މިހާރު ކުރިއަށްދާ 19 އަހަރުން ދަށުގެ އިންޓަރ ސްކޫލް ފުޓްބޯޅަ މުބާރާތުގައި ކުޅުނު ފުރަތަމަ މެޗުގައި 20 ލަނޑު ޖަހައިގެން މޮޅުވެ، އަހުމަދިއްޔާ އިންޓަރނޭޝަނަލް ސްކޫލްގެ ފެށުން ރަނގަޅުކޮށްފިއެވެ.

މުބާރާތް ފެށީ ބުދަ ދުވަހުއެވެ. ފުރަތަމަ މެޗުގައި ބައްދަލުކުރީ އަހުމަދިއްޔާއާއި އަރަބިއްޔާ ސްކޫލެވެ. މި މެޗު އަހުމަދިއްޔާއިން ކާމިޔާބުކުރީ 20-0ގެ ތަފާތު ބޮޑު ނަތީޖާއަކުންނެވެ. އަހުމަދިއްޔާގެ ލަނޑުތައް ކާމިޔާބުކޮށްދިނީ މުހައްމަދު ހޫދު އަހްމަދު، އިބްރާހީމް ނަވާފް ސައީދު، މުހައްމަދު އައިހަމް، މައިޝަން މުހައްމަދު ރަޝީދު، މުހައްމަދު ލީވާން ހުސައިން، ރަޒާން އިބްރާހީމް އަފްރާހް އަދި މުހައްމަދު ވިއާމް ލަތީފްގެ އިތުރުން ޝައިބާން އަބްދުލް ހަސީބްއެވެ. މި މެޗުގައި އައިހަމް ވަނީ ހަތް ލަނޑު ޖަހާފައެވެ. ނަވާފް ހަތަރު ލަނޑު ޖެހިއިރު، މައިޝަން ތިން ލަނޑު، އަދި ހޫދު ދެލަނޑު ވަނީ ޖަހާފައެވެ. ބާކީ ކޮންމެ ކުޅުންތެރިއަކު ޖެހީ އެއް ލަނޑެވެ.

މުބާރާތުގެ ދެވަނަ މެޗުގައި ބައްދަލުކުރީ ވިލާ އިންޓަރނޭޝަނަލް ހައި ސްކޫލާއި ކެޔޮދޫ ސްކޫލެވެ. މި މެޗު 2-1ން ކާމިޔާބުކުރީ ކެޔޮދޫ ސްކޫލެވެ. މެޗުގެ ފުރަތަމަ ހާފުގައި ލަނޑު ޖަހައި ލީޑް ނެގީ ވިލާ ސްކޫލުންނެވެ. މި ލަނޑު އެޓީމަށް ކާމިޔާބުކޮށްދިނީ ޔޫޝައު ބިން އަލީ ނަޝީދެވެ. ނަމަވެސް ދެވަނަ ހާފުގައި ކެޔޮދޫ ސްކޫލުން ދެލަނޑު ޖަހައި ނަތީޖާ އަނބުރާލީއެވެ. ކެެޔޮދޫ ސްކޫލަށް ނަތީޖާ ހަމަހަމަކޮށްދިނީ އަޒާން އާދަމް ރަޝީދެވެ. މެޗުން މޮޅުކޮށްދިން ލަނޑު ޖެހީ އަހްމަދު މާހިލް އިބްރާހީމެވެ.

މި މުބާރާތް ކުރިއަށް ދަނީ ލީގު ބުރެއް ކުޅުމަށްފަހު އެންމެ ގިނަ ޕޮއިންޓު ހޯދާ ޓީމެއް ފައިނަލަށް ދަތުރުކުރާ ގޮތަށެވެ. ފައިނަލްގައި ވާދަކުރާ ދެވަނަ ޓީމު ކަނޑައަޅާނީ ލީގު ބުރު ނިމޭއިރު ދެވަނަ އަދި ތިންވަނައަށް އެންމެ ގިނަ ޕޮއިންޓު ހޯދާ ދެޓީމެއް ކުޅޭ ސެމީ ފައިނަލުންނެވެ. ހުރިހާ މެޗެއްވެސް ކުރިއަށްދަނީ އެފްއޭއެމްގެ އެއްނަންބަރު ޓާފުގައެވެ.

މުބާރާތުގައި ދެން މެޗެއް އޮންނާނީ މިމަހުގެ 12 ވަނަ ދުވަހުއެވެ. އެދުވަހުގެ ހަވީރު 16:00ގައި ބައްދަލުކުރާނީ ވިލާ ސްކޫލާއި އަރަބިއްޔާ ސްކޫލެވެ. ރޭގަނޑު 21:00ގައި އޮންނާނީ ކެޔޮދޫ ސްކޫލާއި ސީއެޗްއެސްއީ ބައްދަލުކުރާ މެޗެވެ.