އީޖާދީ ޚިޔާލުތަކާއި އިންޤިލާބީ ހުވަފެންތަކުގައި ޙަޤީޤީ ކުލަ ޖެހިގެންދާ ކޮންމެ ފަހަރަކީ ދުނިޔޭގެ އެކި ކަންކޮޅުތަކުން އެތައް ބައެއްގެ ސަމާލުކަން އެކަމަކަށް ހުއްޓުވާލާ ކަމަކަށް އޮންނަނީ ވެފައެވެ. ދައްކަން މި އުޅެނީ އެކަހަލަ ކަމެއްގެ ވާހަކައެވެ. އެފަދަ، އިންޤިލާބީ ޚިޔާލެއްގައި ޙަޤީޤީ ކުލަޖެހިގެން ދިޔަ ގޮތުގެ ވާހަކައެވެ. މި އުފެއްދުމުގެ ބާނީއަކީ، މަޝްހޫރު ވިޔަފާރި މަހުޖަނު، ބިލް ގޭޓްސްގެ އެހީތެރިކަމާއެކު ހިންގާ އައު ވިޔަފާރިއެކެވެ. ކެލިފޯނިއާގައި މަރުކަޒުކޮށްގެން ހިންގާ ސޭވަރ ކުންފުނީގެ އާދަޔާ ޚިލާފު އުފެއްދުމަކީ ބަޓަރެވެ. މިހެން ބުންޏަސް، މި ދައްކަނީ އާދައިގެ ގޮތަކަށް އުފައްދާ ބަޓަރެއްގެ ވާހަކައެއް ނޫނެވެ.

އަހަރެމެންގެ ތެރެއިން ހަމަ ކޮންމެ މީހަކަށްމެހެން، ބަޓަރަކީ ކިރުގެ އުފެއްދުމެއްކަން އެނގޭނެއެވެ. ނަމަވެސް ސޭވަރގެ ބަޓަރު ތަފާތެވެ. ސޭވަރގެ ބަޓަރު އުފައްދަނީ ފަހަރެއްގައި ކިރު ފޮދެއްގެ މިންވަރުވެސް ބޭނުން ކޮށްގެންނެއް ނޫނެވެ. މި ޚިޔާލު އުފެދި، ތަނަވަސްވެގެން ދިޔައީ ކާބަންޑައިއޮކްސައިޑްއާއި ހައިޑްރޮޖަން  ބޭނުންކޮށްގެން ބަޓަރު ޒާތުގެ އެއްޗެއް އުފެއްދިދާނެ ކަމަށް ޤަބޫލު ކުރެވެން ފެށި ހިސާބުންނެވެ. މިންހެޔޮ ކާނާގެ ބައިތަކުގެ ތެރޭގައި ފެޓްސްގެ ބަޔަކީ ހިއްސާ ކުޑަ ބައެއް ނޫނެވެ. ފެޓްސްގެ ގޮތުގައި ކެއިންބުއިމުގައި އެންމެ ގިނައިން ބޭނުން ކުރެވޭ އެކައްޗަކީ ބަޓަރު ކަމުގައި ވާ އިރު، ސޭވަރގެ އާދަޔާ ޚިލާފު ބަޓަރު އުފެއްދުމުގެ ޚިޔާލު ފައްކާވެގެން އައީ ކާބަންއާއި ހައިޑްރޮޖަން އެޓަމްތަކުގެ ޗޭނުތަކުން ފެޓްސްގެ މާއްދާ އުފެދޭ ނަޒަރިއްޔާގެ ތެރެއިންނެވެ.

