ސޯޝަލް ސެންޓަރުގައި ހުރި އެކި އެސޯސިއޭޝަންތަކުގެ އޮފީސްތައް އަދި ހޯލުތައް މިނިސްޓްރީ އޮފް ޔޫތް އެންޑް ސްޕޯޓްސް އިން ހުސްކުރަން އަންގައިފި އެވެ.
މިނިސްޓްރީ އޮފް ޔޫތުން ހަތަރު އެސޯސިއޭޝަނަކަށް ފޮނުވި ސިޓީއެއްގައި ބުނީ ރަސްފަންނު ތަރައްގީކުރުމުގެ ކޮންސެޕްޓުގައި ހިމެނޭ "ހައި އެންޑް ވޯޓާ ފްރަންޓް ރެސިޑެންޝަލް" މަޝްރޫއުއާ ގުޅިގެން މިނިސްޓްރީގެ ބެލުމުގެ ދަށުގައިވާ ނެޓްބޯޅަ ކޯޓު ހިމެނޭ ބިމާއި، ޓީޓީ ހޯލާއި، ޓީޓީ އެސޯސިއޭޝަން އޮފީހާއި، ބާސްކެޓްބޯލް އެސޯސިއޭޝަންގެ އޮފީހާއި އަދި ބަށިބޯޅަ އެސޯސިއޭޝަންގެ އޮފީސް ނިމިދިޔަ ޖޫން މަހަށް ހުސްކުރާށެވެ،
ޔޫތް މިނިސްޓްރީން ވަނީ މިކަމާ ގުޅިގެން މިދިޔަ މަހުގެ 20 ވަނަ ދުވަހު ޓޭބަލް ޓެނިސް އެސޯސިއޭޝަން އޮފް މޯލްޑިވްސް، މޯލްޑިވްސް ބާސްކެޓްބޯލް އެސޯސިއޭޝަން، ނެޓްބޯލް އެސޯސިއޭޝަން އޮފް މޯލްޑިވްސް އަދި ނެޝަނަލް ބަށިބޯޅަ އެސޯސިއޭޝަންއާއެކު ބައްދަލުވުމެއް ވަނީ ބާއްވާފައެވެ.
އެގޮތުން ޔޫތް މިނިސްޓްރީން ވަނީ ޓީޓީ ހޯލާއި ޓީޓީ އެސޯސިއޭޝަންގެ އޮފީސް ގަލޮޅު އެކްޓިވިޓީ ސެންޓަރަށް ބަދަލުކުރަން ނިންމާފައެވެ. ނެޓްބޯލް ކޯޓު މާފަންނު ސްޓޭޑިއަމްގެ ވޮލީކޯޓް ސަރަހައްދަށް ބަދަލުކުރުމަށް ނިންމާފައިވާއިރު، ބާސްކެޓްބޯލް އެސޯސިއޭޝަންގެ އޮފީސް ބަދަލުކުރަން ނިންމާފައިވަނީ ހ.ބޯޅަގެ އަށެވެ. އަދި ބަށިބޯޅަ އެސޯސިއޭޝަން އޮފް މޯލްޑިވްސްގެ އޮފީސްވެސް ބަދަލުކުރުމަށް ހަޖައްސާފައިވަނީ ހ.ބޯޅަގެއަށެވެ.
އެހެންނަމަވެސް ރާއްޖެއެމްވީ އަށް މައުލޫމާތު ދެއްވަމުން ނެޓްބޯލް އެސޯސިއޭޝަންގެ ރައީސާ އަމިނަތް ޝާޒްލީން ވިދާޅުވީ، އެ އެސޯސިޝަނުން އިންތިޒާމުކޮށްގެން ބާއްވާ އިންޓަ ސްކޫލް ނެޓްބޯލް މުބާރާތް މި މަހުގެ ފަސްވަނަ ދުވަހު ފަށާ ކަމަށާއި، އެހެންނަމަވެސް އަދިވެސް އެ އެސޯސިއޭޝަނަށް ހަމަޖައްސައިދޭން ޔޫތް މިނިސްޓްރީން ބުނި ބިން ހަމަޖެހިފައިނުވާ ކަމަށެވެ. މީގެއިތުރުން ޝާޒްލީން ވިދާޅުވީ، މި މަހުގެ އެއްވަނަ ދުވަހުން ފެށިގެން ވައިޑީޕީގެ ހަރަކާތެއްވެސް ނެޓްބޯލް އެސޯސިއޭޝަނަށް ކުރިޔަށް ނުގެންދެވޭ ކަމަށެވެ.
