ގަތަރަށް ކުރިމަތި ކުރި ޝަރުތުތައް ބައިނަލް އަގްވާމީ ގާނޫނުތަކާ ޚިލާފް: ތުރުކީގެ ރައީސް

އަވައްޓެރި ގައުމުތަކުން ގަތަރާ ގުޅުން ކަނޑާލާ އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ގަތަރުން ފުރިހަމަ ކުރަންޖެހޭ ކަމަށް ބުނެ އެ ގައުމުތަކުން ގަތަރަށް ހުށަހެޅި ޝަރުތު ތަކަށް ތުރުކީގެ ރައީސް ތައްޔިބު އުރުދުޣާން ވަރަށް ބޮޑަށް ނުރުހުން ފާޅު ކުރައްވާ ދެކޮޅު ހައްދަވައިފިއެވެ.

ރައީސް އުރުދުޣާން ވަނީ އަވައްޓެރި ގައުމުތަކުން ގަތަރަށް ކުރިމަތި ކުރުވި ޝަރުތުތަކަކީ ބައިނަލް އަގްވާމީ ގާނޫނުތަކާ ޚިލާފް ޝަރުތު ތަކެއް ކަމަށް ވިދާޅުވެފައެވެ.

ތުރުކީގެ މީޑިއާ އާ ހަވާލާދީ އަލްޖަޒީރާއިން ބުނެފައިވަނީ، މި ފިޔަވަޅުތަކަށް ރައީސް އުރުދުޣާން ދެކޮޅު ހެއްދެވުމުގެ އިތުރުން، އެ ފިޔަވަޅުތަކާ މެދު ގަތަރުން ދިން ރައްދަށް އެމަނިކުފާނު މަރުހަބާ މަރުހަބާ ވިދާޅުވި ކަމަށެވެ.

"ގަތަރަށް ހުށަހެޅި 13 ޝަރުތާ މެދު ގަތަރުން އަމަލު ކުރި ގޮތަށް މަރުހަބާ ކިޔަން، އެ ޝަރުތު ތަކަކީ ބައިނަލް އަގްވާމީ ގާނޫނާ ޚިލާފް ޝަރުތު ތަކެއް" އުރުދުޣާން ވިދާޅުވިއެވެ.

ގަތަރަކީ ޓެރަރިޒަމް އަށް ވާގިވެރިވާ ގައުމެއް ކަމަށް ބުނެ ބައެއް ގައުމުތަކުން އެގައުމާ އޮންނަ ގުޅުން ކަނޑާލީ ޖޫން މަހުގެ 5 ވަނަ ދުވަހުއެވެ. އަދި އޭގެ ފަހުން ވައިގެ މަގުންނާއި އެއްގަމު އަދި ކަނޑުގެ މަގުން ގަތަރަށް ދަތުރުކުރެވޭނެ މަގުތައް އެގައުމުތަކުން ވަނީ ބަންދުކޮށްފައެވެ.

މި ފިޔަވަޅު ތަކާ ގުޅިގެން ތުރުކީން އަންނަނީ ގަތަރަށް ވަރަށް ބޮޑަށް އެހީތެރިވަމުންނެވެ.

ގަތަރުގައި ތުރުކީގެ އަސްކަރީ ބޭސް އެއް ގާއިމް ކޮށްފައިވާއިރު، އެ ބޭސްގައި ތުރުކީގެ 90 ސިފައިން ގާއިމްވެ އެބަ ތިއްބެވެ.

އަވައްޓެރި ގައުމުތަކުން ގަތަރަށް ކުރިމަތި ކުރުވި ޝަރުތުތަކުގެ ތެރޭގައި އެ ގައުމުގައި ގާއިމް ކޮށްފައިވާ ތުރުކީގެ ބޭސް ބަންދު ކުރުން ހިމެނެއެވެ.

ގަތަރަށް ކުރިމަތި ކުރި ޝަރުތުތަކާ ބެހޭ ގޮތުން މި ދިޔަ ހޮނިހިރު ދުވަހު އެ ގައުމުން ބުނެފައިވަނީ އެއީ ބުއްދި ގަބޫލު ކުރާ ޝަރުތުތަކެއް ނޫން ކަމަށާއި، އެއީ އެގައުމުގެ އިސްތިގްލާލަށް އަރައިގަތުން ކަމަށެވެ.

މީގެ ހަފްތާހެއްހާ ދުވަސް ކުރިއަށް ޖެހިލާއިރު ގަތަރުގެ އާބާދީއަށް ބޭނުންވާ ކިރުގެ ބާވަތްތައް މައިގަނޑު ގޮތެއްގައި ގަތަރަށް އެތެރެ ކުރަމުން ދިޔައީ ސައުދީންނެވެ.

ގަތަރުގެ ޚާރިޖިއްޔާއަށް 13 ނުކުތާ އެކުލެވޭ ގޮތުން ހުށަހެޅި ޝަރުތައް އަވައްޓެރި ގައުމުތަކުން ފޮނުވީ ޖޫން މަހުގެ 22 ވަނަ ދުވަހުއެވެ.

ގަތަރުން ބުނެފައިވަނީ ޝަރުތުތައް މުރާޖައާ ކުރަމުންދާ ކަމަށާއި އޭގެ ފަހުން ރަސްމީ ޖަވާބު ދޭނެ ކަމަށެވެ.

މި ޝަރުތުތަކުގެ ތެރޭގައި ހިމެނޭ އެހެން ނުކުތާތަކަށް ބަލާއިރު، އަލްޖަޒީރާ ނެޓްވޯކް ބަންދު ކުރުމާއި، އީރާނާ އެކު އޮންނަ ގުޅުން ކުޑަ ކުރުން ހިމެނެއެވެ.

ޝަރުތުތަކަށް އެއްބަސްވުމާއެކު ކޮންމެ މަހަކު އެއްފަހަރު އެ ޝަރުތުތައް ތަންފީޒް ކުރާ މިންވަރު ބަލުމަށް އޮޑިޓް ހެދުމަށްވެސް ވަނީ ހުށަހަޅާފައެވެ.

މި 13 ޝަރުތު ފުރިހަމަ ކުރުމަށް ގަތަރަށް ދީފައިވަނީ އެންމެ 10 ދުވަހުގެ މުހުލަތެކެވެ.

ގަތަރާއެކު ގުޅުން ކަނޑާލާފައިވާ ގައުމުތަކަކީ، ބަހްރޭން، ކޮމޮރޯސް، މިސްރު، އެރިޓްރިއާ، ޔޫއޭއީ، ދިވެހިރާއްޖެ، މޮރިޓޭނިއާ، ލީބިޔާ، ސައުދީ އަރަބިއްޔާ، ސެނެގަލް އާއި ޔަމަން އެވެ.

ގަތާރާ މެދު އުފެދިފައިވާ މައްސަލަތައް ހައްލު ކުރުމަށް އެހީތެރިވެ ދިނުމަށް، ފްރާންސް، އެމެރިކާ، އީރާން، ކުވޭތު، މޮރޮކޯ، ޕާކިސްތާން، އަދި ތުރުކީން ހުށަހަޅާފައި ވެއެވެ.