ބޮޑުވަޒީރުގެ މަގާމުގައި ރާޖަޕަކްސް ހުރުމާ ދެކޮޅަށް ވަގުތީ އަމުރެއް ނެރެފި

ސްރީލަންކާގެ ބޮޑު ވަޒީރުގެ މަގާމުގައި މަހިންދަ ރާޖަޕަކްސަ ހުންނަވައިފިނަމަ އިއާދަނުކުރެވޭނެ ވަރުގެ ގެއްލުމެއް ލިބިދާނެކަމަށް ބުނެ، ބޮޑު ވަޒީރުގެ މަސްއޫލިއްޔަތު އަދާކުރުން މަނާކޮށް، ވަގުތީ ކޯޓު އަމުރެއް ނެރެފިއެވެ.

އެ ގައުމުގެ ކޯޓް އޮފް އެޕީލްސްއިން ނެރުނު އަމުރުގައި ބުނެފައިވަނީ ގާނޫނީ ގޮތުން ސައްހަކަން ކަށަވަރު ނުވާހާ ހިނދަކު ބޮޑު ވަޒީރުގެ މަގާމުގައި ދެމިހުރުމަކީ ގައުމީ މަސްލަހަތަށް އެދެވިގެންވާ ގޮތް ނޫންކަމުގައެވެ. އަދި ޑިސެމްބަރު 12 ގައި މި މައްސަލައިގެ ހުކުމް ކުރައްވާނެ ކަމަށް ވެސް އަމުރު ނެރުއްވި ގާޒީ އަރްޖުނަ އޮބޭސޭކަރަ ވަނީ ވިދާޅުވެފައެވެ. މި އަމުރާއި ގުޅިގެން މިހާރު ލަންކާގައި ސަރުކާރެއް ނެތެވެ.

ރާޖަޕަކްސަ ވަނީ ކޯޓުގެ ނިންމުން ގަބޫލުނުކުރައްވާ ކަމަށް ވިދާޅުވުމަށް ފަހު މި ނިންމުން ސުޕްރީމް ކޯޓުގައި އިސްތިއުނާފު ކުރައްވާނެ ކަން ހާމަކުރައްވާފައެވެ.

ރާޖަޕަކްސަ ވަނީ ދެ ފަހަރެއްގެ މަތިން އިތުބާރު ނެތް ކަމަށް މަޖިލިހުން ފާސްކުރުމުން ވެސް، ސައްހަ ނޫން ވޯޓެއް ކަމަށް ބުނެ، ބޮޑު ވަޒީރުގެ މަގާމުން އިސްތިއުފާ ދެއްވަން ދެކޮޅު ހައްދަވާފައެވެ. ނަމަވެސް ރައީސް ސިރިސޭނާ ވަނީ ރަނިލް ވިކްރަމަސިންހަ (މަގާމުން ދުރުކުރެވުނު ބޮޑު ވަޒީރު) ނޫން ބޭފުޅަކު ބޮޑު ވަޒީރުކަމަށް އައްޔަން ކުރަން އެބޭފުޅާގެ އެއްބާރުލުން ލިބޭނެކަން ހާމަކުރައްވާފައެވެ.