ޔޫކްރެއިންގެ ރައީސްއާއެކު ބޭއްވުނީ "ވަރަށް ރަނގަޅު މަޝްވަރާތަކެއް":ޓްރަމްޕް

ޔޫކްރެއިންގެ ރައީސްއާ އެކު ބޭއްވި މަޝްވަރާތަކަކީ "ވަރަށް، ވަރަށް ރަނގަޅު މަޝްވަރާތަކެއް" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޔޫކްރެއިންގެ ރައީސް ޕެޓްރޯ ޕޮރޮޝެންކޯއާ އެކު ރައީސް ޑޮނަލްޑް ޓްރަމްޕް ބޭއްވެވި މަޝްވަރާތަކާ ބެހޭ ގޮތުން ވައިޓް ހައުސް އިން ބުނެފައިވަނީ ދެ ރައީސުން ވެސް އިރުމަތީ ޔޫކްރެއިން ގައި އުފެދިފައިވާ ހަމަނުޖެހުމަށް ސުލްހަވެރި ހައްލެއް ގެނައުމަށް ތާއިދު ކުރައްވާ ކަމަށެވެ. ޔޫކްރެއިންގެ އިރުމަތީ ސަރަހައްދުގައި ރަޝިޔާ އިން ވާގިވެރިވާ ހަނގުރާމަވެރިންނާ 2014 ފެށިގެން ޔޫކްރެއިން އިން ދަނީ ހަނގުރާމަ ކުރަމުންނެވެ.

ރިޕޯޓުތައް ބުނާގޮތުން ރައީސް ޓްރަމްޕް، އެމެރިކާ އާއި ރަޝިއާއާ މެދު އޮންނަ ގުޅުން އިތުރަށް ރަނގަޅު ކުރުމަށް ގޮވާލައްވާފައިވާތީ ޔޫކްރެއިންގެ ކަމާބެހޭ ފަރާތްތަކުން ވަނީ ކަންބޮޑުވެފައެވެ.

އަންގާރަ ދުވަހު ރައީސް ޓްރަމްޕާއި ރައީސް ޕޮރޮޝެންކޯ ބައްދަލު ކުރައްވާފައިވާއިރު، ރަޝިއާ އިން ޔޫކްރެއިންގައި ހިންގާ ހަރަކާތްތަކާމެދު އެމެރިކާ އިން ވަނީ ދަތިކުރުމުގެ އާ ފިޔަވަޅުތައް އަޅާނެ ކަމަށް އިއުލާންކޮށްފައެވެ.

ރައީސް ޕޮރޮޝެންކޯ ވަނީ ރައީސް ޓްރަމްޕާއި ބައްދަލު ކުރެއްވުމުގެ އިތުރުން އެމެރިކާގެ ސެކްރެޓަރީ އޮފް ސްޓޭޭޓް ރެކްސް ޓިލާސަން އާއި އަދި ޑިފެންސް ސެކްރެޓަރީ ޖިމް މެޓިސް އާ ވެސް ބައްދަލު ކުރައްވާފައެވެ.