އަޅުގަނޑު ރައީސްކަމުގެ މަގާމުގަ ހުރިނަމަ، ޔޫކްރެއިން ހަނގުރާމަ 24 ގަޑިއިރުތެރޭ ހުއްޓުވާނަން: ޓްރަމްޕް

އެމަނިކުފާނު އެމެރިކާގެ ރައީސްކަމުގެ މަގާމުގައި ހުންނެވިނަމަ، ޔޫކްރެއިން-ރަޝިއާ ހަނގުރާމަ "24 ގަޑިއިރުގެ ތެރޭގައި" ހުއްޓުވައިލެއްވީސްކަމަށް، އެގައުމުގެ ކުރީގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވެފައިވަނީ އިނގިރޭސި ޓީވީ ޗެނަލް "ޖީބީ ނިއުސް"އަށް ދެއްވި އިންޓަވިއުއެއްގައި ބުދަ ދުވަހުއެވެ.

އެމެރިކާގެ 45 ވަނަ ރައީސް ވަނީ، އެމަނިކުފާނު، ރަޝިޔާގެ ރައީސް ވްލަޑިމިއަރ ޕޫޓިންއާއި ޔޫކްރޭންގެ ރައީސް ވޮލޮޑިމީރް ޒެލެންސްކީއާއެކު ގެންގުޅުއްވާ ޒާތީ ގުޅުންތައް ބޭނުންކުރައްވައިގެން އެއް ދުވަހުގެ ތެރޭގައި، ދެގައުމުގެ ދެމެދުގައި ކުރިއަށްދާ ހަނގުރާމަ ނިމުމަކަށް ގެނައުމަށް އެހީތެރިވެދެއްވާނެކަމަށް ވިދާޅުވެފައެވެ.

ޓްރަމްޕް ވަނީ 2024 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވުމުގެ ނިޔަތް ހާމަކުރައްވާފައެވެ.

އިންޓަރވިއުކުރި ނައިޖަލް ފަރަގޭ، އިންތިޚާބު ކާމިޔާބުކުރެއްވޭނެހެން ހީފުޅުވޭތޯ ދެންނެވުމުން ޓްރަމްޕް ވިދާޅުވީ، "ވަރަށް ރަނގަޅު ފުރުސަތެއް" އެބައޮތް ކަމަށެވެ.

ޓްރަމްޕް ވިދާޅުވީ ޗައިނާ، އުތުރު ކޮރެއާ އަދި އީރާންފަދަ ގައުމުތަކާ އެމެރިކާއާމެދު އުފެދިފައިވާ ފިތުނަތައް ކުޑަކުރުމަށް މަސައްކަތްޕުޅު ކުރައްވާނެ ކަަމަށްވެސް ޓްރަމްޕް ވަނީ ވިދާޅުވެފައެވެ.