ބޮޑު ތަފާތަކުން އަރަބިއްޔާ ބަލިކޮށް ވިލާ ސްކޫލަށް ހަމަޖެހުމެއް

މިހާރު ކުރިއަށްދާ 19 އަހަރުން ދަށުގެ އިންޓަރ ސްކޫލް ފުޓްބޯޅަ މުބާރާތުގައި ކުޅުނު ދެވަނަ މެޗުގައި ބޮޑު ތަފާތަކުން އަރަބިއްޔާ ސްކޫލް ބަލިކޮށް، ވިލާ އިންޓަނޭޝަނަލް ހައި ސްކޫލުން މުބާރާތުގައި ކުރިއަށް ދިއުމުގެ އުންމީދު ހޯދައިފިއެވެ.

ހޯމަ ދުވަހުގެ ހަވީރު އަރަބިއްޔާ އާއި ވާދަކުރި މެޗު ވިލާއިން ކާމިޔާބުކުރީ 14-0ންނެވެ. މެޗުގެ ފުރަތަމަ ހާފުގައި ވިލާއިން ނުވަ ލަނޑު ޖެހިއެވެ. މުބާރާތުގައި ވިލާ ސްކޫލް ކުޅުނު ފުރަތަމަ މެޗުގައި ކެޔޮދޫ ސްކޫލާއި ވާދަކޮށް ބަލިވީ 2-1ންނެވެ. އެހެންކަމުން މި މެޗުގައި ތަފާތު ބޮޑު ނަތީޖާއެއް ހޯދުމަކީ މުބާރާތުގައި އިތުރަށް ކުރިއަށް ދިއުމަށް ވިލާ ސްކޫލަށް ލިބުނު ވަރަށް ބޮޑު ހިތްވަރެކެވެ.

ހޯމަ ދުވަހުގެރޭ ކުޅުނު މެޗުގައި ބައްދަލުކުރީ ސެންޓަރ ފޯރ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) އާއި ކެޔޮދޫ ސްކޫލެވެ. މި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.

މި ނަތީޖާތަކާއެކު ތާވަލުގެ އެއްވަނައިގައި ތިން ޕޮއިންޓު ހޯދައިގެން އޮތީ އަހްމަދިއްޔާ އިންޓަރނޭޝަނަލް ސްކޫލެވެ. ދެވަނައިގައި އޮތް ވިލާ ސްކޫލާއި ތިން ވަނައިގައި އޮތް ކެޔޮދޫ ސްކޫލަށްވެސް ލިބެނީ ތިން ޕޮއިންޓެވެ. ހަތަރުވަނައިގައި ސީއެޗްއެސްއީ އޮތީ އެއް ޕޮއިންޓު ހޯދައިގެންނެވެ. ތާވަލުގެ ފުލުގައި ޕޮއިންޓެއް ނުލިބި އޮތީ ކުޅުނު ދެމެޗުންވެސް ބޮޑު ތަފާތަކުން ބަލިވި އަރަބިއްޔާ ސްކޫލެވެ.

ފަސް ޓިމު ވާދަކުރާ މި މުބާރާތް ކުރިއަށް ދަނީ ލީގު ބުރެއް ކުޅުމަށްފަހު އެންމެ ގިނަ ޕޮއިންޓު ހޯދާ ޓީމެއް ފައިނަލަށް ދަތުރުކުރާ ގޮތަށެވެ. ފައިނަލްގައި ވާދަކުރާ ދެވަނަ ޓީމު ކަނޑައަޅާނީ ލީގު ބުރު ނިމޭއިރު ދެވަނަ އަދި ތިންވަނައަށް އެންމެ ގިނަ ޕޮއިންޓު ހޯދާ ދެޓީމެއް ކުޅޭ ސެމީ ފައިނަލުންނެވެ. ހުރިހާ މެޗެއްވެސް ކުރިއަށްދަނީ އެފްއޭއެމްގެ އެއްނަންބަރު ޓާފުގައެވެ.

މުބާރާތުގައި ދެން އެންމެ އަވަހަށް މެޗެއް އޮންނާނީ ބުދަ ދުވަހުއެވެ. ބުދަ ދުވަހުގެ ހަވީރު ބައްދަލުކުރާނީ އަރަބިއްޔާ ސްކޫލާއި ކެޔޮދޫ ސްކޫލެވެ. އަހްމަދިއްޔާ އާއި ސީއެޗްއެސްއީ ބައްދަލުކުރާ މެޗު އޮންނާނީ ބުދަ ދުވަހުގެރޭ ނުވައެއް ޖަހާއިރުއެވެ.