ޗެރިޓީ ޝިލްޑް މެޗުގައި މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ނިކުންނާނީ ނެގެންހުރި ހަތިޔާރެއް ނަގައިގެންކަމަށް ވެލެންސިއާގެ ކޯޗު އަހުމަދު މުޖުތަބާ (ފެސްކޯ) ބުނެފި އެވެ.
ބުރާސްފަތި ދުވަހު ކުޅޭ މެޗުގެ ކުރިން ނޫސްވެރިންނަށް މައުލޫމާތު ދެމުން ފެސްކޯ ބުނީ މެޗަށް ތައްޔާރުވާން ވެލެންސިއާއަށް އެކަށީގެންވާ ވަގުތު ނުލިބުނު ނަމަވެސް ރަނގަޅު ކުޅުމެއް ޓީމުގެ ފަރާތުން ފެނިގެންދާނެ ކަމަށެވެ. އެގޮތުން ފެސްކޯ ބުނީ ތިމްޕޫ މެޗުގައި ފެނިގެންދިޔަ ކަންތައްތައް ރަނގަޅުކުރަން އެދެވޭ ވަގުތެއް ލިބިފައިނުވާ ކަމަށާއި، މާޒިޔާއާ ދެކޮޅަށް ވެލެންސިއާ ނިކުންނާނީ ނެގެން އޮތް ހަތިޔާރަކާއެކީ ކަމަށެވެ.
އޭއެފްސީ ކަޕްގައި ދައްކާ ކުޅުމާ ޗެރިޓީ މެޗެއްގައި ދައްކާ ކުޅުން ތަފާތުވާނެކަން ފާހަގަކުރަމުން ފެސްކޯ ބުނީ ވާދަވެރި ދެ މެޗު ކުޅެން ފުރުސަތު ލިބުމަކީ ޓީމަށް ލިބޭ އެޑްވާންޓޭޖެކޭ ވެސް ބުނެވިދާނެ ކަމަށެވެ. އެހެން ނަމަވެސް އޭނާ ބުނީ ނަތީޖާ ނެރެންޖެހޭ މެޗަކަށްވުމުން ވާނެ ގޮތެއް ބުނަން ނޭނގޭ ކަމަށެވެ. އެގޮތުން އޭނާ ބުނީ މޮޅުވާނީ އެންމެ ރަނގަޅު ކުޅުން ދައްކާ ޓީމު ކަމަށެވެ.
ރާއްޖޭގައި ތިމްޕޫއާ ދެކޮޅަށް ވެލެންސިއާ ދެއްކި ކުޅުން ރަނގަޅުކަން ފާހަގަކުރަމުން ފެސްކޯ ބުނީ ޓީމަށް އިތުރު ބަދަލެއް އަންނާނެ ކަމަށް ގަބޫލުނުކުރެވޭ ކަމަށާއި، އެހެންނަމަވެސް ކުޅުންތެރިޔަކަށް ދިމަވާ ކަމަކުން ބަދަލެއް އައުމަކީ އެކަށީގެންވާ ކަމެއް ކަމަށެވެ.
އޭއެފްސީ ކަޕްގައި ވެލެންސިއާ ވަނީ ތިމްޕޫ ސިޓީއާ ދެކޮޅަށް ދެ މެޗު ކުޅެފައެވެ. އޭގެ ތެރެއިން ކުޅުނު ފުރަތަމަ މެޗު ބޫޓާންގައި 0-0 ގެ ނަތީޖާއިން އެއްވަރުވިއިރު، ދެވަނަ މެޗު ރާއްޖޭގައި ކުޅެ 0-3 ގެ ނަތީޖާއިން ވެލެންސިއާ ވަނީ މޮޅުވެފައެވެ.
