މާލެ ހެންވޭރުގައި ހުންނަ ގެއެއްގައި ގޭސްފުޅިއެއް ގޮވައި އަންހެނަކާއި ދެ ކުދިންނަށް އަނިޔާވެއްޖެ އެވެ.

ފުލުހުންގެ މީޑިއާ އޮފިޝަލް "ރާއްޖެއެމްވީ" އަށް ވިދާޅުވީ ހޮނިހިރު ދުވަހުގެ މެންދުރު 12:17 ހާއިރު، ގެއެއްގައި ގޭސްފުޅިއެއް ގޮވާ ތިންމީހަކަށް އަނިޔާފެވައިވާ ކަމުގެ ރިޕޯޓް ލިބިފައިވާ ކަމަށެވެ. އެ ހާދިސާ ހިނގާފައި ވަނީ ހ. މުޅަދޫގޭގައި ކަމަށް ފުލުހުން ބުނެއެވެ.

ފުލުހުން ބުނީ އެހާދިސާގައި އަނިޔާ ލިބުނު މީހުންނަށް ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށެވެ.

މީޑިއާ އޮފިޝަލް ވިދާޅުވީ ގޭސްފުޅި ގޮވުމުގެ އިތުރުން އަލިފާނުގެ ހާދިސާފަދަ އެހެންކަމެއް ހިނގާފައިވޭތޯ ބަލަމުންދާ ކަމަށެވެ. އިތުރު ތަފްސީލެއް ފުލުހުން ހާމައެއް ނުކުރެ އެވެ.

އައިޖީއެމްއެޗްގެ ޑިރެކްޓަރ އޮފް ޕަބްލިކް ރިލޭޝަންސް އެންޑް މީޑިއާ، އަހުމަދު މައުސޫމް "ރާއްޖެއެމްވީ"އަށް ވިދާޅުވީ އެ ތިން މީހުންނަށް އައިޖީއެމްއެޗްގެ އެމަޖެންސީ ރޫމްގައި ފަރުވާ ދެމުންދާ ކަމަށެވެ. އަދި އެ ތިން މީހުންނަށް ފަރުވާދެމުންދާ ޑޮކްޓަރާ ހަވާލާދެއްވާ މައުސޫމް ވިދާޅުވީ އެމީހުންގެ ފުރާނައަށް ގެއްލުންވާވަރުގެ އަނިޔާއެއް ލިބިފައިނުވާ ކަމަށެވެ. އަދި ލިބިފައިވަނީ ކުދިކުދި އަނިޔާތަކެއް ކަމަށް ޑޮކްޓަރުން ބުނެފައިވާ ކަމަށް މައުސޫމް ވިދާޅުވި އެވެ.