ޚާމަނާއީގެ އިސް އެޑްވައިޒަރަކާ ޕުޓިން ބައްދަލު ކުރައްވައިފި

އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީގެ އިސް އެޑްވައިޒަރަކާ، ރަޝިޔާގެ ރައީސް ވްލަޑިމިއާ ޕުޓިން ބައްދަލު ކުރައްވައިފި އެވެ.

މީޑިއާ ތަކުގައި ރިޕޯޓު ކޮށްފައިވާ ގޮތުން ޕުޓިން ބައްދަލު ކުރައްވާފައި ވަނީ، ޚާމަނާއީ އަށް ލަފާދޭ އިސް އެޑްވައިޒަރެއް ކަމަށްވާ އަލީ ލަރިޖާނީއާ އެވެ. އެ ބައްދަލުވުން އޮތީ އާދީއްތަ ދުވަހު ރަޝިޔާގެ ރިޔާސީ ގަނޑުވަރުގައި ކަމަށް ވެސް ބުނެފައިވެ އެވެ. 

އެ ބައްދަލުވުމުގައި އީރާންގެ ނިއުކްލިއާ ޕްރޮގްރާާމާ ގުޅޭ މަޝްވަރާތައް ކޮށްފައިވާ ކަމަށް ރިޕޯޓު ކޮށްފައިވެ އެެވެ. އެކަމާ ގުޅިގެން ރަޝިޔާގެ ރިޔާސީ ގަނޑުވަރުގެ ތަރުޖަމާނު ދިމިޓްރީ ޕެސްކޮވް ވިދާޅުވެފައި ވަނީ، އެ ބައްދަލުވުމުގައި މެދު އިރުމަތީގެ ހަލަބޮލި ކަމާއި، އީރާންގެ ނިއުކްލިއާ ޕްރޮގްރާމާ ގުޅޭ ގޮތުން ވެސް މަޝްވަރާ ކުރައްވާފައިވާ ކަމަށެވެ. 

މީގެ އިތުރުން ސަރަހަައްދުގެ ހަމަޖެހުމާއި، އީރާންގެ ނިއުކްލިއާ ޕްރޮގްރާމާ މެދު ރަޝިޔާގެ ސިޔާސަތުތައް ވެސް ހިއްސާ ކޮށްފައިވާ ކަމަށް ވަނީ ބުނެފަ އެވެ. ރަޝިޔާ އަކީ އީރާންއާ ގާތް ގުޅުމެއް އޮންނަ ޤައުމަކަށް ވީ ނަމަވެސް، ޖޫން މަހު އިސްރާއީލް އިން އީރާނަށް ދިން ހަމަލާތަކުގައި ރަޝިޔާގެ އެއްބާރުލުން ނުވަތަ އެހީތެރިކަން އީރާން އަށް ލިބިފައި ނުވާ ކަމަށް މީޑިއާ ތަކުގައި ވަނީ ބުނެފަ އެވެ. 

އެހެން ނަމަވެސް، އީރާނާއި ރަޝިޔާއާ ދެމެދު އޮންނަ ގުޅުން ރަނގަޅު ކަމަށް ބުނެފައިވެ އެވެ. ޕުޓިން އާއި ޚާމަނާއީގެ އެޑްވައިޒަރުގެ ބައްދަލުވުން ބާއްވާފައި ވަނީ އިނގިރޭސިވިލާތް، ފްރާންސ އަދި ޖަރުމަނުން އީރާންގެ ނިއުކްލިއާ ޕްރޮގްރާމާ ގުޅޭ މަޝްވަރާތަކެއް ކުރިއަށް ގެންދަން ރާވަމުނ އަންނަ ދަނޑިވަޅެއްގަ އެވެ.

އީރާންގެ ތަަސްނީމް ނިއުސް އިން ރިޕޯޓު ކޮށްފައިވާ ގޮތުގައި، އީރާން އިން ވަނީ އެ މަޝްވަރާތަކުގައި ބައިވެރިވުމަށް އެއްބަސްވެފަ އެވެ. އީރާން އިން ވަނީ ނިއުކްލިއާ ހަތިޔާރު އުފެއްދުމުގެ މަޤުސަދެއް ނެތް ކަމަށާއި، ސުލްހަވެރި ބޭނުންތަކަށް ނިއުކްލިއާ ހަކަތަ ބޭނުން ކުރުމުގެ ހައްގު ލިބިގެންވާ ކަމަށް ތަކުރާރުކޮށް ބުނެފަ އެވެ.