ރައްޔިތުން މަޖިލިހުގެ އިދާރާގައި ޖިމެއް ހުޅުވައިފިއެވެ.
ބުދަ ދުވަހު ބޭއްވި ރަސްމިއްޔާތެއްގައި މި ޖިމް ރަސްމީކޮށް ހުޅުއްވައި ދެއްވީ މަޖިލީހުގެ ރައީސް، ރައީސް މުހައްމަދު ނަޝީދެވެ.
ޖިމް ހުޅުއްވައި ދެއްވުމަށް ފަހު، އެ މަނިކުފާނު ބައެއް މެމްބަރުންނާއެކު އެ ތަން ބައްލަވައިލެއްވިއެވެ.
މަޖިލިީހުގެ އިދާރާގެ އައު އިމާރާތުގެ 12 ވަނަ ފަންގިފިލާގައި ޖިމް ހެދީ ޕާކިސްތާނުގެ ސަރުކާރުން މަޖިލީހުގެ އިދާރާއަށް ދީފައިވާ ހިލޭ އެހީގެ ދަށުން ކަމަށް އެ އިދާރާއިން ބުނެފައި ވެއެވެ.
މަޖިލިހުގައި ގާއިމްކޮށްފައިވާ މި ޖިމުން މިވަގުތު ޚިދުމަތް ހޯދޭނީ މަޖިލިސް މެމްބަރުންނާއި އެ އިދާރާގެ މުވައްޒަފުންނަށް އެކަންޏެވެ.
މަޖިލީހުގެ އިދާރާގައި ޖިމެއް ހެދުމަށް ހުޅުވާލާފައި ވަނީ 2020 ވަނަ އަހަރުއެވެ. އެ ތަނުގައި ރެސްޓޯރެންޓަކާއި ފިހާރައެއް ވެސް ހެދުމަށް އޭރު ނިންމައި އެ ކަން އިއުލާންކުރިއެވެ.