ޒުވާން ކުންފުންޏެއް ކަމަކު، ސޭވަރއިން ވަނީ ފެޓް މޮލެކިއުލްތައް އުފައްދާނެ ތަރމޯކެމިކަލް ޕްރޮސެސްގެ ޕޭޓަންޓް ރައިޓްސް ހޯދާފައެވެ. އެ ޕޭޓަންޓްގެ އެހީގައި ސޭވަރ އިން ދަނީ ޖަނަވާރުގެ ކިރު އެކުލެވިގެން ނުވާ ކިރާއި، ބަޓަރާއި، ޗީޒް އަދި އައިސްކްރީމް ފަދަ ކިރުގެ އުފެއްދުންތައް ތައްޔާރު ކުރުމަށް މަސައްކަތް ކުރަމުންނެވެ. ޖަނަވާރުގެ ކިރު އެކުލެވިގެން ނުވާ މި އުފެއްދުންތަކަކީ ބަލާލާ ބެލުމަށް، އާންމު އުފެއްދުންތަކާ އެއްގޮތް އުފެއްދުންތަކެކެވެ. އެވަރުން އަދި ނިމުނީއެއް ނޫނެވެ. ރަހަވެސް ހަމަ އެފަދައެވެ. ސޭވަރގެ އީޖާދީ މަރުހަލާގެ ތެރެއިން ޖައްވު ހޫނުކުރާ ވިހަ ގޭސްތަކެއް ބޭރުވެގެންނެއް ނުދެއެވެ. މި އުފެއްދުންތައް އުފެއްދުމަށްޓަކައި ނަޢަމްސޫފި ގެންގުޅޭނެ ދަނޑުބިންތަކެއް ބޭނުމެއް ނުވެއެވެ. ޒަމާނުއްސުރެ ކުރަމުން އަންނަ ދަނޑުވެރިކަމުގެ މަސައްކަތްތަކަށް ބޭނުންވާ ފެނުގެ މިންވަރަށް ބަލާއިރު، އޭގެ 1000 ބައިކުޅަ 1 ބައި ހާ ފެނުން، ސޭވަރގެ އުފެއްދުންތައް ތައްޔާރުކޮށްލެވެއެވެ. ޖަނަވާރުތަކުން ނަގާ ފެޓްސްގެ މާއްދާއިން ތައްޔާރު ކުރާ އުފެއްދުންތަކުން ބޭރުވާ ކާބަން ފުޓްޕްރިންޓަށް ވުރެ، މަސްނޫއީ ފެޓްސްގެ އުފެއްދުންތަކުގެ ކާބަން ފުޓްޕްރިންޓް، ނިސްބަތުން މާ މަދެވެ.

މިހާތަނަށް ހަދާފައިވާ ޓެސްޓުތަކުގެ ނަތީޖާއަށް ބަލާއިރު، ސޭވަރގެ މަސްނޫއީ ބަޓަރާއި، ޖަނަވާރު ކިރުން ތައްޔާރު ކުރާ ބަޓަރުގެ ރަހަ ވަކި ނުކުރެވޭހާ އެއްގޮތެވެ. ނަމަވެސް އަހަރެމެންގެ ކާމޭޒު މައްޗަށް އެއިން ބަޓަރުކޮޅެއް އަރާވަރު ވާނީ އަދި ދުވަސްތަކެއް ފަހުން ކަމަށް ބެލެވެއެވެ. ސޭވަރ ކުންފުނިން ބުނާ ގޮތުގައި، އާންމު އުސޫލުން މި ބަޓަރު ވިއްކަން ފެށުމާ ދެމެދު އަދި ފުދޭވަރެއްގެ ރާސްތާއެއް އެބައޮތެވެ.

ސޭވަރގެ ޗީފް އެގްޒެކެޓިވް އޮފިސަރ ކެތުލީން އެލެކްޒޭންޑަރ ބުނި ގޮތުގައި މިހާރު ކުރިއަށް ދަނީ، އާންމު އުސޫލުން ބަޓަރު ވިއްކުމަށް ރެގިއުލޭޓަރުންގެ އަތުން ހޯދަން ޖެހޭ ހުއްދަތައް ހޯދުމުގެ މަސައްކަތެވެ. 2025 ވަނަ އަހަރުގެ ކުރިން، ސޭވަރގެ ބަޓަރުކޮޅެއްގެ ރަހަ ބަލައިލަން ލިބުން ނާދިރުކަން، ކެތުލީންގެ ވާހަކަތަކުން އެނގެއެވެ.

މައިކްރޮސޮފްޓްގެ ބާނީ އަދި އެކި ދާއިރާތަކުން މަޝްރޫޢުތައް ހިންގުމަށް ގިނަ ޚަރަދުތަކެއް ކުރަމުން އަންނަ މަހުޖަނު، ބިލް ގޭޓްސްވެސް ދާދި ފަހުން ވަނީ ސޭވަރ ކުންފުނީގެ ބަޓަރުގެ ވާހަކަ، އޭނާގެ ބްލޮގްގައި ހިއްސާކޮށްފައެވެ. ލެބްތަކުގައި އުފައްދާ ނަކަލީ ނުވަތަ މަސްނޫއީ އުފެއްދުންތައް ތަޖުރިބާކުރުމަށް އިންސާނީ ޙަޟާރާތުން ހިސާބަކަށް ފަސްޖެހިފައި އޮތް އަދުގެ ދުނިޔޭގައި، އަސްލު ބަޓަރުގެ ރަހައާ ތަފާތެއް ނެތް ސިންތެޓިކް ބަޓަރެއް ސޭވަރއިން ގެނެސްދޭ ކަމީ ކޮންމެކޮންމެ ކުންފުންޏަކަށް ކުރެވޭނެ ވަރުގެ ކަމެއް ނޫން ކަންވެސް އެ ޕޯސްޓްގައި ގޭޓްސް ވަނީ ފާހަގަކޮށްފައެވެ.

