ސްވިޑްންގައި ޤުރުއާންގެ ކޮޕީއެއް އަންދާލުމުން ތުރުކީގެ ރައްޔިތުން ސްވިޑްން ދިދައެއް ރޯކޮށްލައިފި

ސްވިޑްންގައި ޤުރުއާންގެ ކޮޕީއެއް އަންދާލުމުން ތުރުކީގެ ރައްޔިތުން އެކަމާ ނުރުހުންފާޅުކޮށް ސްވިޑްންގެ ދިދައެއްގައި ރޯކޮށްލައިފިއެވެ.

ތުރުކީގެ ރައްޔިތުން ސްވިޑްންގެ ދިދައެއްގައި ރޯކޮށްލައިފައި ވަނީ ތުރުކީގައި ހުންނަ ސްވިޑްން ކޮންސިއުލޭޓްގެ ކުރިމަތީގައެވެ.

ހޮނިހިރު ދުވަހު ތުރުކީގައި ހުންނަ ސްވިޑްން ކޮންސިއުލޭޓް ކައިރިއަށް އެތައް ސަތޭކަ އާންމުންނެއް އެއްވެ ވަނީ ސްވިޑްންގައި އެދުވަހު ކުރިއަށްދިޔަ މުޒާހަރާގައި ހިންގި ނާތާހުޒީބު އަމަލު ކުށްވެރިކޮށްފައެވެ. އެއްވުމުގެ ބައިވެރިން ވަނީ އިސްލާމްދީނާ މެދު މީހުންގެ މެދުގައި ނަފުރަތު އުފައްދާ، އިސްލާމްދީނާ މެދު މީހުންގެ ހިތްތަކުގައި ބިރުވެރިކަން އުފެއްދުން ހުއްޓާލަންވެސް ގޮވާލާފައެވެ.

ތުރުކީގެ ފުލުހުން އެއްވުމުގެ ބައިވެރިން އެތަނުން ދުރުކުރީ ސްވިޑްން ކޮންސިއުލޭޓްގެ ދޮރާއްޓަށް ގެއްލުންދޭން މަސައްކަތްކުރަން ފެށި ހިސާބުންނެވެ.

ހޮނިހިރު ދުވަހު ސްވިޑްންގެ ސްޓޮކްހޮމްގައި ތުރުކީއާ ދެކޮޅަށް ކުރިއަށްގެންދިޔަ މުޒާހަރާއެއްގައި ޤުރުއާންގެ ކޮޕީއެއް އަންދާލުމުން ތުރުކީން ވަނީ އެކަން ހަރުކަށި އިބާރާތުން ކުށްވެރިކޮށްފައެވެ.

ސްވިޑްންއިން ނޭޓޯއާ ގުޅުމަށް ކުރާ މަސައްކަތުގައި ތުރުކީން އެއްބާރުލުން ދެމުން ނުދާތީ ތުރުކީއާ ދެކޮޅަށް އެގައުމުގައި ހުންނަ ތުރުކީ އެމްބަސީ ކުރިމަތީ މީހުން ވަނީ އަޑުއުފުލާ މުޒާހަރާކޮށްފައެވެ. މިމުޒާހަރާގެ ބައިވެރިއެއްކަމަށްވާ ޑެންމާކްގެ ކަނާތުފިޔައިގެ ސިޔާސީ ޕާޓއެއްގެ ލީޑަރެއް ކަމަށްވާ ރަސްމުސް ޕަލުޑަން ވަނީ އެމްބަސީ ކުރިމަތީގައި ޤުރުއާންގެ ކޮޕީއެއް އަންދާލާފައެވެ. ރަސްމުސް ޕަލުޑަން އަކީ ސްވިޑްންގެ ރަށްވެހިކަންވެސް އޮންނަ މީހެކެވެ.

