ކޮވިޑް ކޭސްތަކުގެ އަދަދު ގިނަވެއްޖެ؛ 16 މީހަކަށް ހޮސްޕިޓަލުގައި ފަރުވާދެނީ

ރާއްޖޭގައި ކޮވިޑް ޖެހޭ މީހުންގެ އަދަދު ކުއްލިއަކަށް އިތުރުވެއްޖެއެވެ.

ފާއިތުވި ދުވަސްތަކުގައި ރާއްޖޭގައި ކޮވިޑް-19ގެ ކޭސްތަކުގެ އަދަދު ވަރަށް ދަށެވެ. އެހެން ނަމަވެސް، އެތައް މަހަކަށްފަހު, ނިމިދިޔަ ހަފުތާގެ ތެރޭގައި ކޮވިޑް ކޭސްތައް އިތުރުވެފައިވާކަމަށް، ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުތަކުން ދައްކައެވެ. އެ އިދާރާގެ ތަފާސްހިސާބުތަކުން ދައްކާގޮތުގައި މާރިޗް 26ން އޭޕްރީލް 1ށް 39 މީހަކަށް ވަނީ ކޮވިޑް ޖެހިފައެވެ.

އެއީ މާލޭ ސަރަހައްދުން ރެކޯޑް ކުރެވިފައިވާ 29 ކޭހާއި ރިސޯޓްތަކާއި ސިނާއީ މަސައްކަތްކުރާ ރަށްރަށުން ރެކޯޑް ކުރެވިފައިވާ 10 ކޭހެވެ. އަދި ކޮވިޑް ޖެހުނު މީހުންގެ ތެރެއިން 16 މީހަކަށް މިހާރުވެސް ގެންދަނީ ހޮސްޕިޓަލުގައި ފަރުވާ ދެމުންނެވެ. މިއީ ފާއިތުވެދިޔަ ހަފުތާގެ ކުރީ ހަފްތާއަށްވުރެ މާ ބޮޑު އަދަދެކެވެ. އެގޮތުން، 19 މާރިޗުން 25 މާރިޗަށް ހޮސްޕިޓަލުގައި ފަރުވާދެމުން ދިޔައީ ދެ މީހުންނަށެވެ. ފާއިތުވެދިޔަ ގިނަ މަސްތަކުގައި އެ އަދަދު ހުރީ އެއްވަރެއްގައި ހިފެހެއްޓިފައެވެ.

ރާއްޖެއިން މިހާތަނަށް 185،810 މީހަކަށް ވަނީ މި ބަލި ޖެހިފައެވެ. އޭގެ ތެރެއިން 311 މީހަކު ވަނީ ބަލީގައި މަރުވެފައެވެ.

މިދިޔަ ދުވަސްތަކުގައި ރާއްޖޭގައި އަރިދަފުސް ރޯގާއާއި ބޭރަށް ހިންގުން އިތުރުވެފައިވާކަމަށް ވެސް ހެލްތު ޕްރޮޓެކްޝަން އެޖެންސީގެ ތަފާސްހިސާބުތަކުން ދައްކައެވެ. އަދި ޑެންގީ ހުންވެސް ވަނީ ވަރަށް ބޮޑަށް އިތުރުވެފައެވެެ.