ދަރިވަރަކާ ދިމާލަށް ޓެރަރިސްޓެއް ކަމަށް ބުނެފައި ނުވާނެ، ފަތުރަމުން ދަނީ ހަގީގަތާ ޚިލާފު ވާހަކަތަކެއް: އަރަބިއްޔާ ސްކޫލު
ޔުނީފޯމް ކޯޑާ އެއްގޮތަށް ޔުނީފޯމް ބޭނުން ކުރުމަށް އިލްތިމާސްކުރުމަކީ ސުކޫލުން އަބަދު ވެސް ކުރަމުންދާ ކަމެއް
އަރަބިއްޔާ ސްކޫލުގެ ދަރިވަރުންތަކެއް
އެއްވެސް ދަރިވަރަކާ ދިމާލަށް ޓެރަރިސްޓެއް ކަމަށް ސްކޫލްގެ އެއްވެސް މުވައްޒަފަކު ބުނެފައި ނުވާ ކަމަށާއި ފަތުރަމުން ދަނީ ހަގީގަތާ ހިލާފް ވާހަކަތަކެއް ކަމަށް އަރަބިއްޔާ ސްކޫލުން ބުނެފިއެވެ.
އަރަބިއްޔާ ސްކޫލުން ބުނީ ޔުނިފޯމު އުސޫލާ އެއްގޮތަށް ބައެއް ދަރިވަރުން ޔުނީފޯމު ބޭނުން ނުކުރާތީ ދޭތެރެ ދޭތެރެއިން އެފަދަ ދަރިވަރުންނާއި ބެލެނިވެރިންނަށް އެކަން ހަނދާންކޮށްދީ، ޔުނީފޯމް ކޯޑާ އެއްގޮތަށް ޔުނީފޯމް ބޭނުން ކުރުމަށް އިލްތިމާސްކުރުމަކީ ސުކޫލުން އަބަދު ވެސް ކުރަމުންދާ ކަމެއް ކަމަށެވެ. އަދި ޔުނީފޯމު ކޯޑާ އެއްގޮތަށް އަމަލުކުރުމަށް އެންގުނު އެއްވެސް ދަރިވަރަކަށް އެއްވެސް ގޮތަކުން ބިރު ދައްކާފައިނުވާނެ ކަމަށާއި، މިފަދަ އެއްވެސް ދަރިވަރަކު ސްކޫލަށް ނައިސް ނުހުންނަ ކަމުގެ ޔަގީންކަން އަރަބިއްޔާ ސްކޫލުން ދީފައިވެއެވެ.
ނަމަވެސް ކަމުގެ ހަގީގަތް އޮޅޭ ގޮތަށް ބައެއް ފަރާތްތަކުން ސޯޝަލް މީޑިއާގެ ތަފާތު މަންސަތަކުގައި ސްކޫލު ބަދުނާމުވާ ގޮތަށް ތަފާތު ވާހަކަތައް ހިއްސާކުރަމުންދާކަން ފާހަގަކޮށް އަރަބިއްޔާ ސްކޫލުން ބުނެފައިވަނީ މިހުރިހާ ވާހަކަތަކަކީ އެއްވެސް އަސްލެއް ނެތް ވާހަކަތަކެއް ކަމަށާއި، ސްކޫލުގެ އެއްވެސް މުވައްޒަފަކު ދުވަހަކު ވެސް ދަރިވަރުންނަކީ ޓެރަރިސްޓުންނަށް ހަދާފައިނުވާނެ ކަމަށެވެ. އަދި އެފަދަ މާނައެއް ދޭހަވާ ފަދަ އިބާރާތެއް ވެސް ބޭނުންކޮށްފައިނުވާ ކަމަށް އަރަބިއްޔާ ސްކޫލުން ބުނެއެވެ.
އަރަބިއްޔާ ސްކޫލުން ބުނީ ސްކޫލާ ގުޅޭގޮތުން އެކިއެކި ގޮތްގޮތަށް ފަތުރަމުން ގެންދާ ހަގީގަތާއި ހިލާފު ވާހަކަތައް ފަތުރާ މަދު ފަރާތްތަކުގެ ބޭނުމަކީ ފިތުނަ ފަސާދައުފެއްދުއް ކަމަށެވެ. މިކަމުގެ ސަބަބުން ސްކޫލު ބަދުނާމުވަމުން ދިއުމަކީ ނުހަނު ހިތާމަ ކުރަންޖެހޭ ކަމެއް ކަމަށް އަރަބިއްޔާ ސްކޫލުން ބުނެއެވެ. މިކަމާ މެދު ގިނަ ބެލެނިވެރިންނާއި މުވައްޒަފުން ވެސް ކަންބޮޑުވާކަން ފާހަގަކޮށް އަރަބިއްޔާ ސްކޫލުން ބުނީ މިފަދަ ހަގީގަތެއް ނެތް ބިރުވެރި ވާހަކަތައް ފެތުރުމަކީ ނަފުސާނީ ގޮތުންނާއި އެހެނިހެން ގޮތްގޮތުން ތަނުގައި މަސައްކަތް ކުރާ މުވައްޒަފުންނަށް ނޭދެވޭ އަސަރުތަކެއް ކުރާނެ ކަމެއް ކަމަށެވެ. އަދި އަރަބިއްޔާ ސްކޫލަށް އަންނާނޭ މުދައްރިސުން ލިބުމުގެ ދަތިކަން ކުރިމަތިވެދާނެ ކަމުގެ ބިރު އޮތްކަން ފާހަގަކޮށްފައިވެއެވެ.
އެހެންކަމުން ސްކޫލު ބަދުނާމުވާ ގޮތަށް ސޯޝަލް މީޑިއާގައި ފަތުރަމުންދާ ހަގީގަތާ ހިލާފު ފޮޓޯތަކާއި ވާހަކަތައް އެންމެ ހަރުކަށި އިބާރާތުން ކުށްވެރިކޮށް، އެފަދަ އަސްލެއްނެތް އަމަލުތައް ނުހިންގުމަށް އަރަބިއްޔާ ސްކޫލުން ވަނީ އިލްތިމާސްކޮށްފައެވެ.
