ވިސާމާއި ލީވާނަށް އަދަބު ކަނޑައަޅައި، ހުކުމް ކުރުން މާދަމާ!
ކުށް ސާބިތުވާކަމަށް ވަނީ ކަނޑައަޅާފަ
ވިސާމާއި ލީވާން: ދައުލަތުން ދޭން ހުށަހަޅާފައިވަނީ ގާނޫނުގައި ބުނާ އެންމެ ބޮޑު އަދަބު
ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސްއަޅާފައިވާ ކަމަށް ބުނެ ރާއްޖެޓީވީގެ މުހައްމަދު ވިސާމާއި ލީވާން އަލީ ނާސިރުގެ މައްޗަށް އުފުލާފައިވާ ދައުވާގެ ޝަރީއަތުގައި އަދަބެއް ކަނޑައަޅައި، ހުކުމް ކުރުން އަންގާރަ ދުވަހަށް ތާވަލުކޮށްފި އެވެ.
ދެ ނޫސްވެރިންގެ މައްޗަށް ހިންގާ ޝަރީއަތުގައި އެންމެ ފަހުން އަޑުއެހުމެއް ބާއްވާފައި ވަނީ މިދިޔަ ޑިސެމްބަރު މަހުގެ 19 ވަނަ ދުވަހުއެވެ. އެ އަޑުއެހުމުގައި ޝަރީއަތުން ވަނީ ވިސާމާއި ލީވާނުގެ މައްޗަށް އުފުލާފައިވާ ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމުގެ ކުށުގެ ދައުވާ ސާބިތުވާ ކަމަށް ކަނޑައަޅާފަ އެވެ.
އެހެންކަމުން އަންގާރަ ދުވަހުގެ މެންދުރު 1:00 ގައި ބާއްވާ އަޑުއެހުމުގައި އޮންނާނީ ވިސާމާއި ލީވާނަށް ދޭނެ އަދަބެއް ކަނޑައަޅައި، ހުކުމް އިއްވުމެވެ.
ދައުލަތުގެ ފަރާތުން އެދިފައިވަނީ ހުކުމެއްގެ ގޮތުގައި ގާނޫނުގައި ކަނޑައަޅާފައިވާ އެންމެ ބޮޑު އަދަބު ކަމަށްވާ ހަތަރު މަހާއި 24 ދުވަހުގެ ޖަލު ހުކުމެއް ދެ ނޫސްވެރިންގެ މައްޗަށް ކޮށްދިނުމަށެވެ. ދެ ނޫސްވެރިންގެ ވަކީލު އަބްދުﷲ ހަސީން ވިދާޅުވެފައިވަނީ ގާނޫނު އަސާސީގައި ބަޔާންކޮށްފައިވާ މިންވަރަށް ދައުވާ ސާބިތުކޮށްދެވިފައިނުވާ ކަމަށެވެ. އަދި އެ ދެ ނޫސްވެރިންނަށް އަދަބެއް ދޭނަމަ، ގާނޫނުގައި ބުނާ ލުއި އަދަބު ކަމަށްވާ 12،000 ރުފިޔާ އިން ޖޫރިމަނާކުރުމުގެ އަދަބު ދިނުމަށް ހަސީން އެދިވަޑައިގެންނެވި އެވެ.
ރާއްޖެޓީވީގެ ދެ ނޫސްވެރިންގެ މައްޗަށް އަންގާރަ ދުވަހު ހުކުމް ކުރާއިރު، މިފަހުގެ ތާރީހުގައި ނޫސްވެރިކަމުގެ މަސައްކަތް ކުރުމުގެ ސަބަބުން ރާއްޖޭގައި ނޫސްވެރިއަކު ޖަލަށް ނުލަ އެވެ.
ވިސާމާއި ލީވާނަށް އަންގާރަ ދުވަހު ހުކުމްކުރާއިރު، ރާއްޖެޓީވީގެ ކެެމަރާމަން އާދަމް ޒަރީރަށް ހުކުމް ކުރުން ފެބްރުއަރީ 27 އަށް ވަނީ ތާވަލުކޮށްފަ އެވެ. އަދި ފިޔާޒުގެ މައްޗަށް ހިންގާ ޝަރީއަތުގެ އަޑުއެހުމެއް މިމަހުގެ 29 ވަނަ ދުވަހަށް ވަނީ ތާވަލުކޮށްފަ އެވެ.
ނޫސްވެރިންނަށް ނުހައްގު އަދަބެއް ލިބުމުގެ ކުރިން ސަލާމަތްކޮށްދިނުމަށް ރާއްޖެޓީވީން ތަކުރާރުކޮށް ގޮވާލަމުންދާއިރު، އިންޓަނޭޝަނަލް ފެޑެރޭޝަން އޮފް ޖާނަލިސްޓްސް(އައިއެފްޖޭ) އާއި ކޮމެޓީ ޓު ޕްރޮޓެކްޓް ޖާނަލިސްޓްސް(ސީޕީޖޭ) އާއި ރިޕޯޓާސް ވިތްއައުޓް ބޯޑާސް ފަދަ ބައިނަލްއަގްވާމީ ޖަމިއްޔާތަކުން ވެސް ދަނީ ނޫސްވެރިންގެ މައްޗަށް ކޮށްފައިވާ ދައުވާތައް އަނބުރާ ގެންގޮސް، ޝަރީއަތްތައް ހުއްޓާލުމަށް ގޮވާލަމުންނެވެ.
