ޑިއުޓީގެ ބޮޑުކޮށްގެން ލިބޭ ފައިސާއިން އާންމުން ހޭލުންތެރިކުރަން ސަރުކާރު މެމްބަރުން ދެކޮޅު!

ދުންފަތު ބާވަތްތަކުން ނަގާ ޑިއުޓީ އެތަށް ގުނައެއް ބޮޑުކުރުމަށް ސަރުކާރުން ހުށަހަޅާފައިވާއިރު، ޑިއުޓީ ބޮޑުކޮށްގެން ލިބޭ އާމްދަނީގެ ފަސް ޕަސެންޓް ހޭލުންތެރިކުރުމުގެ ޕްރޮގްރާމްތަކަށް ހަރަދުކުރުމަށް ރައްޔިތުންގެ މަޖިލީހުގެ ތަޅުމަށް ހުށަހަޅުއްވާނެ ކަމަށް ގަމު ދާއިރާގެ މެމްބަރު ފައްޔާޒު އިސްމާއިލް ވިދާޅުވެއްޖެ އެވެ.

ސިނގިރޭޓް އާއި އެނާޖީ ޑްރިންކުން ނަގާ ޑިއުޓީ ބޮޑުކުރަން އެކްސްޕޯޓް އިމްޕޯޓް ގާނޫނަށް އިސްލާހު ގެނައުމުގެ ބިލު ދިރާސާކުރާ އިގްތިސާދީ ކޮމެޓީގައި ދުންފަތުގެ ބާވަތްތަކުން ނަގާ ޑިއުޓީގެ ފަސް ޕަސެންޓް ހޭލުންތެރިކުރުމުގެ ޕްރޮގްރާމްތައް ހިންގުމަށާއި، ދުންފަތުން އާންމުދުރުކުރުމަށް ހިންގާ ހަރަކާތްތަކަށް ހަރަދުކުރުމަށް އެމްޑީޕީއަށް ނިސްބަތްވެވަޑައިގަންނަވާ ގަމު ދާއިރާގެ މެމްބަރު ފައްޔާޒު އިސްމާއިލް ހުށަހެޅުއްވި އެވެ. ނަމަވެސް ސަރުކާރަށް ނިސްބަތްވެވަޑައިގަންނަވާ މެމްބަރު ވަނީ އިސްލާހު ކޮމެޓީން ބޭރުކޮށްލާފަ އެވެ.

އިސްލާހު ކޮމެޓިން ބޭރުކޮށްލުމާއި ގުޅިގެން ފައްޔާޒު ކުރައްވާފައިވާ ޓުވީޓެއްގައި ވިދާޅުވެފައިވަނީ، ދުންފަތުގެ ބާވަތްތަކުން އާންމު ދުރުހެލިކުރުމަށް ހޭލުންތެރިކުރުމުގެ ގޮތުން ކަމާބެހޭ އިދާރާތަކަށް ޑިއުޓީގެ ފަސް ޕަސެންޓް ދިނުމަށް މަޖިލީހުގެ ތަޅުމަށް ހުށަހަޅުއްވާނެ ކަމަށެވެ. އަދި އެ އިސްލާހަށް މެމްބަރުން ތާއީދުކުރައްވާނެ ކަމަށް އުއްމީދުކުރައްވާކަމަށް ފައްޔާޒު ވިދާޅުވެފައިވެއެވެ.

ފައްޔާޒު އެފަދަ އިސްލާހެއް ހުށަހެޅުއްވިއިރު، ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ވަނީ ދުންފަތުގެ އަގު ބޮޑުކުރުމުން އާންމުން އެކަމުން ދުރު ނުކުރެވޭނެކަމަށް އިޤްތިސާދީ ކޮމެޓީގައި ބުނެފަ އެވެ. އެޗްޕީއޭއިން ބުނީ އެކަން ހުއްޓުވޭނީ އާންމުން ހޭލުންތެރިކުރެވިގެންކަމަށާއި، ނަމަވެސް ހޭލުންތެރިކުރުމަށް އެ އިދާރާއަށް ބަޖެޓެއްވެސް ނުދޭ ކަމަށެވެ. ހެލްތު މިނިސްޓްރީގެ ސްޓޭޓް މިނިސްޓަރު އަދި އެޗްޕީއޭ ބަލަހައްޓަވަމުން ގެންދަވާ އައިޝަތު ރަމީލާ ވިދާޅުވީ އެޗްޕީއޭގެ މަސައްކަތްތަކަށް މި އަހަރު ލިބުނީ 3.5 މިލިއަން ރުފިޔާ ކަމަށާއި ކުޑަކުދިންނަށް ޖަހާ ވެކްސިނާއި އެކި ބަލިތަކުގެ މީހުންނަށް ބޭނުންވާ ބޭސްތައް ގަތީމަ، ބަޖެޓު އެއްކޮށް ހުސްވާނެ ކަމަށެވެ.

ދުންފަތުން ދުރުކުރުމަށް އާންމުން ހޭލުންތެރިކުރުމަށް ބޮޑުކުރާ ޑިއުޓީއިން ފައިސާ ހަމަޖެއްސުމަށް ސަރުކާރަށް ނިސްބަތްވާ މެމްބަރުން ދެކޮޅުހެދިއިރު، ރައްޔިތުންގެ މަޖިލީހުގެ ޖަލްސާގައި ވާހަކަދެއްކެވި ޕީޕީއެމްގެ މެމްބަރުން ވިދާޅުވީ ދުންފަތާއި، އެނާޖީ ޑްރިންކްސްއިން ޑިއުޓީ ބޮޑުކުރުމަށް ހުށަހެޅުއްވީ ރައީސް އަބްދުﷲ ޔާމީން ދިވެހި ރައްޔިތުންގެ ސިއްހަތަށް ސަމާލުކަންދެއްވާލެއް ބޮޑުކަމުން ކަމަށެވެ. ނަމަވެސް މެމްބަރުންގެ އެ ވާހަކަފުޅާއި، އަމަލު ދިމާނުވާތީވެ ގިނަ ބަޔަކު އަންނަނީ ވަރަށް ބޮޑަށް އެކަމަށް ފާޑުކިޔަމުންނެވެ.

ސިނގިރޭޓުން ނަގާ ޓެކްސް ބޮޑުކޮށްގެން 200 މިލިއަނަށް ވުރެ ގިނަ ރުފިޔާގެ އާމްދަނީއެއް ލިބޭނެ ކަމަށް ސަރުކާރުން ލަފާ ކޮށްފައިވެ އެވެ. ޑިއުޓީ ބޮޑުކުރުމުން، މިހާރު 48ރ. އަށް ވިއްކާ ސިނގިރޭޓު ފޮއްޓެއްގެ އަގު 65ރ. އާއި 70ރ. އާ ދެމެދުގެ މިންވަރަކަށް މައްޗަށް ދާނެ އެވެ.