15 އަހަރުން ދަށުގެ ކުއާޓާ ފައިނަލްގައި ފ.އަތޮޅު މަދަރުސާ، ރެހެންދި، ގުރައިދޫ، ޣާޒީ، އަޙުމަދިއްޔާ، ތާޖުއްދީން، އަމީނިއްޔާ އަދި ކަލާފާނު

އިންޓަ ސްކޫލް ހޭންޑް ބޯޅަ މުބާރާތުގެ 15 އަހަރުން ދަށުގެ އަންހެން ބައިގެ ކުއާޓާ ފައިނަލް ގައި ވާދަކުރާ ޓީމުތައް ޔަޤީންވެއްޖެ އެވެ.

މި ބައިގެ ކުޅުން ވެސް ކުރިއަށް ގެންދިޔައީ ހަތަރު ގްރޫޕަކަށް ބަހައިގެންނެވެ. ތިން ގްރޫޕެއްގައި ފަސް ޓީމު އޮތް އިރު، އެއް ގްރޫޕުގައި އޮތީ ހަތަރު ޓީމެވެ. ގްރޫޕް އޭގައި ކުޅުނު ހަތަރު މެޗު ވެސް ކާމިޔާބުކޮށްގެން އެއް ވަނައިގައި ކުއާޓާ ފައިނަލަށް ގުރައިދޫ ސްކޫލް ދަތުރުކުރިއިރު، އެއް މެޗުން ބަލިވެ ދެ ވަނައިގައި ދިޔައީ ތާޖުއްދީން ސްކޫލް އެވެ. ގްރޫޕް ބީގެ އެއް ވަނަ ފ.އަތޮޅު މަދަރުސާ (ފ.ފީއަލީ) ހޯދީ ވެސް ކުޅުނު ހަތަރު މެޗު ކާމިޔާބުކޮށްގެންނެވެ. މި ގްރޫޕްގެ ދެ ވަނަ ލިބެނީ ކަލާފާނު ސްކޫލަށެވެ. ގްރޫޕް ސީގެ އެއް ވަނަ ހޯދީ އަޙުމަދިއްޔާ އިންޓަނޭޝަނަލް ސްކޫލް އެވެ. އެއީ ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ އެއް މެޗު އެއްވަރުވެގެންނެވެ. ދެ ވަނަ ޣާޒީ ސްކޫލަށް ލިބެނީ ވެސް ތިން މެޗުން މޮޅުވެ އެއް މެޗު އެއްވަރުވެގެންނެވެ. އަޙުމަދިއްޔާ އިން ކުރި ހޯދަނީ ފައިދާ ގޯލުންނެވެ. ގްރޫޕް ޑީ ގައި އޮތީ ހަތަރު ޓީމެވެ. ކުޅުނު ތިން މެޗު ކާމިޔާބުކޮށް މި ގްރޫޕްގެ އެއް ވަނަ އަމީނިއްޔާ އިން ހޯދިއިރު، ދެ ވަނަ ލިބުނީ އެއް މެޗުން ބަލިވި ރެހެންދި ސްކޫލަށެވެ.

15 އަހަރުން ދަށުގެ އަންހެން ކުއާޓާ މެޗުތައް ފަށާނީ ހޮނިހިރު ދުވަހުގެ ހަވީރު އެވެ. ފުރަތަމަ މެޗުގައި ގުރައިދޫން ނިކުންނާނީ ޣާޒީ ސްކޫލާ ދެކޮޅަށެވެ. ދެ ވަނަ މެޗުގައި ފ.އަތޮޅު މަދަރުސާ އިން ނިކުންނާނީ ރެހެންދި ސްކޫލާ ދެކޮޅަށެވެ. ތިން ވަނަ މެޗުގައި އެރޭ އަޙުމަދިއްޔާ ނިކުންނާނީ ތާޖުއްދީނާ ދެކޮޅަށެވެ. ފަހު މެޗުގައި އަމީނިއްޔާ ނިކުންނާނީ ކަލާފާނާ ދެކޮޅަށެވެ.

މި ބައިގެ ސެމީ މެޗުތައް ކުޅުމަށް ހަމަޖެހިފައި އޮތީ އާދިއްތަ ދުވަހުގެ ރޭ އެވެ.