އޭނާގެ މިއަމަލު އެންމެ ހަރުކަށި އިބާރާތުން ކުށްވެރުކޮށް މިކަމާ ގުޅިގެން އަޅަންޖެހޭ ފިޔަވަޅު އެޅުމަށް ތުރުކީގެ ފޮރިން މިނިސްޓަރު މެވްލުޓް ކަވުސޮގްލޫ ވަނީ ސްވިޑްން ސަރުކާރަށް ގޮވާލާފައެވެ. މިއަމަލަކީ މުޑުދާރު އަމަލެއްގެ ގޮތުގައި ސިފަކުރައްވާ، އިސްލާމްދީނާ ދެކޮޅަށް، މުސްލިމުންނަށް އަމާޒުކޮށްގެން ހިންގާ މިދަފަ ނާތަހުޒީބު ކަންކަމަކީ ހިޔާލުފާޅުކުރުމުގެ މިނިވަންކަމުގެ ގޮތުގައިވެސް ނުބެލެވޭނެ ކަމަށް ތުރުކީގެ މިނިސްޓަރު ވަނީ ވިދާޅުވެފައެވެ.

މިކަމާ ގުޅިގެން ސްވިޑްންގެ ސަރުކާރުން ފިޔަވަޅު އެޅުމަށް ގޮވާލުމުގެ އިތުރުން، އިސްލާމް-ފޯބިއާ ނުވަތަ އިސްލާމްދީނާ މެދު މީހުންގެ ހިތްތަކުގައި ނަފުރަތު އުފެއްދުމަށް ކުރާ މިފަދަ ކަންތައްތައް ހުއްޓުވުމަށް ގައުމުތަކުން ތެދުވެ ފިޔަވަޅު އެޅުމަށް ތުރުކީގެ ފޮރިން މިނިސްޓްރީން ނެރުނު ބަޔާނެއްގައި ވަނީ ގޮވާލާފައެވެ.

ތުރުކީން ކަންބޮޑުވުން ފާޅުކުރުމާ ގުޅިގެން ސްވިޑްންގެ ފޮރިން މިނިސްޓަރު، ޓޮބިއަސް ބިލްސްޓޮރޮމް ވަނީ އިސްލާމްފޯބިއާގެ އަމަލުތަކަކީ ބަލަން ފަސޭހަވި މަންޒަރެއް ނޫންކަމަށް ދޭހަވާ އިބާރާތުން ވާހަކަފުޅުދައްކަވާފައެވެ. އަދި ސްވިޑްން އަކީ ހިޔާލުފާޅުކުރުމުގެ މިނިވަންކަން ވަރަށް ބޮޑަށް ދީފައިވާ ގައުމެއްކަމަށް ފާހަގަކުރައްވާ، މިގޮތަށް ފާޅުކުރާ ކޮންމެ ހިޔާލަކީ އެމަނިކުފާނު އަދި އެގައުމުގެ ސަރުކާރުން ތާއިދުކުރާ ކަންތައްތައް ނޫންކަމަށް ސްވިޑްންގެ މިނިސްޓަރު ވަނީ ވިދާޅުވެފައެވެ.

ސްވިޑްންގައި މިގޮތަށް ޤުރުއާންގެ ކޮޕީއެއް އަންދާލުމާ ގުޅުގެން، ތުރުކީގެ އިތުރުން ސައުދީ އަރަބިއްޔާ އާއި ޖޯޑަން އަދި ކުވެއިތުންވެސް ވަނީ މިކަން ކުއްވެރިކޮށްފައެވެ. ސައުދީން ވަނީ މީހުންގެ މެދުގައި ނަފުރަތު އުފެދޭ ފަދަ މިފަދަ ހައްދުފަހަނައަޅާފައިވާ ހިޔާލުތަކާ އަމަލުތަށް އެގައުމުން ބަލައި ނުގަންނާނެ ކަމަށް ބުނެފައެވެ.

އެ ސިޓީގައި ވަނީ ކުރުދުންނަށް ސަޕޯޓުކޮށްވެސް އިތުރު އެއްވުމަކާއި ތުރުކީއަށް ސަޕޯޓުކޮށް އިތުރު އެއްވުމެށްވެސް ހަމަ އެދުވަހު ކުރިއަށް ގެންގޮސްފައެވެ. މިތިން އެއްވުންވެސް ކުރިއަށް ގެންގޮސްފައި ވަނީ އެގައުމުގެ ފުލުހުންގެ ހުއްދައާ އެކުއެވެ.