އައިޖީއެމްއެޗަށް އެނގިގެން ރެޔާ ހަމައަށް އެޗް1އެން1 ވައިރަސްއާ ގުޅިގެން އެއްވެސް މީހަކަށް ފަރުވާދީފައެއް ނުވޭ!

އައިޖީއެމްއެޗަށް އެނގިގެން ރެޔާއި ހަމައަށް އެޗް1އެން1 ވައިރަސްގައި އެއްވެސް މީހަކަށް ފަރުވާދީފައި ނުވާ ކަމަށް އެ ހޮސްޕިޓަލުން ބުނެފި އެވެ.

ރާއްޖެޓީވީއަށް މައުލޫމާތު ދެއްވަމުން އައިޖީއެމްއެޗްގެ މީޑިއާ އޮފިޝަލް ވިދާޅުވީ، ހޮސްޕިޓަލަށް އެނގިގެން ރެޔާ ހަމައަށް އެޗް1އެން1 ވައިރަސްގައި އެއްވެސް މީހަކަށް ފަރުވާދީފައިނުވާ ކަމަށާއި، އެކަމުގެ ރިޕޯޓެއް ވެސް ލިބިފައިނުވާ ކަމަށެވެ.

އޮފިޝަލް ވިދާޅުވީ، ނޭޝަނަލް ލެބޯރިޓީގެ ތަފާސް ހިސާބުތަކާއި މައުލޫމާތުތައް ބަލަހައްޓަމުން ގެންދަނީ، ހެލްތު ޕްރޮޓެކްޝަން އެޖެންސީން ކަމަށެވެ. އެހެންކަމުން ނޭޝަނަލް ލެބޯޓަރީގެ ޓެސްޓުތަކުން އެޗް1އެން1 ވައިރަސްއަށް ޕޮޒިޓިވް މީހުންގެ ތަފްސީލުތަކާއި، އެ އަދަދުތައް ހޮސްޕިޓަލަށް ނޭނގޭނެ ކަމަށެވެ. އަދި މިހާރު ފެތުރެމުންދާ ރޯގާ އާއި، ހުމާ ގުޅިގެން ހޮސްޕިޓަލުން އަޅަންޖެހޭ ފިޔަވަޅުތައް އަޅަމުންގެންދާ ކަމަށް އޮފިޝަލް ވިދާޅުވި އެވެ.

އެ ވަގުތާ ހަމައަށް (ރޭގެ 12:15 އާއިހަމައަށް) އެނގިގެން އައިޖީއެމްއެޗްގައި އެޗް1އެން1 ވައިރަސްއަށް އެއްވެސް މީހަކަށް ފަރުވާދީފައެއް ނުވޭ، އަދި ރިޕޯޓްކުރެވިފައެއްވެސް ނުވޭ.

އައިޖީއެމްއެޗުން މިހެން ބުނި ނަމަވެސް އެޗްޕީއޭއިން ބުނީ، މި އަހަރުގެ މިހާތަނަށް 208 މީހަކު އެޗް1އެން1 އަށް ޓެސްޓްކޮށްފައިވާއިރު ޕޮޒިޓިވްވެފައި ވަނީ 27 ފަރާތެއް ކަމަށެވެ.

ހެލްތު މިނިސްޓްރީގައި ހޯމަ ދުވަހު ނޫސްވެރިންނަށް މައުލޫމާތު ދެއްވަމުން އައިޖީއެމްއެޗްގެ ޑރ. މޫސާ ހުސެއިން ވިދާޅުވީ، ޕޮޒިޓިވް ގިނަ މީހުން މިހާރު ރަނގަޅުވެފައިވާ ކަމަށެވެ. އައިޖީއެމްއެޗްގެ އެޗް1އެން1 އަށް ޕޮޒިޓިވްވެފައިވާ ހާލު ބޮޑު އެއްވެސް މީހަކަށް ފަރުވާދެމުން ނުދާ ކަމަށް ވެސް ވިދާޅުވިއެވެ. ނަމަވެސް އޭޑީކޭ އައިސީޔޫގައި ތުއްތު ކުއްޖަކަށް ދަނީ ފަރުވާދެމުންނެވެ. ޑރ. މޫސާ ވިދާޅުވީ، ފަރުވާ ދެނީ ރިޕޯޓަށް ނޫން ކަމަށާއި ބަލީގެ އަލާމަތްތަކަށް ކަމަށެވެ. އެހެންކަމުން ރިޕޯޓް ލިބޭއިރު ގިނަ ފަހަރަށް އެމީހާ ހުންނަނީ ބަލިން ރަނގަޅުވެފައި ކަމަށެވެ.

ސްވައިން ފްލޫގެ އަލާމާތްތަށް:

• ކެއްސުން
• ހުން އައުން
• ކަރުގައި ރިއްސުން
• ނޭފަތުން ފެން އައުން ނޭފަތް ބެދުން
• ގައިގައި ރިއްސުން
• ބޮލުގައި ރިއްސުން
• ހީކެރުވުން އަދި ވަރުދެރަވުން

ސްވައިން ފްލޫ ކޮންޓްރޯލް ކުރުމަށް:

• ރޯގާ ޖެހިފައިވާ އިރު ކެއްސާ ކިބިހި އަޅާ އިރު އަގަމަތި ރަނގަޅަށް ނިވާ ކުރުން
• ރޯގާ އަދި ހުން ޖެހިފައި ވާ ނަމަ، އާންމު ތަންތަނަށް ނުނިކުތުން
• ރޯގާ އަދި ހުން އައިސް ގިނަ ދުވަސް ވާނަމަ ވީހާ ވެސް އަވަހަށް ޑޮކްޓަރަކަށް ދައްކުން
• ރޯގާ އަދި ހުން ޖެހިފައި ވާ ނަމަ، ގިނައިން ދިޔާ އެއްޗިހި ބޭނުން ކުރުން