވަނީ ސާފް ޗެމްޕިއަންޝިޕް ތިން ފަހަރު ކާމިޔާބުކޮށްފަ އެވެ. އަދި އެ މުބާރާތުގެ މޮޅު ކުޅުންތެރިޔާގެ މަގާމު ތިން ފަހަރު ހޯދައި ރަންބޫޓު ދެ ފަހަރު ހޯދާފަ އެވެ.