ގޭޓްސް ވަނީ ސޭވަރ ކުންފުނިން ބަޓަރު އުފައްދާ ގޮތްވެސް ކޮންމެވެސް ވަރަކަށް ތިލަކޮށްދީފައެވެ. ޖަނަވާރާއި ގަސްގަހާގެހީގެ އެއްވެސް މިންވަރެއް ބޭނުން ކުރުމެއް ނެތި، ސޭވަރއިން ބަޓަރު އުފައްދަނީ ވައިގެ ތެރޭގައި ދައުރުވަމުންދާ ކާބަންޑައިއޮކްސައިޑް އަދި ފެނުގައި ދައުރުވާ ހައިޑްރޮޖަން "އަތުލައިގަނެގެން"ނެވެ. އެ މާއްދާތައް ހޫނު ކުރުމަށްފަހު އޮކްސިޑައިޒް ކުރެއެވެ. އެހާ ހިސާބުން، އޭގައި އެކުލެވީ ފެޓީ  އެސިޑްގެ ބައިތައް ވަކިވަކިވާން ފަށައެވެ. އެއަށްފަހު ފެޓްސްގެ މާއްދާއަށް އެ ބަދަލުކޮށްލައެވެ.

އިތުރުވަމުން އަންނަ އިންސާނީ ޙަޟާރާތުގެ އަހުލުވެރިން ބަނޑުފުރާ މުއްތި ކުރުމަށްޓަކައި ޖަނަވާރާއި ގަސްގަހާގެހީގެ މަސްދަރުން ބޭރުން ވަސީލަތްތަކެއް ހޯދަންޖެހޭކަން ގޭޓްސް ވަނީ ފާހަގަކޮށްފައެވެ. އެއީ ކާބަން ފުޓްޕްރިންޓް ކުޑަ ކުރުމަށްޓަކައި ކޮންމެހެން ބޭނުން ކަމެއް ކަން އޭނާ ފާހަގަ ކުރެއެވެ. ނަޢަމްސޫފި ގެންގުޅުމުގެ ސިނާޢަތަކީ ދުނިޔެތެރެއަށް ބޭރުވެގެންދާ ޖައްވު ހޫނުކުރާ ވިހަ ގޭސްތަކުގެ 14.5 ޕަސެންޓް ހިއްސާ ކުރާ ސިނާޢަތެކެވެ. އިޚްތިޔާރެއް ނުހޯދައިފިނަމަ، އެ ޢަދަދު އަދިވެސް ދާނީ އިތުރުވަމުންނެވެ.

ސޭވަރގެ މި އާދަޔާ ޚިލާފު އުފެއްދުން، އާންމު ފިހާރަތަކުގެ ހަރުގަނޑުތަކާ ހިސާބަށް ގެނެސްދިނުމަށް ކުރިމަތިވާނެ އެންމެ ބޮޑު ގޮންޖެހުމަކަށް ވާނީ، އަތްފޯރާ އަގަކަށް އެ ބަޓަރުގެ އަގު ތިރިކުރުން ކަމަށް ގޭޓްސް ވަނީ ބުނެފައެވެ. ވީހާވެސް ގިނަ ބަޔަކަށް ސޭވަރގެ އުފެއްދުން ލިބޭނެ ގޮތް ހެދުމަކީ ގިރާކުރަންޖެހޭނެ ބޮޑު ގޮންޖެހުމެކެވެ. އަމާޒަކީ ޖަނަވާރުގެ ކިރުން އުފައްދާފައި ހުންނަ ބަޓަރާ އެއް އަގެއްގައި ނުވަތަ އެއަށްވުރެވެސް ހެޔޮ އަގެއްގައި، ސޭވަރގެ ބަޓަރު ގަންނަން ލިބޭވަރު ކުރުމެވެ.

ކާބަންޑައިއޮކްސައިޑްއާއި ހައިޑްރޮޖަން ބޭނުންކޮށް އުފައްދާފައިވާ ސިންތަޒައިޑް ބަޓަރަކީ ހަމަ ފެށުމެކެވެ. މާ ދުރުނޫން މުސްތަޤުބަލެއްގައި، ކިރާއި، ޗީޒް އަދި އައިސްކްރީމް އުފައްދަންވެސް ސޭވަރ ކުންފުނިން ވަނީ އާމާޒު ހިފާފައެވެ.