ކ.ތުލުސްދޫގައި ފުޓުބޯޅަ ކުޅެން ހުރި ޒުވާނަކު މަރުވެއްޖެ އެވެ.
ރާއްޖެއެމްވީ އަށް މައުލޫމާތު ދެމުން ތުލުސްދޫ ކައުންސިލް މެމްބަރު އަބްދުއްރައްޒާގު އަލީ ވިދާޅުވީ، ހޮނިހިރު ދުވަހު އިރުއޮއްސި ހައެއް ޖަހާއިކަށްހާ އިރު އެ ރަށު ޒުވާނެއް ފުޓުބޯޅަ ކުޅެނިކޮށް ދަނޑުމައްޗަށް ވެއްޓިގެން ހޮސްޕިޓަލަށް ގެންދެވުނު ކަމަށާއި، އޭނާ ހޮސްޕިޓަލަށް ގެންދިޔައިރުވެސް އޮތީ މަރުވެފައި ކަމަށެވެ.
ރައްޒާގު ވިދާޅުވީ، މަރުވި ޒުވާނާއަކީ ތުލުސްދޫ އަތޮޅު ތައުލީމީ މަރުކަޒުގައި ވަޒީފާ އަދާކުރަމުން އަންނަ ޓީޗަރެއް ކަމަށާއި، އޭނާ އަކީ އަބަދުވެސް ކުޅެން ދާ ފަރާތެއް ކަމަށެވެ. އެގޮތުން އޭނާ އާދައިގެ މަތިން ހޮނިހިރު ދުވަހުވެސް ކުޅެން ދިޔައީ ވޯކްޝޮޕެއްގައި ބައިވެރިވުމަށްފަހު އެވެ.
ރާއްޖެއެމްވީއަށް މައުލޫމާތު ދެމުން މަންޒަރު ދުށް ފަރާތަކުން ބުނީ މަރުވި ޒުވާނާ ދަނޑުމަތީގައި ކޮށިއަރައިގެން ކެއްސިކަމަށާއި، ފަހުން ފެނުނީ ދަނޑުމައްޗަށް ވެއްޓިފައި އޮތްތަން ކަމަށެވެ. އެގޮތުން ވަގުތުން ސައިކަލެއްގައި ހޮސްޕިޓަލަށް ގެންދެވުނު ކަމަށްވެސް އޭނާ ވަނީ ބުނެފައެވެ.
