ޔުކްރެއިން އިން ރަޝިޔާގެ ވެރި ރަށް މޮސްކޯ އަށް ހަމަލާ ދީގެން ނުވާނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ފައިނޭންޝަލް ޓައިމްސްގައި ބުނެފައި ވަނީ އެމެރިކާ އިން ޔުކްރެއިން އަށް ފޯރުކޮށްދޭ ދުރު ރޭންޖުގެ މިސައިލް ބޭނުން ކޮށްގެން ރަޝިޔާގެ މޮސްކޯ އަށް ހަމަލާ ދިނުމަށް ޔުކްރެއިންގެ ރައީސް ވުލެޑިމިއަރ ޒެލެންސްކީ އަންގަވާފައިވާ ކަމަށެވެ. ނަމަވެސް، އެމެރިކާގެ ރައީސް ޓްރަމްޕް ވަނީ އެކަން ދޮގު ކުރައްވައިފަ އެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ޔުކްރެއިން އިން މޮސްކޯ އަށް ހަމަލާ ދީގެން ނުވާނެ ކަމަށާއި، ޔުކްރެއިންގެ ރައީސް ޒެލެންސްކީ އެކަން ކޮށްގެން ނުވާނެ ކަމަށެވެ. ހަމަ އެހެންމެ، ޔުކްރެއިން އަަށް ދުރު ރޭންޖުގެ އެއްވެސް މިސައިލެއް ދިނުމުގެ ވިސްނުން ނުގެން ގުޅޭ ކަމަށް ވެސް ޓްރަމްޕް ވަނީ ވިދާޅުވެފަ އެވެ. 

މީގެ އިތުރުން ފައިނޭންޝަލް ޓަައިމްސްގެ އެ ރިޕޯޓުގައި ބުނެފައި ވަނީ، ޖުލައި ހަތަރު ވަނަ ދުވަހު ޓްރަމްޕް އާއި ޒެލެންސްކީ ވާހަކަ ދައްކައި މަޝްވަރާ ކުރެއްވިއިރު، އެޓެކްއެމްއެސް މިސައިލްތައް ދިނުމާ ބެހޭ ގޮތުން މަޝްވަރާ ކުރައްވާފައިވާ ކަމަށެވެ. ޒެލެންސްކީއާ ޓްރަމްޕް އެ ވާހަކަ ދައްކަވާފައި ވަނީ، ރަޝިޔާގެ ރައީސް ވްލަޑިމިއާ ޕުޓިންއާ ވާހަކަ ދެއްކެވި ދުވަހުގެ ފަހު  ދުވަހު އެވެ. 

އެކަމާ ގުޅިގެން ވައިޓް ހައުސްގެ ތަރުޖަމާނު ކެރޮލިން ލެވިޓް ވިދާޅުވީ، ފައިނޭންޝަލް ޓައިމްސްގެ އެ ރިޕޯޓަކީ ހަމައެކަނި ސަމާލުކަން ހޯދުމާއި، "ގިނަ ލައިކްސް" ހޯދުމަށް އާންމު ކޮށްފައިވާ ރިޕޯޓެއް ކަމަަށެވެ. އަދި ރައީސް ޓްރަމްޕް އެ ވާހަކަތައް ދަައްކަވާފައި ވަނީ ހަމައެކަނި ސުވާލެއްގެ ގޮތުގައި ކަަމަށް ވެސް އޭނާ ވިދާޅުވި އެވެ. 

މީގެ އިތުރުން އޭނާ ވިދާޅުވީ ޓްރަމްޕް މަސައްކަތް ކުރައްވަނީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް ކަމަށެވެ. 

އެމެރިކާގެ ރިޔާސީ ދެ ވަނަ ދައުރަކަށް ވަޑަައިގެންނެވި ފަހުން ޓްރަމްޕް ގެންދަވަނީ ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށްޓަކައި ވަރަށް ބޮޑަށް ވަކާލާތު ކުރައްވަމުންނެވެ. ދައުރުގެ ފުރަތަމަ ކޮޅުގައި ޔުކްރެއިންގެ ރައީސް ޒެލެންސްކީއާ ޓްރަމްޕްއާ ދެމެދު ނުތަނަވަސްކަން އުފެދުނު ނަމަވެސް، ފަހުން ވަނީ ދެ ބޭފުޅުން މަޝްވަރާ ކުރައްވައި ޚިޔާލު ބަދަލު ކޮށްފަ އެވެ.