ކުޅުއްފުށި ސިޓީ ރީޖަނަލް ހޮސްޕިޓަލްގެ އައު އޯޕީޑީ އިމާރާތުގެ މަސައްކަތް ނިންމައި، އެ ހޮސްޕިޓަލުގެ ގަވަރނިންގ ބޯޑާ ހަވާލުކޮށްފިއެވެ.

މި މަޝްރޫއުގެ މަސައްކަތް ނިންމައި، ރަމްޒީ ތަޅުދަނޑި ކުޅުދުއްފުށި ހޮސްޕިޓަލްގެ ގަވަރނިންގ ބޯޑާ ހަވާލުކޮށްދެއްވީ އެމްޓީސީސީގެ ސީއީއޯ އާދަމް އާޒިމެވެ. ތަޅުދަނޑިއާ ހަވާލުވެވަޑައިގަތީ ކުޅުދުއްފުށީ ހޮސްޕިޓަލުގެ ސީއީއޯ އަހުމަދު ދާވޫދެވެ.

މި މަޝްރޫއުގެ ދަށުން، ބަލިމީހުން ބަލާ 24 ކޮޓަރިއާއި، ޓްރީޓްމެންޓް ރޫމަކާއި، ޕްރޮސީޖަރ ރޫމަކާއި، އިކޯ ރޫމަކާއި އަދި އީސީޖީ ރޫމެއް ވަނީ ހަދާފައެވެ.

ކުޅުދުއްފުށީ ރީޖަނަލް ހޮސްޕިޓަލުގައި އިމާރާތްކުރި އޯޕީޑީ އިމާރާތުގެ ސަބަބުން، އެ ހޮސްޕިޓަލަށް ދިމާވެފައިވާ ޖާގައިގެ ދަތިކަމަށް ހައްލު ލިބި، ހޮސްޕިޓަލުން މިހާރު ދޭ ޚިދުމަތްތައް އިތުރަށް ފުޅާވެގެން ދިއުމުގެ އިތުރުން، ބަލި މީހުން ބެލުމަށާއި ޚިދުމަތް ހޯދުމުގައި އިތުރު ލުއި ފަސޭހަކަމެއް ލިބިގެން ދާނެއެވެ. އެގޮތުން، މިހާރު ބޭނުންކުރަމުންދާ އިމާރާތުގައި ދެމުންދާ ބައެއް ޚިދުމަތްތައް އާ އިމާރާތައް ބަދަލުކޮށް، އިތުރު ޚިދުމަތްތައް ތައާރަފުކުރުމަށް އެ ހޮސްޕިޓަލުން އަންނަނީ ތައްޔާރުވަމުންނެވެ.

މިނިސްޓްރީ އޮފް ހެލްތުން މި މަޝްރޫއުގެ މަސައްކަތް ހަވާލުކުރީ އެމްޓީސީސީއާއެވެ. އެ ކުންފުންޏާ މި މަސައްކަތް ހަވާލުކުރީ 18 ނޮވެމްބަރު 2021ގައެވެ.

ކުޅުދުއްފުށީ ރީޖަނަލް ހޮސްޕިޓަލަކީ އެ އަތޮޅުގެ އިތުރުން ރާއްޖޭގެ އެކި ހިސާބުތަކުން ގިނަ ބަޔަކު ޚިދުމަތް ހޯދަން ދާ ހޮސްޕިޓަލެކެވެ. އެގޮތުން، ކޮވިޑުގެ ތެރޭގައި އެ ހޮސްޕިޓަލުން ޚިދުމަތް ހޯދި މީހުންގެ އަދަދު އެތައް ގުނައެއް އިތުރުވެފައިވާއިރު، ޖާގައިގެ ދަތިކަމުގެ ވާހަކަ އެ ހޮސްޕިޓަލުން ދައްކައެވެ.