ކ. މާލެ
|
13 އޭޕްރިލް 2023 | ބުރާސްފަތި 07:19
މަޖިލީހުގެ ޖަލްސާގައި މިނިސްޓަރު މަޚްލޫފް
މަޖިލީހުގެ ޖަލްސާގައި މިނިސްޓަރު މަޚްލޫފް
ރައްޔިތުންގެ މަޖިލިސް
ރައްޔިތުންގެ މަޖިލިސް
ރަށްރަށުގައި ހުރި ފުޓްސަލް ދަނޑުތަކަކީ ކައުންސިލްގެ ތަންތަން: މަޚްލޫފް
 
ރަށްރަށުގައި ހުރި ދަނޑުތަކާއި، ކުޅިވަރު ކުޅޭ ތަންތަނަށް ހަދާނެ އެންމެ ރަނގަޅު ގޮތް އެނގޭނީ އެ ރަށުގެ ރައްޔިތުންނަށް

އަތޮޅުތެރޭގެ ރަށްރަށުގައި ޤާއިމުކޮށްފައިވާ ފުޓްސަލް ދަނޑުތަކާއި، ކުޅިވަރު ކުޅޭނެ އެހެން ތަންތަނަކީ ވެސް އެ ރަށެއް ކައުންސިލްގެ ބެލުމުގެ ދަށުގައި ހުންނަ ތަންތަން ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.

ބުދަ ދުވަހު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ނޮޅިވަރަމް ދާއިރާގެ މެންބަރު މުޙައްމަަދު ނަޝީދު ޢަބްދުﷲ (މޮސްޓާ) ކުރެއްވި ސުވާލަކީ މާލޭ ސަރަހައްދުގައި ޤާއިމުކޮށްފައިވާ ދަނޑުތައް ހުންނަނީ ކޮންމެ ވެސް ކުލަބަކަށް ހަވާލުކޮށްފައި ކަމަށެވެ. ހަމަ އެ އުސޫލުގެ ދަށުން ރަށްރަށުގައި ހުރި ފުޓްސަލް ދަނޑުތައް އެ ރަށެއް ކުލަބު ޖަމިއްޔާތަކާ ހަވާލު ނުކުރަންވީ ކީއްވެތޯ އެވެ. މޮސްޓާ ވިދާޅުވީ، ހުރިހަ ކުލަބު ޖަމިއްޔާތަކެއް ހުންނަނީ އެއް އިދާރާއެއްގެ ދަށުގައި ރަޖިސްޓްރީ ކުރެވިފައި ކަމަށާއި، އެހެންކަމުން ރަށްރަށުގެ އެ ފުރުސަތު ނޯވެ، މާލެ އަށް އެ ފުރުސަތު އޮންނަންވީ ސަބަބެއް އެނގިވަޑައިނުގަންނަވާ ކަމަަށެވެ.

ޖަވާބު ދެއްވަމުން މިނިސްޓަރު މަޚްލޫފް ވިދާޅުވީ، ޔޫތު މިނިސްޓްރީގެ ބެލުމުގެ ދަށުގައި ހުރި ދަނޑެއް އެއްވެސް ރަށެއްގައި ނޯންނާނެ ކަމަށެވެ. އެހެންކަމުން އެ ދަނޑުތަކަކީ އެ ރަށެއްގެ ކައުންސިލްގެ ބެލުމުގެ ދަށުގައިވާ ތަންތަން ކަމަށެވެ. އެގޮތުން މީގެ ތިން އަހަރެއްހާ ދުވަސް ކުރިން މިނިސްޓްރީން ވާނީ ކައުންސިލްތަކަށް އެކަން އަންގާފައި ކަމަށާއި އޭގެ ތެރޭގައި ކުޅިވަރު ކުޅޭ ތަންތަން ބޭނުންކޮށްގެން ދެމެހެއްޓެނިވި ގޮތެއްގައި އާމްދަނީ ހޯދޭނެ ގޮތަކަށް ކުރިއަށް ގެންދިޔުމަށް ވެސް އަންގާފައިވާނެ ކަމަށް މަޚްލޫފް ވިދާޅުވި އެވެ. ރަށްރަށުގައި ހުރި ދަނޑުތަކާއި، ކުޅިވަރު ކުޅޭ ތަންތަނަށް ހަދާނެ އެންމެ ރަނގަޅު ގޮތް އެނގޭނީ އެ ރަށުގެ ރައްޔިތުންނަށް ކަމަށާއި، އެކަމަކީ ޔޫތު މިނިސްޓްރީ އަށް އެނގޭނެ ކަންކަމެއް ނޫން ކަމަށް ފާހަގަ ކުރަައްވަމުން މަޚްލޫފް ވިދާޅުވީ، އެ ބާރު އޮންނާނީ ކައުންސިލްތަކުގެ އަތް މަތީގައި ކަމަށެވެ.

މީގެ ކުރިން ވެސް މަޚްލޫފް ވަނީ މަޖިލީހުގައި މި ވާހަކަ ދައްކަވައިފަ އެވެ. އޭރު މަޚްލޫފް ވިދާޅުވީ ރަށެއްގައި އަޅާފައި އޮންނަ ދަނޑެއްގެ ލައިޓް އަނދައިގެން މިނިސްޓަރު މަޖިލީހަށް ހާޟިރުކުރުމަކީ އެންމެ ރަނގަޅު ގޮތް ނޫން ކަމަށެވެ. މަޚްލޫފް ވިދާޅުވީ މިނިސްޓްރީން ލައިޓް ފޯރުކޮށްދެންދެން ދަނޑު ބޭނުން ނުކޮށް ބޭއްވުމަށްވުރެ، ރަށްރަށުގެ ކައުންސިލްތަކަށް ވެސް އެކަން ކޮށްލެވޭނެ ކަމަށް ޤަބޫލުކުރައްވާ ކަމަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް