ރާއްޖެޓީވީގެ އެނިމޭޓެޑް ސިޔާސީ ސީރީސް "ތަރުޖަމާނު" އަށް އާންމުންގެ ބޮޑު ތަރުހީބެއް

އެއިރެއްގައި އޮންނަ ސަރުކާރުގެ ކަންކަން އާންމުންނާ ހަމައަށް ޝައުގުވެރިކަމާއެކު ގެނެވޭނެ އެއްގޮތަކީ އެނިމޭޓް ކޮށްފައި ދެއްކުމެވެ. މީގެ ކުރިންވެސް ބައެއް ކަންކަން މި ބީދައިން ގެނެސްފައިވެއެވެ. ނަމަވެސް މިފަހަރު ރާއްޖެޓީވީގެ ޓީމުން އާންމުންނާ ހަމައަށް ދޫކޮށްލީ ތަފާތު އެނިމޭޓެޑް ސީރީސްގެ ބައެކެވެ. "ތަރުޖަމާނު" ސީރީސްއަކީ ސަރުކާރަކުން ރައްޔިތުން އެންގެން ބޭނުންވާ ކަންކަން ބެލުންތެރިން ޝައުގުވެރިވާނެ ގޮތަކަށް ގެނެސްދޭ ސީރީސްއެކެވެ.

މިއީ ރާއްޖެޓީވީގެ އަމިއްލަ އުފެއްދުމެކެވެ. މި ސީރީސްގެ ފުރަތަަމް އެޕިސޯޑް ދައްކާފައިވަނީ ހޮނިހިރު ދުވަހުގެ ރޭ 10:30ގައެވެ. މި އެޕިސޯޑުގައި ރައްޔިތުން އެންމެ ބޮޑަށް އެނގެން ބޭނުންވެފައިވާ ސުވާލުތަކަށް ޖަވާބު ދީފައިވެއެވެ.

މި ޕްރޮގްރާމް ރާއްޖެ ޓީވީން ގެނެސްދިނުމަށް ހަމަޖެހިފައިވަނީ ކޮންމެ ހަފްތާއެއްގެ ހުކުރު ދުވަހުގެ ރޭ 10:30 ގައެވެ. ނަމަވެސް މިދިޔަ ހަފްތާގެ ޕްރޮގްރާމު ހޮނިހިރު ދުވަހު ދެއްކީ ހުކުރު ދުވަހުގެ ރޭ މިނިވަންދުވަހުގެ ޖަލްސާ ލައިވްކުރުމުންނެވެ.

30 މިނެޓުގެ މި ސީރީސްގެ އެޕިސޯޑުގެ ތެރެއިން ހޮނިހިރު ދުވަހުގެ "ތަރުޖަމާނު" އެޕިސޯޑުގައި ދައްކާފައިވަނީ އަތަމަނަ ހުރާގެ ނޫސްވެރިންގެ ބައްދަލުވުމެވެ. މި ބައްދަލުވުމުގައި ނޫސްވެރިންގެ މައިގަނޑު ސުވާލުތައް އަމާޒުކޮށްފައިވަނީ ސަރުކާރުން ނިންމާފައިވާ ނިންމުންތަކާއި، ގަރުދިޔައާއި ބަތް ކާންޖެހޭނެކަމަށް ސަރުކާރުން ދެއްކި ވާހަކައާއި އަދިވެސް އިތުރު ކަންކަމުގެ މައްޗަށެވެ.

"ތަރުޖަމާނު" ސީރީސްއަށް އާންމުން ބޮޑު ތަރުހީބެއް ލިބިގެންދިޔަކަން ފާހަގަކުރެވުނެވެ. ފުރަތަމަ އެޕިސޯޑްވެސް ލައިވްކުރި ގަޑީގައި އެކަނިވެސް 2000ށް ވުރެ ގިނަ މީހުން ބެލިއެވެ. އަދި މިހާތަނަށް 5000ށް ވުރެ ގިނަ މީހުން ވަނީ ފުރަތަމަ އެޕިސޯޑް ބަލާފައެވެ.

"ތަރުޖަމާނު" ސީރީސްގެ ފުރަތަމަ އެޕިސޯޑް ބެލި ގާތްގަނޑަކަށް ހުރިހާ ބެލުންތެރިން ވަނި ރާއްޖެޓީވީގެ ޓީމަށް ހިތްވަރުދީ މިއީ ބަލާހިތްވާ ކަހަލަ އަދި ކަމުދާ ސީރީއެސްއެއްގެ ގޮތުގައި ބުނެފައެވެ. "ވަރަށް ސަޅި" "ރާއްޖެޓީވީ ވަރެއް ހަމަ ނެތް" "ރާއްޖެޓީވީގައި އޮތީ ފިސާރި ޓީމެއް" ފަދަ ކޮމެންޓްތައް ބެލުންތެރިން ދީފައިވާއިރު، މި ސީރީސްގެ ދެވަނަ އެޕިސޯޑަށް ގިނަ ބެލުންތެރިން ދަނީ އިންތިޒާރުކުރަމުންނެވެ.