އިންޑިޔާގެ ކެޕްޓަން، ލީޑަރު އަދި ލެޖެންޑް ޗެތްރީ ކުޅުން ހުއްޓާލައިފި

އިންޑިޔާގެ ގައުމީ ފުޓްބޯޅަ ކެޕްޓަން ސުނިލް ޗެތްރީ ފުޓްބޯޅަ ކުޅުން ހުއްޓާލަން ނިންމައި އެކަން އިއުލާނުކޮށްފި އެވެ.

ކާމިޔާބު 19 އަހަރަށް ފަހު 39 އަހަރުގެ ފޯވަޑް، އޭނާގެ ބޫޓު ބާލަން ނިންމައި، ސަޕޯޓަރުންނަށް އަލްވަދާއު ކިއުން އޮންނާނީ އަންނަ މަހު ވޯލްޑްކަޕް ކޮލިފައިންގައި ކުވޭތާއެކު އިންޑިޔާ މެޗަށް ފަހު އެވެ.

ކްރިކެޓަށް މޮޔަވާ އިންޑިޔާގެ މީހުންގެ މެދުގައި ޗެތްރީ އަކީ ކްރިކެޓް ލެޖެންޑުން ފަދަ ބަތަލެކެވެ. ފުޓްބޯޅަ ކުޅުންތެރިންގެ ތެރެއިން އޭނާ އަކީ އިންޑިޔާގައި ކްރިކެޓް ލެޖެންޑުން ފަދަ މަގުބޫލުކަމެއް ހޯދި ހަމައެކަނި ފުޓްބޯޅަ ކުޅުންތެރިޔާ އެވެ. އޭނާ އަކީ އިންޑިޔާގެ ގައުމީ ޓީމަށް އެންމެ ގިނަ ގޯލު ޖަހައިދިން ފޯވަޑެވެ. 150 މެޗުން އޭނާ ވަނީ 94 ގޯލު ޖަހައިދީފަ އެވެ. ކްރިސްޓިއާނޯ ރޮނާލްޑޯ އާއި ލަޔޮނަލް މެސީގެ ފަހަތުން ގައުމީ ޓީމަކަށް ހަތަރު ވަނަ އަށް އެންމެ ގިނަ ގޯލު ޖަހައިދިން ކުޅުންތެރިއަކީ ވެސް އޭނާ އެވެ.

ކުޅުން ހުއްޓާލަން އިއުލާނުކުރުން 10 މިނެޓުގެ ވީޑިއޯއެއް މެދުވެރިކޮށް އިއުލާނު ކުރަމުން ޗެތްރީ ބުނީ ގައުމީ ޓީމު ތަމްސީލު ކުރުމަށްވުރެ ބޮޑު އުފަލެއް ކުޅުންތެރިއަކަށް ނުލިބޭނެ ކަމަށެވެ. ނަމަވެސް ކުޅެން ކިތަންމެ ބޭނުންވި ނަމަވެސް އުމުރު އެކަމަށް ތަންދޭންޖެހޭ ކަމަށެވެ.

ޗެތްރީ ކުޅުން ހުއްޓާލަން އިއުލާނު ކުރުމުން އިންޑިޔާގެ ފުޓްބޯޅަ ފެޑަރޭޝަނުން ބުނީ ދަނޑު ބޭރުގަ އާއި ދަނޑު މަތީގައި ވެސް އެނާގެ ހަނދާންތައް އަބަދުވެސް ދިރި ހުންނާނެ ކަމަށެވެ.

މިދިޔަ 18 އަހަރުގައި ޗެތްރީ ވަނީ އިންޑިޔާގެ ފުޓްބޯޅައިގެ ގިނަ މަގާމުތަކެއް ހޯދައިފަ އެވެ. މި ސަރަހައްދުގައި ވެސް އޭނާ ވަރުގެ ކުޅުންތެރިއެއް ނެތްކަން ހަމައެކަނި ސާފް ޗެމްޕިއަންޝިޕުން އެކަނި ވެސް އެނގެ އެވެ. މޮޅު ކުޅުންތެރިޔާގެ ހަތަރު ފަހަރު ހޯދައި ރަންބޫޓު ތިން ފަހަރު ހޯދި އެވެ. ހަ މުބާރާތުގައި ކުޅެ ހަތަރު ފަހަރު އިންޑިޔާ އަށް ޗެމްޕިއަންކަން ހޯދައިދިނެވެ. އިންޑިޔާގެ މޮޅު ކުޅުންތެރިޔާގެ މަގާމު ހަތް ފަހަރު ހޯދި އެވެ. އިންޑިޔާގެ ސުޕަ ލީގާއި އައި ލީގުގެ އެންމެ މޮޅު ކުޅުންތެރިޔާގެ މަގާމާއި ރަންބޫޓު ވެސް އެތައް ފަހަރަކު ހޯދި އެވެ. އިންޑިޔާގެ ކުޅިވަރު ޝަހުސިއްޔަތުންނަށް ދޭ ރަތްނާ އެވޯޑް ހާސިލްކުރި ފުޓްބޯޅަ ކުޅުންތެރިއަކީ ވެސް އޭނާ އެވެ.

ޗެތްރީ ކުޅުން ހުއްޓާލީ މައިގަނޑު ސަބަބަކީ ގައުމީ ޓީމުގެ ފުރަތަމަ 11އިން ޖާގަ ލިބުނު ނަމަވެސް އުމުރުން ދުވަސް އޭނާގެ ކުލަބު ބެންގަލޫރު އެފްސީގެ ފުރަތަމަ 11 އިން ޖާގަ ނުލިބެން ފެށުމުންނެވެ. ނަމަވެސް އޭނާ ވަނީ 211 މެޗުން 82 ގޯލު ޖަހައިދީފަ އެވެ. ބެންގަލޫރުގެ އިތުރުން އޭނާ ވަނީ މޯހަން ބަގާން އާއި އީސްޓް ބެންގާލް އަދި ޖޭސީޓީ، ޑެމްޕޯ، ޗާޗިލް ބްރަދާސް އާއި މުމްބާއީ ސިޓީ އަށް ވެސް ކުޅެދީފަ އެވެ. ކުލަބު ކެރިއަރުގައި 550 މެޗުން 253 ގޯލު ވަނީ ޖަހައިދީފަ އެވެ.

އޭނާ ބުނީ ކުވޭތާ ދެކޮޅަށް ކުޅޭ މެޗު ކާމިޔާބު ކުރަން އެންމެން ގުޅިގެން މަސައްކަތް ކުރަންވީ ކަމަށެވެ.