މާލޭގައި މީހުން ރަހީނުކޮށްގެން ފޭރެން ބޭނުންކުރާ ގެއެއް، އިސްކޮށް އުޅޭކަމަށް ތުހުމަތު ކުރެވެނީ ދެމައިންނަށް

ފޭރުމާއި ރަހީނު ކުރުމުގެ މައްސަލަތައް އިންތިހާއަށް އިތުރުވެފައިވާއިރު، މާލޭގައިވެސް މީހަކު ރަހީނުކޮށް އެމީހާގެ އަތުން ފޭރުނުކަމަށް ތުހުމަތު ކުރެވޭ ބަޔަކު މިވަނީ ހައްޔަރުކޮށްފައެވެ. އެ ބިރުވެރި ޙާދިސާ ދިމާވީ ހއ.އަތޮޅު އިހަވަންދޫ ކައުންސިލް މެމްބަރު އަހުމަދު ރިޟްވާނަށެވެ.  

މއ މަސްފަން ގެއަށް މީހަކު ވައްދައި ފޭރުނު މައްސަލައިގައި 35 އަހަރާއި، 37 އަހަރާއި އަދި 26 އަހަރުގެ ދިވެހި ފިރިހެނުންތަކެއް ވަނީ ހައްޔަރުކޮށްފައެވެ. ކޯޓު އަމުރުން އެނގޭ ގޮތުގައި އެމީހުންނަކީ މއ މަސްފަން ގައި ދިރިއުޅޭ މީހުންނެވެ.

އޭގެ އިތުރުން، މި މައްސަލައިގައި އޮޅުވާލައިގެން މީހުން ގެއަށް ވެއްދުމުގައި ޙަރަކާތްތެރިވާ 43 އަހަރުގެ އަންހެން މިހާ މިހާރު ހުރީ ތަހުޤީގު ނިމެންދެން ބަންދުކޮށްފައެވެ. އެކަން ފުލުހުން ކަށަވަރު ކޮށްދެއެވެ. އޭނާއަކީ މީގެ ކުރިންވެސް ހަމަ މި ބާވަތުގެ ކުށްތަކުގައި ހައްޔަރު ކޮށްފައިވާ މީހެކެވެ.

ރިޟްވާން ބުނީ، އޭނާ ދިލްބަހާރު މަގުގައި ހުރި ގެއެއްގެ ކައިރީގައި ހުއްޓައި ދެބައި އުމުރުގެ އަންހެނަކު ގޮވާލާފައި، ގޭގައި އިން ބޮތްކެއް ބަދަލު ކޮށްލުމަށް އޭނާއަށް އެހީތެރިވެ ދިނުމަށް އެދުނު ކަމަށެވެ.

އެހެންކަމުން އޭނާ އެ ގެއަށް ދިޔައެވެ. ނަމަވެސް ގެއަށް ވަދެވުމާއެކު އަންހެން މީހާ ވަނީ ގޭގެ ދޮރު ތަންޑު އަޅުވާފައެވެ. އެހިސާބުން ދެ ފިރިހެނުން ނުކުމެ، އޭނާ ބިންމައްޗަށް ވައްޓާލުމަށްފަހު އަނިޔާ ކުރަން ފެށިއެވެ. އަދި އޭނާއަށް ބިރު ދައްކައި ފޭރުމަށް މަސައްކަތް ކުރިއެވެ.

އެއަށްފަހު ފޯނާއި ވޮލެޓު އަތުލައި، އޭނާގެ އެކައުންޓުން 20،000 ރުފިޔާ އެހެން އެކައުންޓަކަށް ޓްރާންސްފަރ ކޮށްފައިވެއެވެ.

އެއަށްފަހު އެމީހުން އެންގީ އޭނާގެ ކޭޝްކާޑުގެ ޕާސްވޯޑު މިކަމުގައި ހިމެނޭ އަންހެން މީހާއަށް ދިނުމަށެވެ.

ދޮޅު ގަޑިއެއްހާއިރު އޭނާ އެމީހުންގެ ބާރުގެ ދަށުގައި ހުންނަން ޖެހުނެވެ. އޭނާ އެތަނުން ނުކުމެވޭތޯ ކުރިހާ މަސައްކަތް ވީ ނާކާމިޔާބެވެ. އޭގެ ބަދަލުގައި އޭނާއަށް ލިބުނީ ބޮޑެތި އަނިޔާތަކެކެވެ. އެގޮތުން އެމީހުން ވަނީ އޭނާއަށް ވަޅިން ބިރު ދައްކައި، ބަރަހަނާކޮށް، ކަރުގެ މައްޗަށް ފައިންވެސް އަރާފައެވެ.

