މަޖިލިސް މެމްބަރުންގެ އިންޝުއަރެންސް ކަންތަކާ މެމްބަރުން ކަންބޮޑުވެއްޖެ

ރައްޔިތުންގެ މަޖިލީހުގެ މެމްބަރުންގެ ހެލްތް އިންޝުއަރެންސް ކަންކަން މިހާތަނަށް ގޮސްފައިވާ ގޮތާ މެދު ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅުކޮށްފި އެވެ.

ރައްޔިތުންގެ މަޖިލީހުގެ މެމްބަރުންގެ ހެލްތް އިންޝުއަރެންސް ކަންތައް ހަމަޖައްސަން އިންޝުއަރެންސް ކުންފުންޏަކާ ހަވާލުކުރުމަށްޓަކައި މަޖިލީހުން ކޮށްފައިވާ އިއުލާނަކާ ގުޅިގެން އެކަމަށް އެދި ޕްރޮޕޯޝަލް ހުށަހެޅި ކުންފުނިތަކުގެ ތެރެއިން ކުންފުންޏެއް ކަނޑައެޅުމަށްޓަކައި އާއްމު ކޮމެޓީން ބުރާސްފަތި ދުވަހު ބޭއްވި ބައްދަލުވުމުގައި އެކޮމެޓީގެ މެމްބަރުން ވަނީ މިހާތަނަށް މަޖިލީހުގެ މެމްބަރުންގެ އިންޝުއަރެންސް ހިދuމަތް ލިބިފައިވަނީ އެންމެ އެދެވޭ ގޮތަށް ނޫން ކަން ފާހަގަކޮށްފައެވެ.

އާއްމު ކޮމެޓީގެ މެމްބަރުން ވިދާޅުވީ މަޖިލީސް މެމްބަރުންގެ ހެލްތު އިންޝުއަރެންސް ހިދުމަތް ވަރަށް ފުޅާ ދާއިރާއެއްގައި ލިބޭ ކަމަށް ރައްޔިތުންގެ ހީވެފައި އޮންނަ ކަމަށާއި ބައެއް ރައްޔިތުން އެކަމާ ހިތްމަނުޖެހިގެން އެވާހަކަ ދައްކަމުންދާ ކަމަށެވެ. ނަމަވެސް ކަން އޮތީ އެގޮތަށް ނޫން ކަމަށާއި މެމްބަރުންނަށް އިންޝްއަރެންސްގެ ހިދްމަތް ރަނގަޅަށް ނުދެވޭ ތާނގާއި އެވަރުގެ ބަދުނާމެއް ބޭނުން ނޫން ކަމަށް ވެސް މެމްބަރުން ވިދާޅުވި އެވެ.

އެގޮތުން އިންޝުއަރެންސްގެ ހިދްމަތް ރަނގަޅަށް ނުދެވޭ ނަމަ އާއްމު ރައްޔިތުންނެކޭ އެއްފަދައިން އައިޑީ ކާޑް ބޭނުން ކޮށްގެން އާސަންދައިން މެމްބަރުންގެ ބޭސްފަރުވާ ކުރުން ވެސް މާރަނގަޅު ކަމަށް މެމްބަރުން ވިދާޅުވި އެވެ.

ރައްޔިތުންގެ މަޖިލީހުގެ މެމްބަރުގެ ހެލްތު އިންޝުއަރެންސްގެ ހިދްމަތް މިހާތަނަށް ފޯރުކޮށްދީފައި ވަނީ އެލައިޑް އިންޝުއަރެންސް އިންނެވެ. މިފަހަރު ވެސް އެލައިޑުން ޕްރޮޕޯޝަލް ހުށަހަޅާފައިވާއިރު، ދެން ހުށަހަޅާފައިވަނީ މުޅިން އަލަށް ހުށަހެޅި ސޮލަރެލް އިންޝުއަރެންސް ކިޔާ ކުންފުންޏަކުން ކަމަށް މަޖިލީހުން ބުނެއެވެ.

އާއްމު ކޮމެޓީގެ ބައްދަލުވުމުން ނިންމާފައިވަނީ އާއްމު ކޮމެޓީން ނަގާފައިވާ ތިން މެމްބަރުންގެ ކުޑަ ކޮމެޓީން އެ ޕްރޮޕޯޝަލްތައް ދިރާސާ ކުރުމަށާއި އެ ކުންފުނިތަކާ މަޝްވަރާ ބޭނުންވެއްޖެ ހިނދެއްގައި އެކުންފުނިތަކާއެކު މަޝްވަރާ ކުރުމަށް ފަހު ގޮތެއް ނިންމުމަށެވެ.