ރަޝިޔާއިން ޖުލައި މަހު ބެލަރޫސްގައި ޓެކްޓިކަލް ނިއުކްލިއާ ހަތިޔާރު ބަހައްޓާނެ: ޕޫޓިން

ރަޝިޔާއިން ޖުލައި މަހު ބެލަރޫސްގައި ޓެކްޓިކަލް ނިއުކްލިއާ ހަތިޔާރު ބަހައްޓާނެ ކަމަށް ރައީސް ވްލަޑިމިއާ ޕޫޓިން ވިދާޅުވެއްޖެއެވެ.

ރަޝިއާއިން ބެލަރޫސްގައި ޓެކްޓިކަލް ނިއުކްލިއާ ހަތިޔާރު ބަހައްޓަން ފަށާނީ ޖުލައި 7ން 8ށް ފެސިލިޓީތައް ތައްޔާރުކުރުމަށްފަހު ކަމަށް ރައީސް ވްލަޑިމިއާ ޕޫޓިން ހުކުރު ދުވަހު ސޯޗީގައި ބޭއްވެވި ބައްދަލުވުމެއްގައި ބެލަރޫސްގެ ރައީސް އެލެގްޒެންޑާ ލުކަޝެންކޯއާ ބައްދަލުކުރައްވާ ވިދާޅުވެފައިވެއެވެ.

ރަޝިއާގެ ބާރުގެ ދަށުގައި ދެމިއޮންނާނެ މޮސްކޯގެ އެންމެ ގާތް އެކުވެރިޔާގެ ސަރަހައްދުގައި ރަޝިއާގެ އެއްގަމުގައި އުފައްދާ ކުރު ރާސްތާގެ ނިއުކްލިއާ މިސައިލްތައް ބެހެއްޓުމުގެ ޕްލޭނަށް ދެބޭފުޅުން މީގެ ކުރިން ވަނީ އެއްބަސްވެވަޑައިގަންނަވާފައެވެ.

ޕޫޓިން މި ހަނގުރާމަ ސިފަކުރައްވަނީ ރަޝިޔާގެ އަމިއްލަ ދިރުމަށް ކުރާ ހަނގުރާމައެއްގެ ގޮތުގައެވެ. އޭނާ ވަނީ ރަޝިޔާ ފަހަތަށް ނުޖެހޭނެ ކަމުގެ އިންޒާރު ހުޅަނގަށް ދީފައެވެ.

ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވީ ރަޝިޔާގެ އެންމެ ފަހު ސިފައިންގެ މީހާ އެ ގައުމުން ނެރެގެން ނޫނީ ޔޫކްރެއިން އަށް އަރާމެއް ނޯންނާނެ ކަމަށެވެ.

ޕޫޓިންގެ ނިއުކްލިއާ ފިޔަވަޅަކީ އެމެރިކާއާއި ޔޫރަޕްގައި ހަރަކާތްތެރިވާ ނޭޓޯގެ ބައިވެރިންނާއި ހަނގުރާމައިގައި ނިއުކްލިއާ ހަތިޔާރު ބޭނުން ނުކުރުމަށް ތަކުރާރުކޮށް އިންޒާރުދެމުން އަންނަ ޗައިނާއިން ވެސް ވަރަށް ގާތުން ބަލަމުން އަންނަ ފިޔަވަޅެކެވެ.

1991 ވަނަ އަހަރު ސޯވިއެޓް ޔޫނިއަން ވެއްޓުމަށްފަހު އެމެރިކާ އާއި ރަޝިއާއިން ވަނީ ޔޫކްރެއިން، ކަޒަކިސްތާން އަދި ބެލަރޫސް ފަދަ އަލަށް މިނިވަންވި ޖުމްހޫރިއްޔަތްތަކުގައި ވެސް ބަހައްޓާފައި ހުރި ބޮޑު ސޯވިއެޓް ނިއުކްލިއާ ހަތިޔާރު ރަޝިއާއަށް އަނބުރާ ދިނުމަށް ބުރަ މަސައްކަތްތަކެއް ކޮށްފައެވެ.

1945 ވަނަ އަހަރު ޖަޕާނުގެ ސިޓީތައް ކަމަށްވާ ހިރޯޝީމާ އާއި ނާގަސާކީއަށް ދިން ހަމަލާތަކުގައި މިހާތަނަށް ނިއުކްލިއާ ހަތިޔާރު ބޭނުންކޮށްފައިވަނީ އެމެރިކާއިން އެކަންޏެވެ.