އަރަބިއްޔާ ސްކޫލް އެޅުމުގެ މަސައްކަތް ނުހުއްޓޭނެކަމުގެ ޔަގީންކަންދެން: މިނިސްޓަރ އެޓް ޕްރެޒިޑެންޓްސް އޮފީސް
އަރަބިއްޔާ ސުކޫލުގެ އައު އިމާރާތް އެޅުމަށް ސަރުކާރުން އަމީން ކޮންސްޓްރަކްޝަނާ ހަވާލުކުރީ މިދިޔަ ސެޕްޓެމްބަރު މަހުގެ 29 ވަނަ ދުވަހު
މިނިސްޓަރ އެޓް ދަ ޕްރެޒިޑެންޓްސް އޮފީސް އަހުމަދު ސަމީރު
އަރަބިއްޔާ ސްކޫލްގެ އައު އިމާރާތް އެޅުމުގެ މަސައްކަތް ހުއްޓިގެން ނުދާނެކަމަށާއި އަންނަ އަހަރުގެ ބަޖެޓުުން އިމާރާތް އެޅުމަށްޓަކައި ކުރަންޖެހޭ މަސައްކަތްތައް ކުރަމުންދާނެކަމުގެ ޔަގީންކަން ސަރުކާރު ދެއްވާކަމަށް މިނިސްޓަރ އެޓް ދަ ޕްރެޒިޑެންޓްސް އޮފީސް އަހުމަދު ސަމީރު ވިދާޅުވެއްޖެއެވެ.
ފިނޭންސް މިނިސްޓަރު އިބްރާހިމް އަމީރު މިދިޔަ ހޯމަ ދުވަހު ރައްޔިތުންގެ މަޖިލިހަށް ހުށަހެޅުއްވި ބަޖެޓުގައި އަރަބިއްޔާ ސްކޫލުގެ ހަރަދުތަކަށް 34.7 މިލިއަން ރުފިޔާ ހިމަނާފައި ވިޔަސް ބާ ޖަމާލުއްދީން ސްކޫލުގެ ބިމުގައި ހަދަން ނިންމައި ކޮންޓްރެކްޓަރާ ހަވާލު ކޮށްފައިވާ އަރަބިއްޔާގެ އައު އިމާރާތުގެ ހަރަދުގެ ވާހަކައެއް ހިމަނާފައެއް ނުވެއެވެ.
އެ މައްސަލަ އާންމުންގެ ސަމާލުކަމަށް އައީ އަރަބިއްޔާ ސްކޫލްގެ ނަމުގައި އިމާރާތެއް ހެދުމަށް ބަޖެޓުގައި ހިމަނާފައި ނެތް ކަމަށް ވިދާޅުވެ، ރައްޔިތުންގެ މަޖިލީހުގެ މަހިބަދޫ ދައިރާގެ ޕީޕީއެމްގެ މެންބަރު އަހުމަދު ތޯރިގު ވާހަކަދެއްކެވުމުންނެވެ. އެކަމުގެ ކަންބޮޑުވުން އާންމުން ވެސް ވަނީ ފާޅުކޮށްފައެވެ.
އެކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ސަމީރު ވިދާޅުވީ އަރަބިއްޔާ ސްކޫލްގެ އައު އިމާރާތް އެޅުމަށް ވަނީ ބަޔަކާ އެކު ކޮންޓްރެކްޓުގައި ސޮއިކޮށްފައިކަމަށެވެ. މިހާރު ވެސް އަރަބިއްޔާގެ ސްކޫލްގެ އައު އިމާރާތް އެޅުމުގެ މަސައްކަތް ހުއްޓުމެއްނެތި ކުރިޔަށްދާކަން ފާހަގަކުރައްވާ ސަމީރު ވިދާޅުވީ އަރަބިއްޔާގެ އައު އިމާރާތް އެޅުމަށް އަމީން ކޮންސްޓްރަކްޝަނާއި ހަވާލުކޮށްފައިވާއިރު އެމަސައްކަތުގެ އެއްބަސްވުމާއި އެއްގޮތަށް ކުރިޔަށްދާނެކަމަށެވެ. އަދި ކޮންޓްރެކްޓު ހަދައިގެން އަގު ދޭ ގޮތަށް އެއްބަސްވުމުގައި ސޮއިކޮށްފައި އޮންނަ ނަމަ މަސައްކަތްކުރިޔަށްދާނެކަމަށެވެ.
ރައްޔިތުންގެ މަޖިލީހަށް މިހާރު ހުށަހަޅާފައިވާ ބަޖެޓުގައި އަރަބިއްޔާގެ ނަމުގައި ޖަހާފައި ނެތްނަމަވެސް އެމަސައްކަތް ހުއްޓުމެއްނެތި ކުރިޔަށްދާނެކަމަށް ސަމީރު ވިދާޅުވިއެވެ.
ސަމީރު ވިދާޅުވީ ބަޖެޓް ދިރާސާކުރުމުގެ މަސައްކަތް ކޮމިޓީގައި ކުރިޔަށްދާއިރު އަދި ބަޖެޓަށް ބަދަލުތަކެއް ގެނެވޭނެކަމަށެވެ. އެހެންކަމުން ބަޖެޓް ފާސްވެގެން އަންނައިރު އަރަބިއްޔާގެ އައު އިމާރާތުގެ ވާހަކަ އޮންނާނެކަމަށް ސަމީރު ވިދާޅުވިއެވެ.
އަރަބިއްޔާ ސުކޫލުގެ އައު އިމާރާތް އެޅުމަށް ސަރުކާރުން އަމީން ކޮންސްޓްރަކްޝަނާ ހަވާލުކުރީ މިދިޔަ ސެޕްޓެމްބަރު މަހުގެ 29 ވަނަ ދުވަހުއެވެ. އެއީ 420 ދުވަހުގެ ތެރޭގައި މަސައްކަތް ނިންމާގޮތަށެވެ. އެއީ 168 މިލިއަން ރުފިޔާގެ މަޝްރޫއެކެވެ.
މި މަޝްރޫއުގެ ދަށުން ބާ ޖަމާލުއްދީން ހުރި ސަރަހައްދުގައި 40 ކްލާސްރޫމާއި މަލްޓިޕާޕަސް ހޯލެއް އިމާރާތް ކުރުމަށް ވަނީ ހަމަޖެހިފައެވެ. އަދި ހަތަރު ލިފްޓު ހަރުކުރާނެއެވެ.
700 އަށްވުރެ ގިނަ ކުދިން ކިޔަވަމުން އަންނަ އަރަބިއްޔާ ސްކޫލަކީ ރާއްޖޭގައި އަރަބި މީޑިއަމަށް ކިޔަވައިދޭ ހަމައެކަނި ސްކޫލެވެ.
