މެޑިކަލް ފުރިހަމަކުރުމަށް ވޭން ރޫނީ އެވަޓަން އަށް ގޮސްފި

މެޑިކަލް ފުރިހަމަކުރުމަށް މެންޗެސްޓާ ޔުނައިޓެޑްގެ ކެޕްޓަން ވޭން ރޫނީ އެވަޓަން އަށް ގޮސްފި ކަމަށް ރިޕޯޓްތައް ބުނެފި އެވެ.

ރިޕޯޓްތައް ބުނާގޮތުން މީގެކުރިން އެވަޓަން އަށް ކުޅުނު ރޫނީ އެ ކްލަބަށް ބަދަލުވުމަށް މެޑިކަލް ހެދުމަށް ގޮސްފައިވަނީ އެވަޓަންގެ ޓްރެއިނިން ގްރައުންޑަށެވެ.

ރޫނީ އެވަޓަން އަށް ސޮއިކުރުމާ ގާތަށް އައިސްފައިވާއިރު، އެވަޓަންގެ ފޯވާޑް ރޮމެލޫ ލުކާކޫ ވަނީ ޔުނައިޓެޑަށް ސޮއިކުރުމާ ގާތަށް އައިސްފައެވެ. އެގޮތުން ލުކާކޫއާ އެކު ޔުނައިޓެޑަށް އެއްބަސްވުމަކަށް އާދެވިފައިވާކަމަށް އެ ކްލަބުން ވަނީ ހޮނިހިރު ދުވަހު އިއުލާންކޮށްފައެވެ. އަދި ވަރަށް އަވަހަށް މެޑިކަލް ހެދުމަށްފަހު ލުކާކޫ އެއްބަސްވުމުގައި ސޮއިކުރާނެ ކަމަށްވެސް އެ ކްލަބުން ބުނެއެވެ.

އެވަޓަން ދޫކޮށްލުމަށްފަހު އުމުރުން 31 އަހަރުގެ ރޫނީ ޔުނައިޓެޑާ ގުޅުނީ 2004 ވަނަ އަހަރެވެ. އޭނާ އެ ކްލަބަށް ބަދަލުވީ 27 މިލިއަން ޕައުންޑަށެވެ. އެގޮތުން ރޫނީ ވަނީ މިހާތަނަށް އެ ކްލަބާ އެކު ގިނަ ކާމިޔާބީތައްވެސް ހޯދާފައެވެ.

ރޫނީ އެވަޓަން އަށް ބަދަލުވަނީ ފްރީ ޓްރާންސްފާއެއްގެ ދަށުން ކަމަށް ރިޕޯޓްތައް އަންނަނީ ބުނަމުންނެވެ. އޭނާ އެކި ފަހަރު މަތިން އެވަޓަންއާ އެކު މަޝްވަރާކޮށްފައިވާއިރު، މިފަހަރު އޭނާ އެ ކްލަބަށް ބަދަލުވާނެ ކަމަށް ބެލެވެއެވެ.

ޔުނައިޓެޑަށް މިހާތަނަށް 253 ލަނޑު ކާމިޔާބުކޮށްފައިވާ ރޫނީ އަކީ އެ ކްލަބުގެ ތާރީހުގައިވެސް އެންމެ ގިނަ ލަނޑު ޖެހި ކުޅުންތެރިޔާއެވެ. އޭނާ ވަނީ އެ ކްލަބާއެކު ފަސް ޕްރިމިއާ ލީގު، ތިން ފުޓުބޯޅަ ލީގް ކަޕް، ތިން އެފްއޭ ކޮމިއުނިޓީ ޝިލްޑް، އެއް ޔުއެފާ ޗެމްޕިއަންސް ލީގު، އެއް ޔުއެފާ ޔޫރޮޕާ ލީގު އަދި އެއް ފީފާ ކްލަބް ވޯލްޑްކަޕް ކާމިޔާބުކޮށްފައެވެ.

އިނގިރޭސި ގައުމީ ޓީމުގެ ކެޕްޓަންކަންވެސް ކުރަމުން އަންނަ ރޫނީ ވަނީ ގައުމީ ޓީމަށް ކުޅުނު 119 މެޗުގައި 53 ލަނޑު ކާމިޔާބުކޮށްފައެވެ.