ރާއްޖެއެމްވީއަށް އޭނާ ކިޔާދިން ގޮތުގައި އެ އަންހެން މީހާ ލާރި ނަގަން އޭޓީއެމްއަށް ދިޔައީވެސް މޫނު ބުރުގާ އަޅައިގެންނެވެ.

އޭނާ ބުނީ އެ ތަނުގައި ހަމަ އެމީހުންގެ ބައިވެރިވުމާއެކު އެފަދަ އިތުރު ޙާދިސާތައް ހިނގާފައިވާކަމަށް ފަހުން މައުލޫމާތު ލިބުނުކަމަށެވެ.  

އޭނާ ވަނީ އެތަނުން ސަލާމަތް ވެވޭތޯ އަނިޔާކުރި މީހުންނާ "ޑީލެއް ހެދޭތޯ" ވެސް މަސައްކަތް ކޮށްފައެވެ. ނަމަވެސް އޭނާއަށް އެތަނުން ނުކުމެވޭ ވަރުވީ އެމީހުން އޭނާގެ ކާޑު ބޭނުންކޮށްގެން ފައިސާ ނަގައި، ޖުމުލަ 40،000ށް ވުރެ ގިނަ ރުފިޔާ އޭނާ އަތުން ފޭރުމަށްފަހުއެވެ.

އޭނާ ދޫކޮށްލުމަށްފަހު އެމީހުން އޭނާއަށް ދިނީ އިންޒާރެކެވެ. އޭރު އޭނާއަށް އެތައް އަނިޔާތަކެއްވެސް ހުރީ ކޮށްފައެވެ.

އެތަނުގެ އެތެރޭގައި ކެމެރާއެއްވެސް ހުއްޓެވެ. އެމީހުން ވަނީ އެއްވެސް ހިސާބަކުން އެމީހުންގެ ވާހަކަ ދައްކައިފިނަމަ އޭނާގެ ބަރަހަނާ މަންޒަރުތައް ލީކު ކޮށްލާނެކަމުގެ އިންޒާރު ދީފައެވެ.

އެމީހުން ބަންދު ކުރުމަށް ކްރިމިނަލް ކޯޓުން އަމުރުކޮށްފައިވާއިރު، ކޯޓު އަމުރުން އެނގޭ ގޮތުގައި މި ކަމުގައި އިސްކޮށް ޙަރަކާތްތެރިވަނީ ދެމައިންނެވެ.

"މައްސަލައިގައި ހިމެނޭ ކުށް ކުރުމުގައި ޝާމިލް ވަނީ މަންމައަކާއި ދަރިއެއްކަމަށް ގިނަ ހައްޔަރު/ބަންދު ލޮގްތަކުން ސާފުވޭ"ކޯޓު އަމުރުގައި ބުނެފައިވެއެވެ.

އަދި އެ ގެއަކީވެސް އެފަދަ ކުށް ކުރުމަށް ތަކުރާރުކޮށް ބޭނުން ކުރާ ތަނެއްގެ ގޮތުގައި ފާހަގަވެފައިވާކަންވެސް ކޯޓު އަމުރުން އެނގެއެވެ.

"މި މައްސަލައިގައި ހިމެނޭ މއ މަސްފަން ގެޔަކީ ތަކުރާރުކޮށް، މީހުން އެކި ބޭނުންތަކުގައި އެ ގެއަށް ވެއްދުމަށްފަހު އެ ފަރާތްތަކަށް ބިރު ދައްކާ ފޭރުމުގެ ރެކޯޑު އޮތް ތަނެއް"،ކޯޓު އަމުރުގައި ބުނެފައިވެއެވެ.

ކޯޓު އަމުރުގައި ބުނެފައިވަނީ މި މައްސަލައިގައި ތުހުމަތުވާ ފަރާތްތަކުން މއ މަސްފަން ގެ ކައިރީގައި ޙަރަކާތްތެރިވާކަން ސީސީޓީވީ ފުޓޭޖުތަކުން އެނގޭ ކަމަށެވެ. އަދި އަނިޔާ ލިބުނު ފަރާތުންވެސް މިހާރު ވަނީ ތުހުމަތު ކުރެވޭ ފަރާތްތަކުގެ ފޮޓޯ އައިޑެންޓިފިކޭޝަން ހަދާފައެވެ.  

މި މައްސަލަ ދިވެހި ފުލުހުންގެ ޚިދުމަތުން ގެންދަނީ އިތުރަށް ތަހުގީގު ކުރަމުންނެވެ.