އަރަބިއްޔާ ސްކޫލުގައި ކިޔަވާ ދަރިވަރުންނަށް ވެސް އޯލެވެލް އަދި އޭލެވެލްގެ ގަދަ 10ގައި ވާދަ ކުރެވޭ ގޮތަށް އުސޫލު ބަދަލުކޮށްފިއެވެ.
"ސާނަވީ ސްކޫލްގެ ކިޔެވުމާއި މަތީ ސާނަވީ ސްކޫލް ނިންމާ އިމްތިހާންތަކުން އެންމެ ރަނގަޅު 10 ނަތީޖާ ހޯދި ދަރިވަރުން ކަނޑައަޅާ އުސޫލު'' އަށް ބަދަލު ގެނެސްފައިވާއިރު، މީގެ ކުރިން އަރަބިއްޔާ ސްކޫލުން ކިޔަވާ ދަރިވަރުންނަށް ގަދަ 10ގައި ވާދައެއް ނުކުރެވެ އެވެ. ނަމަވެސް އަންގާރަ ދުވަހު އުސޫލު ބަދަލު ގެނެސްފައިވަނީ ގަދަ 10ގައި އަރަބިއްޔާ ސްކޫލަށް ވާދަކުރެވޭގޮތަށެވެ.
އުސޫލުގައި ބުނެފައި ވަނީ ގަދަ 10 ހޮވުމަށް މީގެ ކުރިން އިނގިރޭސި މީޑިއަމަށް ބެލި ނަމަވެސް އަރަބި މީޑިއަމަށް ކިޔަވައިދޭ ސްކޫލުތަކުގައި ޝަހާދާއި އިއުދާދީ އިމްތިހާނުގެ ނަތީޖާ ވެސް ގަބޫލުކުރާނެ ކަމަށެވެ.
އެގޮތުން އަރަބި މަންހަޖަށް ކިޔަވައިދޭ ސްކޫލުތަކުން އެންމެ ރަނގަޅު ނަތީޖާ ހޯދާ ދަރިވަރުން އޯލެވެެލްގައި ކަނޑައަޅާނީ ގްރޭޑް ނުވައެއް ނިންމާ (ޝަހާދާ އިއުދާދީ) މާއްދާތަކުގެ ނަތީޖާއާއި އެ ދަރިވަރު ގްރޭޑް 10 ނިންމާ އޯލެވެލް އަދި އޭލެވެލް އިމްތިހާނުގެ ނަތީޖާއަށް ބަލައިގެން ކަމަށް އުސޫލުގައި ބުނެފައިވެއެވެ. އަދި އޭލެވެލްގައި ގަދަ 10 ކަނޑައަޅަނީ ގްރޭޑް 12ގެ ދަރިވަރުންގެ ތެރެއިން ޝަހާދާ ސާނަވިއްޔާ ނިންމާ ދަރިވަރުންގެ ނަތީޖާއަށް ބަލައިގެންނެވެ. ނަތީޖާ ކަނޑައެޅުމުގައި އާޓް ސްޓްރީމް ކިޔަވާ ދަރިވަރުންގެ އަށް މާއްދާ އަދި ސައިންސް ސްޓްރީމް ކިޔަވާ ދަރިވަރުންގެ ނުވަ މާއްދާއަށް ބަލާނެ ކަމަށް ވެސް އުސޫލުގައި ބުނެފައިވެއެވެ.
ސާނަވީ ތައުލީމު ނިންމާ ދަރިވަރުންގެ ތެރެއިން އަރަބިއްޔާ ސްކޫލްގެ ދަރިވަރުންނަށް ގަދަ 10 ގައި ވާދަ ނުކުރެވޭގޮތަށް ޒާމާނުއްސުރެ އޮތް އޮތުން ބަދަލުވެގެން ދިއުމަކީ އަރަބިއްޔާ ސްކޫލަށް ލިބުނު އިތުރު ކުރިއެރުމެކެވެ. މީގެ ކުރިން އަރަބިއްޔާ ސްކޫލުގައި ކިޔަވާ ދަރިވަރުންނަށް ބައިވެރިނުވެވޭތީ އެކަމުގެ ކަންބޮޑުވުން އަރަބިއްޔާ ސްކޫލުގެ ދަރިވަރުންނާއި، ބެލެނިވެރިންކޮށްފައިވެއެވެ.
