ތުރުކީގެ ރައީސް އުރްދޮޣާން އަވަހާރަ ކޮށްލަން ރޭވުމުގެ ކުށް ސާބިތުވި 40 މީހަކު އުމުރަށް ޖަލަށް ލައިފި

ތުރުކީގެ ރައީސް ރަޖަބް ތޮއްޔިބް އުރްދޮޣާން އަވަހާރަ ކޮށްލަން ރޭވިކަމުގެ ކުށް ސާބިތުވެ، 40 މީހަކު އުމުރަށް ޖަލަށް ލުމަށް ތުރުކީގެ ކޯޓަކުން ހުކުމް ކޮށްފި އެވެ.

ތުރުކީގެ އިރުދެކުނުގެ ސަހަރެއް ކަމަށްވާ މުގްލާގައި ބުދަ ދުވަހު ބޭއްވި ޝަރީޢަތުގައި 40 މީހަކު އުމުރަށް ޖަލަށް ލުމަށް ހުކުމް ކުރިއިރު، އޭގެ ތެރެއިން 31 މީހަކަށް އުމުރަށް ޖަލަށް ލުމުގެ ހަތަރު ހުކުމެއް ކޮށްފައިވާ ކަމަށް ތުރުކީގެ މީޑިއާ އާއި ހަވާލާދީ އަލްޖަޒީރާ އިން ބުނެ އެވެ.

އުމުރަށް ޖަލަށް ލުމަށް ހުކުމް ކުރި ގިނަ މީހުންނަކީ ތުރުކީ އަސްކަރިއްޔާގެ ޙާއްސަ ފައުޖުތަކަށް ނިސްބަތްވާ ސިފައިންނެވެ. އޭގެ ތެރޭގައި އަސްކަރިއްޔާގެ އިސް އޮފިޝަލުން ހިމެނެ އެވެ.

އެމީހުންގެ މައްޗަށް ޝަރީޢަތް ހިންގާފައިވަނީ މިދިޔަ އަހަރުގެ ޖުލައި މަހުގެ 16 ވަނަ ދުވަހުގެރޭ، އުރްދޮޣާން ޗުއްޓީ ހޭދަކުރައްވަމުން ގެންދެވި ހޮޓަލަކަށް ވަދެގަނެ، އުރްދޮޣާން އަވަހާރަކޮށްލަން ރޭވި ކަމުގެ ތުހުމަތުގައެވެ. އެހެންނަމަވެސް މިހަމަލާ އިން އުރްދޮޣާން އާއި އޭނާގެ އާޢިލާ ވަނީ ހަނި ގޮތަކަށް ސަލާމަތްވެވަޑައިގެންފަ އެވެ.

މިމައްސަލާގައި އުމުރަށް ޖަލަށް ލުމަށް ހުކުމް ކުރި މީހުންގެ ތެރޭގައި މިހަމަލާ ރޭވުމުގެ ތުޙުމަތު ކުރެވިފައިވާ ތުރުކީ އަސްކަރިއްޔާގެ ކުރީގެ ބްރިގޭޑިއަރ ޖެނެރަލް ގޯޚާން ސަހިން ސޮންމެޒަޓެސް ހިމެނެއެވެ. އަދި ހަމަލާއަށް ފަހު ހަތަރު ދުވަސް ފަހުން ހޮހަޅައެއްގެ ތެރޭގައި ފިލައިގެން އުޅެނިކޮށް ހައްޔަރުކުރި ކުރީގެ އެލީޓް ކޮމާންޑޯ ޒަކަރިއްޔާ ކޫޒޫ ވެސް އުމުރަށް ޖަލަށް ލުމަށް ހުކުމް ކޮށްފައިވެއެވެ.

މީގެ އިތުރުން، އުރުދުޣާންގެ ކުރީގެ އަސްކަރީ މުޝީރެއް ކަމަށްވާ އަލީ ޔަޒީސީ 18 އަހަރަށް ޖަލަށް ލުމަށް ކޯޓުން ވަނީ ހުކުމް ކޮށްފަ އެވެ.

