އަރަބިއްޔާގެ ހިންގުން އިސްކަންދަރުގެ ޕްރިންސިޕަލާ ހަވާލުކޮށްފި

އަރަބިއްޔާ ސްކޫލުގެ ހިންގުން އިސްކަންދަރު ސްކޫލުގެ ޕްރިންސިޕަލާ ހަވާލުކޮށްފިއެވެ.

އެޑިއުކޭޝަން މިނިސްޓްރީން ބުނީ އަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް ދަރިވަރުންނަށް އެންމެ ފަހި ގޮތަށް ކަންކަން ރާވައި އިންތިޒާމުކުރުމަށް އިދާރީ ގޮތުން ގެނެވުނު ބަދަލެއްގެ ގޮތުން، 7 ނޮވެންބަރުން ފެށިގެން އެ ސްކޫލުގެ ހިންގުން ކަންދަރު ސްކޫލުގެ ޕްރިންސިޕަލާ ހަވާލުކޮށްފައިވާކަމަށެވެ.

މައުލޫމާތުލިބޭގޮތުގަައި، އަރަބިއްޔާ ސްކޫލުގައި ހުންނެވި ޕްރިންސިޕަލް މުހައްމަދު ޝުޖާއު އަބްދުލްރަހީމް ވަނީ އެންއައިއީއަށް ބަދަލުކޮށްފައެވެ. އެއާއެކު މިހާރު އަރަބިއްޔާ ސްކޫލްގެ ހިންގެވުމާ ހަވާލުވެ ހުންނެވީ އިސްކަންދަރު ސްކޫލުގެ ޕްރިންސިޕަލް ހުސައިން ސައީދެވެ.

އަރަބިއްޔާ ސްކޫލުގެ ހިންގުމަށް ބޮޑު ބަދަލެއް ގެނެސްފައިވާއިރު އެ ސްކޫލުގެ ބެލެނިވެރިން ދާދި ފަހުންވެސް ވަނީ ގިނަ ކަންބޮޑުވުންތަކެއް ފާޅުކޮށްފައެވެ. މިހާރު އަރަބިއްޔާ ސްކޫލް ވަގުތީގޮތުން ހިންގަމުންދާ އިމާރާތަކުގައި އެކަށީގެންވާ ވަސީލަތްތައް ނެތުމާއި، ކިޔެވުމަށް ދަރިވަރުންނަށް ދަތިވާކަން ބެލެނިވެރިން ވަނީ ފާހަގަކޮށްފައެވެ. އަދި ސަރުކާރުން އެ ސްކޫލަށް އަޅާނުލާކަމަށްބުނެ، އަރަބިއްޔާގެ ބެލެނިވެރިން ކަންބޮޑުވުން ފާޅުކޮށްފައިވެއެވެ.

ކުރިން އަރަބިއްޔާ ސްކޫލް ހިންގި އިމާރާތަކީ ދަރިވަރުން ކިޔަވަން އެކަށީގެންވާ ތަނަކަށް ނުވާތީ މިހާރު އަރަބިއްޔާ ސްކޫލުގެ ދަރިވަރުން ކިޔަވަނީ ކުރިން ފޮރިން މިނިސްޓްރީ ހިންގި އިމާރާތުގައެވެ. އަދި ކުރީގެ ޖަމާލުއްދީން ސްކޫލް ހިންގި ބިމުގައި ސްކޫލެއް އެޅުމުގެ މަސައްކަތް ސަރުކާރުން ދަނީ ކުރަމުންނެވެ.