ޕްރިމިއާ ލީގު: އެވަޓަންގެ މައްޗަށް ލިވަޕޫލް އިން ކުރިހޯދައިފި

ޕްރިމިއާ ލީގުގައި އެވަޓަންގެ މައްޗަށް ލިވަޕޫލްއިން ކުރި ހޯދައިފި އެވެ.

ހޮނިހިރު ދަވަހު އަމިއްލަ ދަނޑުގައި ކުޅުނު މެޗުން ލިވަޕޫލުން އެވަޓަންގެ މައްޗަށް ކުރިހޯދީ 1-3 ގެ ނަތީޖާއަކުންނެވެ. މެޗުގައި ލިވަޕޫލްގެ ފަރާތުން މޮޅު ކުޅުމެށް ފެނިގެން ދިޔައިރު، މެޗުގެ ހަތް ވަނަ މިނެޓްގައި އެޓީމުން ވަނީ ފުރަތަމަ ލަނޑު ޖަހާ ލީޑު ނަގާފަ އެވެ. މި ލަނޑު ލިވަޕޫލަށް ކާމިޔާބުކޮއްދިނީ ސަޑިއޯ މާނޭ އެވެ. މި ލަނޑު އޭނާ ކާމިޔާބުކުރީ އެވަޓަންގެ ދެ ޑީފެންޑަރުން ކައިރިން ނައްޓާލުމައްފަހު އޭރިޔާތެރެއަށް ވަދެއެވެ. މި ލަނޑާއެކު ސަޑިއޯ މާނޭ ލީގުގައި ކާމިޔާބުކުރި ލަނޑުގެ އަދަދު ވަނީ 13 އަށް އަރާފައެވެ.

މާނޭގެ ލަނޑުން ލިވަޕޫލް ލީޑުގައި ކުޅެމުން ދަނިކޮށް ޑިފެންސް ލައިނުން ހެދުނު ގޯހެއްގެ ފައިދާ ނަގައި އެވަޓަންއިން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮއްދިނީ މެތިވް ޕެނިންގްޓޮން އެވެ. އޭނާ މި ލަނޑު ކާމިޔާބުކުރީ އެވަޓަންއިން ނެގި ކޯނަރެށް ލިވަޕޫލްގެ ޑިފެންޑަރުންނަށް ސާފުކޮށް ނުލެވިގެން އުޅެނިކޮށެވެ.

ނަމަވެސް ލިވަޕޫލުން ވަނީ ފުރަތަމަ ހާފް ނިމުނުގެ ކުރިން ކުޅުން ވަރުގަދަކޮށް ދެވަނަ ފަހަރަށް މެޗުގެ ލީޑް ނަގާފައެވެ. މި ލަނޑު 31 ވަނަ މިނެޓްގައި އެޓީމަށް ކާމިޔާމިޔާބު ކޮއްދިނީ މި ސީޒަނުގައި މޮޅު ކުޅުމެއް ދައްކަމުން އަންނަ ފިލިޕޭ ކޮޓީނިއޯ އެވެ. މެޗްގެ ފުރަތަމަ ހާފް ނިމިގެންދިޔައީ 1-2 އިން ލިވަޕޫލް ކުރީގައި އޮވެގެންނެވެ.

ދެވަނަ ހާފަގައިވެސް އެވަޓަންގެ ފަރާތުން މާ އެދެވޭ ކުޅުމެއް ފެނުގެން ގޮސްފައެށް ނުވާއިރު، ލިވަޕޫލުން ވަނީ މި ހާފްގައި އިތުރު ލަނޑެށް ކާމިޔާބުކޮށް ލީޑު ފުޅާކޮއްފައެވެ. މި ލަނޑު މެޗުގެ 60 ވަނަ މިނެޓްގައި ލިވަޕޫލަށް ލީޑު ފުޅާކޮއްދިނީ ޑިވޮކް އޮކޮތް އޮރީގީ އެވެ.

މެޗުން މޮޅުވި ލިވަޕޫލް އޮތީ ކުޅުނު 30 މެޗުން ލިބުނު 59 ޕޮއިންޓާއެކު ތާވަލުގެ ތިންވަނައިގައެވެ. އެހެންނަމަވެސް ހޮނިހިރު ދުވަހުގެ ރޭ ކުޅޭ މެޗުތަކަށްފަހު ޕޮއިންޓް ތާވަލަށް ބަދަލު އަންނާނެ ކަމަށް ބެލެވެއެވެ.