ކުށަކަށް އަދަބެއް ދިނުމުގެ 3 މަޤްޞަދެއް އޮވޭ
ޕްރޮސެކިއުޓަރ ޖެނެރަލް ހުސައިން ޝަމީމް
މީހުން އިސްލާޙު ކުރުމަށްޓަކައި އަދަބު ދިނުން މުހިންމުވާ ފަދައިން، އެމީހުން އިޞްލާޙުކޮށް، އަނބުރާ މުޖްތަމަޢަށް ނެރުންވެސް ބޭނުންތެރިކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޕްރޮސެކިއުޓަރ ޖެނެރަލް އޮފީހުގެ ނިއުސްލެޓަރ "އުންސުރު" ގެ މާރޗު މަހުގެ އެޑިޝަންގައި ޕީޖީ ޝަމީމް ވަނީ މި މައުޟޫއަށް އަލިއަޅުވާލާފައެވެ. އެގޮތުން އިންސާނުންނަކީ ކުށް ކުރެވޭނެ ބައެއްކަން ފާހަގަ ކުރައްވައި ޝަމީމް ވިދާޅުވީ، ކުށުގެ ޢަމަލެއް ކުރެވޭ މީހަކަށް އެމީހަކު ކުރި ކަމެއްގެ ނަތީޖާއާ ކުރިމަތިލާންޖެހޭ ގޮތަށް ޤާނޫނީ ނިޒާމު ބައްޓަންކުރަންޖެހެނީ، މުޖްތަމަޢުގެ ތެރޭގައި ވަކި ހަމަތަކެއް ޤާއިމުކޮށް، ރައްކާތެރިކަމާއި އަމާންކަން ކަށަވަރު ކޮށްދިނުމަށް ކަމަށެވެ.
ޝަމީމް ވިދާޅުވީ، ޤާނޫނީ ނިޒާމުގެ ތެރޭގައި މީހުންނަށް އަދަބު ދިނުން މުހިންމުވާ ފަދައިން، މީހުން އިޞްލާޙުކޮށް، އަނބުރާ މުޖްތަމަޢަށް ނެރުމަކީވެސް ބޭނުންތެރި ކަމެއް ކަމަށެވެ.
އޭގެ އިތުރުން، ކުށުގެ މައްސަލައެއްގައި މީހަކަށް އަދަބު ދިނުމަކީ ހަމައެކަނި އަދަބެއް ދިނުމަށްޓަކައި ކުރާ ކަމެއް ނޫންކަމަށް ޝަމީމް ވިދާޅުވިއެވެ. އެގޮތުން ކުށަކަށް އަދަބެއް ދިނުމުގެ 3 މަޤްޞަދެއް އޮންނަކަން ފާހަގަ ކުރައްވައި ޝަމީމް ވަނީ އެކަންކަމަށްވެސް އަލިއަޅުވާލައްވާފައެވެ.
ޝަމީމް ވަނީ ނަޞޭޙަތުގެ އެއްބަސްވުމެއް ހެދުމުގެ ފުރުޞަތު ޖިނާއީ އިޖުރާއަތުގެ ޤާނޫނުގެ ދަށުން ފަހިކޮށްދީފައިވާކަން ފާހަގަ ކުރައްވާފައެވެ. އެގޮތުން މީގެ ކުރީގެ ކުށުގެ ރެކޯޑެއް ނެތިފައި، އެމީހަކަށް ކުރެވުނު ކުށަށް އެއްބަސްވާނަމަ، އެމީހާ ކުށުން ދުރުހެލިވެ، އަލުން އަނބުރާ މުޖްތަމަޢަށް ރުޖޫޢަވުމަށް ބާރު އެޅުމަށްޓަކައި، އޭނާގެ މައްޗަށް ޖިނާއީ ދަޢުވާއެއް ކުރުމުގެ ބަދަލުގައި ނަޞޭޙަތުގެ އެއްބަސްވުމެއް ހެދުމުގެ ފުރުޞަތު ފަހިކޮށްދީފައިވާކަަމަށް ޝަމީމް ވިދާޅުވިއެވެ.
ޝަމީމް ވިދާޅުވާ ގޮތުގައި ކުދި ކުށްތަކާއި، ނަޞޭޙަތުގެ އެއްބަސްވުން ހެދުމަށް ޤާނޫނުގައި ބުނާ ޝަރުޠުތައް ފުރިހަމަވާ ކުށްތަކުގައި، ނަޞޭޙަތުގެ އެއްބަސްވުމެއްގެ ތެރެއިން، އަދަބު ދިނުމުގެ މަޤްޞަދުތައް ޙާޞިލުވެއެވެ.
އެއީ ދައުލަތާއި މުއްތަހަމަށްވެސް ޚަރަދު ކުޑަވާ ކަމެއްކަމަށް ޝަމީމް ވިދާޅުވިއެވެ.
އެގޮތުން ބަލާއިރު، އެއްބަސްވުމުގައި ބުނާ މުއްދަތުގައި އިތުރު ކުށެއް ނުކޮށް ހުރެއްޖެނަމަ، އެމައްސަލައެއްގެ ދަޢުވާއެއް އަލުން ނުކުރާނެ ކަމަށާއި، އެއްބަސްވުމާ ޚިލާފުވެއްޖެނަމަ، އެ މައްސަލައިގެ ދައުވާ ކުރިއަށް ގެންދާނެކަމަށް ޝަމީމް ވިދާޅުވިއެވެ.
