ރަޝިޔާ އާއި ޔުކްރެއިންއާ ދެެމެދު ހިނގަމުން އަންނަ ހަނގުރާމަ ނިމުމަކަށް ގެނެސް، ސުލްޙަވެރިކަން ޤާއިމު ކުރުމުގެ މަޝްވަރާތަަކަށް ޔުކްރެއިން އިން ރަޝިޔާ އަށް ހުށަހަޅައިފި އެވެ. 

އެކަން ހާމަ ކުރައްވާފައި ވަނީ ޔުކްރެއިންގެ ރައީސް ވުލެޑިމިއަރ ޒެލެންސްކީ އެވެ. ޒެލެެންސްކީ ވިދާޅުވެފައި ވަނީ ސުލްޙައިގެ އައު މަޝްވަރާތަކެއް ފެށުމަށް އެ ޤައުމުން ރަޝިޔާ އަށް ހުށަހަޅާފައިވާ ކަމަށެވެ.

މީގެ ކުރިން ވެސް ދެ ޤައުމުގެ ދެ މެދުގައި ވަނީ މަޝްވަރާތައް ކުރިއަށް ގެންގޮސްފަ އެވެ. ތުރުކީގެ ވެރި ރަށް އިސްތަންބީލުގައި މަޝްވަރާތަކުގެ ދެ ބުރެއް ކުރިއަށް ގެންދިޔަ އިރު، ހަނގުރާމައިގެ ރަހީނުން ދޫކޮށްލުމާއި، މަރުވެފައިވާ ސިފައިންގެ ހަށިގަނޑުތައް އަނބުރާ ގެންދިޔުމަށް ވަނީ އެއްބަސްވެފަ އެވެ. 

ނަމަވެސް، ހަނގުރާމަ ހުއްޓާލުމުގެ އެއްބަސްވުމަކަށް ވާސިލު ނުވެވި، ދެ ޤައުމުގެ ދެ މެދުގައި ވަނީ އިތުރު ނުތަނަވަސްކަމެއް އުފެދިފަ އެވެ. އަދި މިދިޔަ ޖޫން މަހުގެ ތެރޭގައި ވަނީ އެ މަޝްވަރާތަކަށް ވެސް ހުއްޓުމެއް އައިސްފަ އެވެ. އެހެންކަމުން މިއީ މަޝްވަރާތައް ހުއްޓުނު ފަހުން، އަލުން މަޝްވަރާތައް ފެށުމަށް ހުށަހަޅާފައިވާ ފުރަތަމަ ފަހަރެވެ.

އެކަމާ ގުޅޭ ގޮތުން ވާހަކަ ދައްކަވަމުން ޒެލެންސްކީ ވިދާޅުވެފައި ވަނީ ޔުކްރެއިންގެ ސެކިއުރިޓީ ކައުންސިލްގެ ސެކްރެޓަރީ ވަނީ އަންނަ ހަފުތާގެ ތެރޭގައި ރަޝިޔާ އާއެކު ބައްދަލުވުމެއް ބޭއްވުމަށް ހުށަހަޅާފައި ކަމަށެވެ. އަދި އެ މަޝްވަރާތަކުގެ ދުވެލި އަވަސް ކުރަން ޖެހޭ ކަމަށް ވެސް ޒެލެންސްކީ ވަނީ ވިދާޅުވެފަ އެވެ. 

ހަނގުރާާމަ ހުއްޓާލުމަށް ރަޝިޔާ އިން ވަނީ މި ފަހުން ހަރުކަށި އައު ޝަރުތު ތަކެއް ކޮށްފަ އެވެ. އޭގެ ތެރޭގައި ޔުކްރެއިންގެ އިތުރު ސަރަހައްދުތަކެއް ދޫކޮށްލުމާއި، އެ ޤައުމަށް ދެމުން އަންނަ ހުރިހާ ބާވަތެއްގެ އަސްކަރީ ހަތިޔާރުގެ އެހީތެރިކަން ދިނުން ހުއްޓާލުން ހިމެނެ އެވެ. ނަމަވެސް ޔުކްރެއިން އިން ވަނީ އެ ޝަރުތުތައް ބަލައި ނުގަންނާނެ ކަމަށް ބުނެފަ އެވެ. އަދި ހަނގުރާާމަ ހުއްޓާލަން ވާނީ އެއްްވެސް ޝަރުތެއް ނެތި ކަމަށް ބުނެފައިވެ އެވެ. 

ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕް ވަނީ ރަޝިޔާ އަށް 50 ދުވަހުގެ މުއްދަތެއް ދީފަ އެވެ. އެ މުއްދަތުގެ ތެރޭގައި ހަނގުރާމަ ހުއްޓާ ނުލައިފި ނަމަ، ރަޝިޔާއާ ދެކޮޅަށް ދަތި ކުރުމުގެ ފިޔަވަޅުތަކެއް އަޅުއްވާނެ ކަމަށް ވެސް ޓްރަމްޕް ވިދާޅުވެފަ އެވެ. އެއާއެކު ރަޝިޔާ އިން ވަނީ، އެ ޤައުމުން މަޝްވަރާތަކަށް ތައްޔާރު ކަމަށް ހާމަކޮށްފަ އެވެ. 

ނޭޓޯގެ އެހީތެރިކަމާ އެކު ޔުކްރެއިން އަށް އިތުރު އެހީ ފޯރުކޮށްދިނުމުގެ މަސައްކަތް އެމެރިކާ އިން ވެސް އަންނަނީ ކުރަމުންނެވެ. މި ދަނޑިވަޅުގައި ވެސް ރަޝިޔާ އިން އަންނަނީ ޔުކްރެއިން އަށް އަމާޒުކޮށް ވަރުގަދަ ހަމަލާތަކެއް ދެމުންނެވެ.