މަސީހާ ދެކޮޅު މެމްބަރުންގެ އަދަދު ފަސްދޮޅުހަށް އަރަން ޖެހޭ:ރައީސް މައުމޫން
3 ޖުލައި 2017 | ހޯމަ 18:18ގައުމަށް ހިދުމަތް ކުރުމުގެ ފުރުސަތު ވަނީ ހުޅުވާލެވިފަ
ރައީސް މައުމޫން ޖަލްސާއެއްގައި ވާހަަކަދައްވަނީ
މަޖިލީހުގެ ރައީސްގެ އިތުބާރު ނެތް ކަމަށް 45 މެންބަރުންގެ ސޮއި ލިބުނު ނަމަވެސް އެ އަދަދު 60 އަރަންޖެހޭ ކަމަށް ރައީސް މައުމޫން އަބްދުލްގައްޔޫމް ވިދާޅުވި އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ފަހު، ހޯމަ ދުވަހުގެ ރޭ ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން ރައީސް މައުމޫން ވިދާޅުވީ، މިއަދު 45 މެންބަރުން ހަމަވެފައި ވާއިރު އެހާ ހިސާބުން މިކުރާ މަސައްކަތް ހުއްޓިގެން ނުވާނެ ކަމަށާއި 60 އަށް ވެސް މެންބަރުންގެ އަދަދު އަރަންޖެހޭ ކަމަށެވެ.
"45 މެންބަރު ހަމަވި ނަމަވެސް، މެންބަރުގެ އަދަދު 45 ދާންޖެހޭ. 50 ދާންޖެހޭ. އަދި ފަސްދޮޅަކަށްވެސް ދާންޖެހޭ. އަޅުގަނޑުމެން މިކުރާ މަސައްކަތްތަކަށް ފަސޭހަވާގޮތަށް މެންބަރުން އިތުރު ކުރަންޖެހޭ." ރައީސް މައުމޫން ވިދާޅުވި އެވެ.
ދިވެހި ރައްޔިތެއްގެ ހައިސިއްޔަތުން ކަމަށް ވިދާޅުވެ، ރައީސް މައުމޫން ވިދާޅުވީ، މަޖިލީހުގެ މެންބަރުންގެ ތެރެއިން 45 ހަމަނުވާ މެންބަރުންވެސް ގުޅިފައިވާ ސިޔާސީ ޕާޓީތަކާ ގުޅުމަށް އެދިވަޑައިގަންނަވާ ކަމަށް މައުމޫން ވިދާޅުވި އެވެ.
ގައުމަށް ހިދުމަތް ކުރުމުގެ ފުރުސަތު ހުޅުވާލެވިފައިވާ ކަމަށާއި މިކަން ވާންޖެހޭނީ ހުރިހާ މަޖިލީސް މެންބަރުންނަށް ލިބޭ ޝަރަފަކަށް ކަމަށް މައުމޫން ވިދާޅުވި އެވެ.
ރައީސް މައުމޫން ވިދާޅުވީ، ގައުމު ހަމަ މަގަށް އެޅުވުމަށް ކުރާ މަސައްކަތުގައި ހަތަރު ޕާޓީ ގުޅިގެން މަސައްކަތް ކުރަމުންދާއިރު ހިޔާލު ތަފާތުވުންތަކާއި ވަަރަށް ފަސޭހައިން ކުރިމަތިވާނެ ކަމަށާއި އެއީ ތަޖުރިބާކޮށްފައިވާ ކަމެއް ކަމަށެވެ.
"މިއީ ތަޖުރިބާކޮށްފައިވާ ކަމެއް. އެެހެން ގައުމުތަކުގައިވެސް ވާގޮތެއް. އެކަމަށް އެބަޖެހޭ ރައްކާތެރިވާން. އެއްގޮތަކަށްވެސް އަޅުގަނޑުމެން ފުރުސަތެއް ދީގެން ނުވާނެ އަޅުގަނޑުމެންގެ ދޭދޭ ޕާޓީތަކުގައި މައްސަލަޖެހޭ ކަށެއް. ތިބެންޖެހޭނީ އެކުވެރިކަމާ އެއް ބާރުލުމާއެކުގައި. ހުރިހާ ކަމެއްވެސް ކުރަންޖެހޭނީ މަޝްވަރާގެ މަތިން. ގިނަ ބަޔަކު އެއްބަސްވާގޮތަކަށް.ވަކި މީހަކަށް ފެންނަ ގޮތަކަށް. އަޅުގަނޑަށް ފެންނަ ގޮތަކަށް ވަކި ކަމެއް ހިނގައިގެން ނުވާނެ. އެންމެ މަސްލަހަތު ބޮޑުގޮތެއް އަދި ގައުމަށް އެންމެ ފައިދާ ހުރި ގޮތެއް ހޯދާފަ، އެގޮތަކަށް ކަންކަން ކުރައްވަންޖެހޭނީ." މައުމޫން ވިދާޅުވި އެވެ.
ރައީސް މައުމޫން ވިދާޅުވީ އިދިކޮޅު ފަރާތްތަކުން ކުރަމުންދާ މަސައްކަތުގައި ސާބިތުކަމާއި އެކު މިކުރާ މަސައްކަތް ކާމިޔާބު ވާނެ ކަމުގެ ވަރަށް ބޮޑު އުންމީދެއް ލިބިފައިވާ ކަމަށެވެ.
