އިތުރު 14 މީހަކަށް އިންފްލުއެންޒާ ޖެހިއްޖެ
އިންފްލުއެންޒާ އަށް 460 މީހުން ޓެސްޓް ކުރެވިފައިވޭ
އައިޖީއެމްއެޗް ފްލޫ ކްލިނިކް
މިހާރު ފެތުރެމުންދާ ރޯގާއާ ގުޅިގެން އިތުރު 14 މީހަކު އެޗްވަންއެންވަން އަށް ޕޮސިޓިވް ވެއްޖެ އެވެ.
ހެލްތް ޕްރޮޓެކްޝަން އޭޖެންސީ އެޗްޕީއޭ އިން އާއްމުކޮށްފައިވާ ތަފާސް ހިސާބުތަކުން ދައްކާ ގޮތުން، މިހާތަނަށް 460 މީހުން އިންފްލުއެންޒާ އެޗްވަންއެންވަން އަށް ޓެސްޓް ކުރައްވާފައިވާ އިރު 169 މީހުން ވަނީ މި ބައްޔަށް ޕޮސިޓިވް ވެފަ އެވެ. އެޗްޕީއޭ އިން އަންގާރަ ދުވަހު އާއްމުކޮށްފައިވާ ތަފާސް ހިސާބުތަކުން ދައްކާގޮތުން، އިންފްލުކުއެންޒާ އެޗްވަންއެންވަން އަށް 437 މީހުން ވަނީ ޓެސްޓް ކުރެވިފަ އެވެ.
މީގެ އިތުރުން މި ބަލީގައި 33 މީހުން ވަނީ އެޑްމިޓް ކޮށްގެން ފަރުވާ ދެމުންނެވެ.
ރާއްޖޭގެ އެކި ސަރަހައްދު ތަކުންމި ރޯގާ ފެތުރެމުންދާ އިރު ހޯމަ ދުވަހު ވަނީ މާލެއިން އެކަނި 470 މީހުން ފްލޫ ކްލިނިކަށް ދައްކާފަ އެވެ. މީގެ ތެރޭގައި އައިޖީއެމްއެޗުގެ ފްލޫ ކްލިނިކަށް 272 މީހުން، އޭޑީކޭ އިން 104 މީހުން ވަނީ ޑޮކްޓަރަށް ދައްކާފަ އެވެ. އަރިދަފުސް ރޯގާ އާއި އެހެން ވައިރަލް ހުން ޖެހިގެން، އަތޮޅުތަކުގެ ފްލޫ ކްލިނިކަށް 867 މީހުން ވަނީ ޑޮކްޓަރަށް ދައްކާފައިވެ އެވެ. އެގޮތުން މުޅި ޖުމްލަ 1337 މީހުންވަނީ މުޅި ރާއްޖެއިން ފްލޫ ކްލިނިކް ތަކަށް ދައްކާފަ އެވެ. މި ތަފާސް ހިސާބުތަކުން ދައްކާގޮތުން ޑޮކްޓަރަށް ދައްކާމީހުންގެ އަދަދު އަދީ އެއްދުވަހުން އަނެއްދުވަހަށް ދައްކަވަމުންނެވެ.
މިހާތަނަށް ފްލޫ ކްލިނިކްތަކަށް އެންމެ ގިނައިން ދައްކާފައިވަނީ، މިދިއަ ހަފްތާގެ ބުރާސްފަތި ދުވަހު އެވެ. އެދުވަހު އަތޮޅުތަކުގެ ފްލޫ ކްލިނިކުން 1551 މީހުން ޑޮކްޓަރަށް ދައްކާފަ އެވެ.
ހޯމަ ދުވަހު އަތޮޅުތަކުން އެންމެ ގިނައިން ޑޮކްޓަރަށް ދައްކާފައިވަނީ، ރ އަތޮޅާއި ލ އަތޮޅެ އެވެ. އެގޮތުން ރ އަތޮޅުގެ ފްލޫ ކްލިނިކަށް 89 މިހުން ޑޮކްޓަރަށް ދައްކާފައިވާ އިރު ލ އަތޮޅުގައި ޑޮކްޓަރަށް ދައްކާފައިވަނީ 81 މީހުންނެވެ. މީގެ އިތުރުން ތ އަތޮޅުގެ ފްލޫ ކްލިނިކް ތަކަށް 64 މީހުން ޑޮކްޓަރަށް ދައްކާފައިވާ އިރު ހދ އަތޮޅުގެ ފްލޫ ކްލިނިކް ތަކަށް 72 މީހުން ވަނީ ޑޮކްޓަރަށް ދައްކާފަ އެވެ.
މިހާރު ފެތުރެމުންދާ ރޯގާތަކާ ގުޅޭ ގޮތުން ޑޮކްޓަރުން ވިދާޅުވަނީ މި ބައްޔަށް ރައްކާތެރިވުމުގެ ގޮތުން އަމިއްލަ ސާފުތާހިރު ކަމަށް ސަމާލުވާން ޖެހޭ ކަމަށާއި ބަލިން ރައްކާތެރިވުމުގެ ގޮތުން ބަލީގެ އަލާމާތްތައް ފެންނަ ކަމުގައިވާ ނަމަ މީހުންގެ ތެރެއަށް ނުކުންނަ އިރު މާސްކް އެޅުމަށް ވެސް އިލްތިމާސްކޮށްފަ އެވެ.
އެޗްޕީއޭ އިން ވަނީ މި ބައްޔަކީ ވެސް އާއްމުކޮށް މިއުޅޭ ފަދަ ފްލޫއަކަށް ވުމާ އެކު އެބައްޔަށް ފަރުވާ ހޯދުމުގައި ބޮޑުވަރު ނުވާ މީހުން ކޮންމެހެން ފްލޫ ކްލިނިކްތަކަށް ނުދިއުމަށް އެދިފަ އެވެ. އެގޮތުން ހާލު ދެރަނުވާ ހާލަތުގައި ފްލޫ ކްލިނަކަށް ދިއުމުން، ބަލި ޖެހިފައިވާ މީހުންގެ ފަރާތުން އިންފްލުއެންޒާ ޖެހުމަށް އޮތް ފުރުސަތު ބޮޑުވާ ކަމަށް އެޗްޕީއޭ އިން ބުނެއެވެ.
އެޗްޕީއޭ އިން ވަނީ އިންފްލުއެންޒާ އެޗްވަންއެންވަން ޖެހިފައިވާ މީހުންގެ ތެރެއިން ގިނަ މީހުން ރަގަޅުވެފައިވާކަން ފާހަގަކޮށްފަ އެވެ.
ރާއްޖޭގައި ފެތުރެމުންދާ ރޯގާ އާއި ގުޅިގެން ގިނަ އަދަދެއްގެ ބަޔަކަށް މި ބަލިޖެހެމުންދާ އިރު ބަލިން ރައްކާތެރި ވުމަށްޓަކައި މީހުން ގިނައިން އުޅޭ ސަރަހައްދުތަކަށް ނުދިއުމަށާއި، ހުން އައިސް ރޯގާ ޖެހިއްޖެ ނަމަ ގިނަގިނަ އިން ދިޔާ އެއްޗެހި ބުއި މަށާއި، ހުން ގަދަވާނަމަ ހަށިގަނޑުގައި ފެން ހޭކުމަށް ޑޮކްޓަރުން ލަފާ ދެއްވައެވެ.
ރާއްޖޭގައި މިހާރު ފެތުރެމުންދާ ރޯގާ އާއި ގުޅިގެން ތިން މީހުން ވަނީ މަރުވެފަ އެވެ.
