ލެވޮންޑޯސްކީގެ ފުރުސަތުތަކަށް އަންސޫ ފަޓީ ހުރަސް އަޅަނީ!

ބާސެލޯނާގެ ދެ ފޯވަޑުން ކަމަށްވާ ޒުވާން އަންސޫ ފަޓީ އާއި ތަޖުރިބާކާރު ފޯވަޑް ރޮބަޓް ލެވޮންޑޯސްކީގެ މެދުގައި ހިލާފުތަކެއް އުފެދި މައްސަލަ ގޯސްވާން ފަށައިފި އެވެ.

ޖަރުމަނުގެ ބުންޑަސްލީގާއިން މި ސީޒަނުގައި ބާސެލޯނާއާ ގުޅުނު އިތުބާރު ފޯވަޑް ލެވޮންޑޯސްކީ ދަނީ އޭނާގެ އާކުލަބުގައި ބަޔާން މިއުނިކްގައި ދެއްކި ފަދަ ކުޅުމެއް ދައްކައި ގިނަ ގޯލުތަކެއް ޖަހަމުންނެވެ. މިއާ ހިލާފަށް އަނިޔާ އާއި ފިޓްނަސްގެ މައްސަލަތަކާހުރެ 20 އަހަރުގެ އަންސޫ ފަޓީގެ ވިދުން ފެންނަނީ ވަރަށް ފަނޑުކޮށެވެ.

މި ދެ ކުޅުންތެރިގެ މެދުގައި އެންމެ ފަހުން މައްސަލަ ޖެހުނީ ޔޫރޮޕާ ލީގުގައި މިދިޔަ ބުރާސްފަތި ދުވަހުގެ ރޭ މެންޗެސްޓާ ޔުނައިޓެޑް އަތުން ބަލިވެ ބާސެލޯނާ ކެޓި މެޗުގަ އެވެ.

މި މެޗުގައި އެންމެ ފަހު ވަގުތު ފެރަން ޓޮރޭޒް ނެގި ހުރަސް ހުސްކޮށް އޮތް ގޯލަށް ފޮނުވާލަން ލެވޮންޑޯސްކީ ވަރަށް މަސައްކަތް ކުރި އެވެ. އެކަމަކު އޭނާ އަށް އެކަން ނުވީ ފަހު 15 މިނެޓުގައި ކުޅެން ނުކުތް ފަޓީ އެދެމެދަށް ފުންމައިގެން އަރައި ބޮލުން ޖަހަން އުޅުމުންނެވެ. ލެވޮންޑޯސްކީ އަކީ މަތިން އަންނަ ބޯޅަތަކަށް ފަރިތަ އަދި އިސްކޮޅުދިގުވެފައި ބޮލުން ޖަހަން ކުޅަދާނަ ކުޅުންތެރިއެކެވެ. ނަމަވެސް މި މެޗުގެ އިތުރުން ވެސް ބައެއް އެހެން މެޗުތަކުގައި އޭނާ އަށް ލިބޭ ފުރުސަތުތަކަށް ފަޓީގެ ފަރާތުން ހުރަސްތައް ކުރިމަތިވާތީވެ ލެވޮންޑޯސްކީ ވަނީ މިކަން ސީނިއާ ކުޅުންތެރިންގެ ސަމާލުކަމަށް ގެނެސްފަ އެވެ. ޔުނައިޓެޑް މެޗަށް ފަހު ލޮވޮންޑޯސްކީ ފަޓީއާ މެދު ނުރުހިގެން ދަނޑުމަތީގައި ވެސް އޭނާއާ ވާހަކަ ދެއްކި މަންޒަރު ޓީވީތަކުން ފެނުނެވެ.

އަދި ބާސެލޯނާގެ ޗޭންޖިން ރޫމަށް ދިއުމަށްފަހު އޭނާ ވަނީ މިފަދައިން އަމަލު ނުކުރުމަށް ފަޓީގެ ކިބައިން ތަކުރާރުކޮށް އެދިފަ އެވެ.

މިކަމާ ކޯޗު ޒަވީ ހަނާންޑޭޒް ވެސް ފަޓީއާ ވާހަކަ ދައްކާފައިވެ އެވެ. ބޭނުމަކީ ދެ ކުޅުންތެރިންގެ ގުޅުން ގޯސްވިޔަ ނުދިބުމަށް ބާރު އެޅުމެވެ. ޔުނައިޓެޑް މެޗުގައި ފެރަން ޓޮރޭޒް ނެގި ހުރަސް ބޮލުން ޖެހުމަށް ފަޓީ ފުންމައިގަތީ ލެވޮންޑޯސްކީ އެބޯޅަށް އަންނަތަން ނުފެނުމުން ކަމަށްވެސް ފަޓީ ވަނ ބުނެފަ އެވެ. ނަމަވެސް ޕޮލެންޑްގެ ކެޕްޓަންގެ ކިބައިން ފަޓީ މައާފަށް ނޭދެ އެވެ.

އަނިޔާގެ ސަބަބުން ޓީމަށް އެކަށީގެންވާ ގޮތެއްގައި ހިދުމަތް ނުލިބޭތީވެ މި ސީޒަނަށް ފަހު ފަޓީ ވިއްކާލުމަށް ނުވަތަ ލޯނު އުސޫލުން ދޫކޮށްލަން ބާސެލޯނާއިން ދަނީ ވިސްނަމުންނެވެ.

ސްޕެނިޝް ލީގުގައި ބާސެލޯނާ ތަފާތު ބޮޑުކޮށް ކުރީގައި އޮތް ނަމަވެސް ރޭ އަލްމީރިއާ އަތުން ވަނީ 1-0އިން ބަލިވެފަ އެވެ. މިއީ ޔުނައިޓެޑް އަތުން ބަލިވުމަށްފަހު ބާސެލޯނާ ޖެހިޖެހިގެން ބަލިވި ދެ ވަނަ މެޗެވެ. ނަމަވެސް އެ ޓީމު އޮތީ ހަތް ޕޮއިންޓާއެކު ސްޕެނިޝް ލީގުގެ ތާވަލުގެ ކުރީގަ އެވެ.