މިދިޔަ އަހަރު ތުރުކީ އަށް ގެންނަން އުޅުނު ނާކާމިޔާބު ބަޣާވާތުގެ މައްސަލާގައި 47 މީހެއްގެ މައްޗަށް އުރުދޮޣާން އަވަހާރަ ކޮށްލަން އުޅުނު ކަމުގެ ތުހުމަތަށް ޝަރީޢަތް ހިންގާފައިވެއެވެ. އޭގެ ތެރެއިން ކުށް ސާބިތުވެފައިނުވާ ހަމައެކަނި ފަރާތަކީ އަސްކަރިއްޔާގެ ކުރީގެ ކާނަލް ހުސެއިން ޔިލްމާޒް އެވެ.

ތުރުކީގައި ގެންނަން އުޅުނު ބަޣާވާތަށް ފަހު، ކުއްލި ޙާލަތު އިޢުލާނުކޮށް 50 ހާހަށް ވުރެ ގިނަ މީހުން ހައްޔަރު ކޮށްފައި އެވެ.

ބަޣާވާތް ގެންނަން އުޅުނު ކަމުގެ ތުހުމަތު ތުރުކީ ސަރުކާރުން ކުރަނީ އަމިއްލަ އަށް އަރުވާލެވިގެން އެމެރިކާގައި ދިރިއުޅޭ ފަތުﷲ ގުލެންގެ މައްޗަށެވެ. އެހެން ނަމަވެސް ގުލެންގެ މައްޗަށް ކުރާ ތުހުމަތަށް އޭނާ އިންކާރު ކުރެ އެވެ.

އުރްދޮޣާންގެ ވެރިކަން ވައްޓާލުމަށް ގެންނަން އުޅުނު ނާކާމިޔާބު ބަޣާވާތުގެ ޝަރީޢަތްތައް ފަށާފައިވަނީ މިދިޔަ ފެބްރުއަރީ މަހު އެވެ. މިމައްސަލާގައި ތުހުމަތު ކުރެވޭ ބައެއް މީހުންގެ ޝަރީޢަތް ނިންމައި ޙުކުމް ކޮށްފައިވާއިރު، މިއީ ބަޣާވާތް ރޭވުމުގައި ހިމެނޭ އިސް މީހުންގެ މައްޗަށް ޙުކުމް އިއްވި ފުރަތަމަ ފަހަރެވެ.

ބަޣާވާތް ގެންނަން އުޅުމުގެ ތެރޭގައި 249 މީހަކު މަރުވެފައިވާއިރު، އޭގެ ތެރޭގައި މާމަރިސްގައި އުރްދޮޣާން އާއި އޭނާގެ އާޢިލާ ޗުއްޓީ ހޭދަކުރައްވަމުން ގެންދެވި ގްރޭންޑް ޔަޒީސީ ހޮޓެލްގެ ސަލާމަތީ ކަންކަމުގައި ހަރަކާތްތެރިވި ފުލުހުންގެ ދެ އޮފިސަރަކު ހިމެނެ އެވެ.

ސީއެންއެން އަށް ދެއްވި އިންޓަވިއުއެއްގައި އުރްދޮޣާން ވިދާޅުވީ، އޭނާ ހޮޓަލުގައި 10 ނުވަތަ 15 ވަރަކަށް މިނިޓްގައި އިތުރަށް މަޑުކުރި ނަމަ، އޭނާ މަރާލުން ނުވަތަ އެމީހުންގެ އަތްދަށަށް ދިއުމުގެ ފުރުޞަތު އޮތެވެ. މިރޭވުމުން އުރްދޮޣާން ސަލާމަތްވީ، ހަމަލާގެ ވަގުތު ކޮޅެއް ކުރިން ފިއްލަވައިގެން އިސްތަމްބޫލަށް ފުރާވަޑައިގަތުމުންނެވެ.